Talia e le Faamasinoga le tagi e tali atu ai, ae faaleaogaina le tuua’iga lona tolu

By Lanuola Tusani Tupufia 15 April 2016, 12:00AM

Ua teena e le Faamasinoga Sili se talosaga ina ia faaleaogaina le tagi e faasino i ni tuuaiga se lua e tete’e atu ai- na faaulu e le Sui Usufono muamua o le Palemene mo le Alataua Sisifo, o Lafaitele Patrick Lei’ataualesa.

Ae ui o lea, ona o le aloa’ia o Lafaitele, o lea na talia ai e le Faamasinoga se tagi e faaleaogaina ai e faasino i le tuuaiga tete’e lona tolu e faasaga i lana molimau-o ia foi lea sa avea ma sui faatu, o Aiolupetea Visekota Peteru.

O ia tuuaiga e tolu e teena ai le talosaga na faaulu e le Sui Usufono fou faatoa filifilia mo le Alataua Sisifo-o Ali’imalemanu Alofa Tu’u’au-e ala i lana loia, o Amelia Faasau.

Na soso’o lea ma se talosaga a Lafaitele o loo tuua’ia ai faiga tau faasese e faasaga ia Ali’imalemanu i le faagasologa o le Faiga-Palota Lautele. O le Loia o Eliota Fuimaono-Sapolu ma Unasa Iuni Sapolu o loo fai ma sui o Lafaitele.

O le faaiuga na fai se vaega o Alii Faamasio o le Faamasinoga Sili na taiulu ai le Faamasino Sili, Lana Afioga Patu Tiava’asu’e Falefatu Sapolu. 

O isi o le Tamaitai Faamasino o Mata Tuatagaloa, Alii Faamasino o Vui Clarence Nelson ma le Alii Faamasino o Lesatele Rapi Vaai..I le tuuina atu o lea faaiuga, fai mai Lana Afioga Patu o tuua’iga tete’e e lua e faasaga i le itu tagi ua faataga ona faaauau.

Ae o le “tuuaiga tete’e lona tolu e faasaga i le molimau a le itu tagi, o Aiolupotea Visekota ua faaleaogaina ma o le itu i totogi o le a faataatia,” o lana faaaliga lea.  Sa faailoa atu e le Faamasino Sili i le Faamasinoga e faapea o mafuaga mo lea faaiuga o le a tuuina atu i loia i se faiga tusitusia.

O le talosaga tete’e muamua o loo tuua’ia ai faiga tau faasese ma faiga pi’opi’o na fai i Neiafu lea na fai ai e Lafaitele se folafolaga lautele e faapea e le mafai ona tali atu i le faaaloalo ona o le tulafono ae o le a tali atu i lea faaaloalo pe a mae’a le palota.

O le talosaga tete’e lona lua e tutusa lava ae ese le taimi na fai ai i le faagasologa o se siva a le ekalesia (tausala) lea o loo tuua’ia ai Lafaitele e faapea na fai ai sana faaaliga na te le tuuina atu soo se mea ona o le tulafono ae o le a tali atu pe a uma le palota.

E tusa ai ma lana folasaga, o le finauga a le loia o Eliota Fuimaono Sapolu e faapea o le faamoemoe o le itu talosaga o le tausisia lea o le tulafono i le taimi na ia faia ai lea faaaliga e le mafai ona tali atu ona o le tulafono.

Sa ta’ua e Sapolu se pepa o faamatalaga lea na ta’ua ai e se molimau e faapea fai mai Lafaitele pe manumalo pe leai, o le ana tuuina atu se mea i le nuu.

Na ia toe ta’ua e faapea o le Sui Usufono muamua o le Palemene sa na iloa lelei le tulafono ma o le a na tuuina atu se mea i le nuu e tusa ai ma le tulafono.Ae peita’i, sa teena e Mrs Faasau. O le finauga a lea Tamaitai e faapea afai e leai se faamoemoe o le itu tagi e soli le tulafono, semanu na te le faia se folafolaga e tali atu.  

 “O lea faamatalaga na fai e faatosina ai tagata o le nuu (ina ia palota mo ia),” o lana faaaliga lea. Ua toe tolopo lea mataupu mo le fofogaina

By Lanuola Tusani Tupufia 15 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>