Fa’ailo atugaluga o se Ofisa Malaga mai Siamani

Tusia Mathias Hukert ma Fa’aliliu e Maiava ,

146 Hits

Le Tama’ita’i o Carla Kindervater mai le Vaega a le HM Touristik i Germany.

Le Tama’ita’i o Carla Kindervater mai le Vaega a le HM Touristik i Germany.

Na molita’i mai e se sui-auai i le Polokalame o Fetufaa’iga 2016 a le Vaega mo Tagata Maimoa a Samoa, le tama’ita’i o Carla Kindervater mai Siamani, ni fautuaga-aoga mo latou o tu’u-fa’atasia lea fa’amoemoe.

A fa’apea e iai so latou mana’o e matua fa’aaoga lelei lenei Fetufaa’iga, sa tatau lava ona taula’i le va’ai e fa’aali ma fa’ailoa i sui-‘auai, Samoa – ae maise lava o Savai’i – nai lo le na o le tautala tautala ma saga tautatala ai lava i le potu-fono i Apia.  

Na fa’ailoa mai i le Samoa Observer e Carla – le Sui o le Ofisa Malaga a le ‘HM Touristkit‘ mai Siamani e fa‘apea, o le leaga o le fuafuaina o asiasiga ma maimoaga i nofoaga ‘ese’ese o le atunu’u, o se fa’afitauli tele lea ia te ia.

E moni sa fa’afiafiaina lava i le Fetufaa’iga, a o le fa’afitauli sa la feagai, o le tau-sa’ilia lea o nofoaga ma mata’aga aupito mananaia ma lelei i Samoa nei, na te fautuaina mo tagata tafafao Siamani e fia asiasi mai. 

I sana saunoaga, o le mafuaga o lea mea, e le fa’apea ona o le louloua o le tau sa iai i nai aso ua mavae atu po’o se isi lava mafuaga. 

“O nisi lava mea, sa tatau ona sui se faiga e fa’atino ai, e faigofie ai ona ‘ausia le fa’amoemoe ‘autu lea, o le fa’atauina atu o Samoa i se faiga manaia e fa’afiafiaina ai pa’aga,“ o lana fa’aaliga lea. 

“I le matou asiga o Samoa e o’o mai i le taimi nei, e matua tele na’ua taimi sa na o le nonofo ai i totonu o pasi ae sa tatau ona o i fafo, e savavali ma matamata, se’i tilotilo ma va’ai-tino, se faiga sa tatau ona fa’atino ai ia mea.“ 

O le nofoaga fo’i sa nonofo ai, na atili le-manaia ai lava le asiasiga.

“O fale fo’i sa nonofo ai, sa i le isi itu o le motu.

“A fia o’o mai i Apia i fa’aaliga sa faia ai, e tau-lotulotu mai le isi itu o le motu, e fa’apena fo’i pe a mae’a, e toe uia lava le ala lea mo taumafataga o le aoauli, ma toe fo’i mai ai fo’i i le isi itu i le afiafi mo le po.“ 

Na ta’ua, e matua leai lava se mafaufau i mea nei, ae sa naunau lava ia tele sona taimi e asiasi ai ma va’ava’ai solo, se’i tofotofo i le matagofie o va’aiga i nofoaga nei ma mata’aga i Samoa, ae le na o le talanoa ma talanoa ma saga talanoa ai pea ma tagata lava e tasi i totonu o le potu-malulu. 

Na faitioina fo’i e Carla, le ‘uti’uti tele o le taimi sa iai ma ana uo i Savai’i.

“Na o si taimi pu’upu’u lava sa tapu’e ai ata ta’itasi mai totonu o le ta’avale, pau lea,“ o lana faitio lea.  

O le aotelega o lona asiasi mai ma va’ai ia Samoa, o se atunu’u lelei tele ma manaia, e to’ai iai tagata-asiasi mai fafo.

„“O se atunu’u e matua matagofie atoatoa fa’atasi ai ma ona tagata tali-malo ma laufofoga-fiafia, e seāseā maua i isi nofoaga,“ o lana fa’aaliga lea. 

O lana fautuaga, o vaivaiga o tapenaga a Samoa, ua faigata ai ona maua ma iloa lelei le atunu’u i lona atoaga.

Lona uiga, “e ono faigata ai lava ona tau-tata’i mai tagata mai Europa e o-mai i Samoa ma o se tulaga fa’anoanoa lava lea, ae o Samoa lava ia, o se atunu’u agalelei ma matagofie tele.“

© Samoa Observer 2016

Developed by Samoa Observer in Apia