I le faatalatalanoaina ai ele Fofoga o Samoa o le tupulaga talavou ia Tofilau Tinei 23 le matua le soifua mai le alalafaga o Puipaa ma Nuufou, e tata logo atu pea Masefau, a le afu le tagata e le I’u i se taunuuga manuia. 

“Ou te talitonu lava a’u ia o le tele o lota ia lava galuega o le tele foi lea o fa’amanuiga ou te maua. E moi, e tele lava le faigata o le soifuaga ae ia tatou faapea ifo lava tatou ia galulue ma sona galulue pea.  

“Ou te tautino atu lava a’u ia e faigata le olaga, ae maise lava ua ou le toe aoga ae ou nofo e tausi o’u matua ma le  matou aiga. O lona manatu lea I le Fofoga o Samoa. 

“Tele lava o lenei vaitau ua filifili tagata pe faaauau le aoga pe nofo foi le aiga. 

Ae ose filifiliiga ia Tofilau le nofo e tausi ona matua ma fesoasoani i le atina’eina o aiga. Sa ia faailoa foi se feau taua lava ma o loo mulimuli pea iai I le faamanatu o lona tama ia te ia e leai ni aoga na iai latou I la aso o le fatu aiga tausi lava ma le aoga I totonu o aiga ua alai mai ai manuia ua ia maua.

Ina ua fesiligia I le tau o le soifuaga ua iai nei, na ia faailoa ua fai lava si taugata le soifuaga. Ae pau le mea e faafetai ai o loo gafatia lava e si ona aiga vaega uma i tau faalavelave, o mea fai le lotu ae maise o nai ona tei aoogae toa lua.I le vaitau foi nei ua tele lava le naunau o tagata I le fai o fale tetele, atugalu faatau taavale e fia ma fia ae o ia mea uma a leai se fiafia e maua e maimau lava le taimi. 

“Ia o si o matou aiga e faafetai lava I mea ua maua ae o le naunautaiga lava o le maua le fiafia I totonu lo’u aiga ma nofo fealofani.

“E lelei lava le faasoa I le vai ae maise foi le eletise.

“E maitau foi le tele o taimi  e lelei ai o taimi foi e faaletonu ai ae pau lava le fofo le faafitauli o le galue malosi, ma ia galulue faatasi ia foia ai le faafitauli.

O le mau lava ma le talitonuga o Tofilau e taugata le soifua, ae o le galue lava ma toto le fiafia I totonu o aiga e taunuu manuia ai miti uma o loo iai. Ma o le auala lava o ia naunautaiga o le tausi le aiga, ona su’esu’e ai lea se galuega mo le lumanai.