E lua isi talosaga tau faiga-palota ua toe faaui i tua.

By Pai Mulitalo Ale 15 April 2016, 12:00AM

E lua isi talosaga tau le faiga-palota ua toe faaui i tua. 

O lona uiga o le Sui Usufono o le Palemene mo Falelatai ma Samatau, o Taefu Lemi, ma le Sui Usufono o le Palemene mo le Itumalo Tu-Taulaga i Sisifo, o Faumuina Wayne Fong-o le a tautua mo ni vaitaimi e lima tausaga i totonu o le Palemene.

O lea faaiuga ina ia toe faaui i tua talosaga na faalauiloa i totonu o le Faamasinoga Sili ananafi. Na soso’o lea ma le toe faaui i tua o le isi talosaga e aofia ai le Fofoga Fetalai o le Palemene, o Le’aupepe Toleafoa Faafisi.

O ia talosaga e tolu e atoa ai le ono o talosaga na faaulu i le Matagaluega o Faamasinoga ma Pulega Tau Faamasinoga ina ua mae’a le Faiga-Palota Lautele i le aso 4 o Mati 2016. O ananafi na fofogaina ai ia talosaga e ono i luma o le Faamasinoga Tau Faiga-Palota sa taiulu ai le Faamasino Sili, Lana Afioga Patu Tiāva’asu’e Falefatu Sapolu ma le Alii Faamasino o Lesatele Rapi Vaai. O le mataupu muamua o le talosaga lea na faaulu e se sui faatu ua le manumalo, o Anae Misa Anae e faasaga ia Taefu.

O le Tamaitai Loia o Rosella Papalii na ia faailoa atu i le Faamasinoga e faapea ua mae’a ona fai e itu e lua le tonu o lea mataupu ma ua latou manana’o e toe faaui i tua le mataupu. O le talosaga lona lua na faaulu e le sui faatu o le Nofoa Tu-taulaga o Sisifo ma le Sui Usufono muamua o le Palemene o Maualaivao Pat Ah Him e faasaga ia Faumuina Wayne Fonga ma Falana’ipupu Dan Aiafi.

O le loia a le itu tagi, o Lei’ataualesa Jerry Brunt na ia faailoa atu i le Faamasinoga e faapea ua mae’a ona fo’ia e itu auai lea mataupu ma ua tonu ia i latou ina ia toe faaui i tua le talosaga. O le talosaga mulimuli  e mai le itumalo faa-faipule o Aana Alofi Nu.1 Sisifo.

O le talosaga tau le faiga-palota na faaulu e se sui faatu ua le manauia lana taumafaiga-o Aiono Tile Gafa e faasaga i le Fofoga Fetalai o le Maota Fono o Le’aupepe Toleafoa Faafisi mo faiga pi’opi’o.

O loia a Le’aupepe o Charlie Vaai, na ia fofogaina le Faamasinoga e faapea ua uma ona teuteu le mataupu ma latou te talosagaina le toe faaui i tua o le talosaga.

O le tali, sa faailoa atu e le Faamasino Sili o Patu i loia faufautua e faapea o le taualumaga tau le faauiina i tua o ia talosaga e tusa ma le lua vaiaso e faatino ai.

O le a faaalia aloa’ia e le faamasinoga le toe faauiina i tua o le talosoaga pe a fofogaina ia mataupu i le aso 29 o Aperila 2016 i le itula e 12.30 i le aoauli.

By Pai Mulitalo Ale 15 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>