Fa’aauau pea le vevela o le tau

410 Hits

Ripotia e Vatapuia Maiava

Fa’aliliu e Maiava

 

E matua sa’olele Lau Afioga pe a o e manatu, ua fai lava si vevela tele o Samoa i lenei vaitau.

O masina e lua ua mavae atu nei, sa fai lava si vevela tele o aso ma e to’atele sa mafai ona ‘alo’alo mamao mai le la ae maise le vevela na’ua.

I se tala mai le Vaega Va’ai-Tau i Mulinu’u, na ta’ua ai, o le a fa’aauau ai pea fa’apea – ona o aga a El Nino – le tau-vevela o lo’o ua iai nei le Pasefika.

Na fa’ailoa mai i le Samoa Observer e le Susuga a Tile Jr. Tofaeono, o se ofisa sinia o le Ofisa Va’ai Tau: “O le vevela o aso, o le tasi lea o uiga o le El Nino.”

 “O a’afiaga o le El Nino lea ua tatou lagona nei, o le vaitau aupito vevela lea ua fa’amauina ma e ono sili atu ma fa’aopopoina pea le vevela i le lumana’i.

“O le leai o se timu e pa’u, o le tulaga masani fo’i lea o suiga o le tau,” o le fa’aaliga lea a Tile. “E la’ititi lava nai timu-to’ulu o lo’o o-mai fa’atasi ma le vevela i nai masina ua tuana’i atu.”

Sa tu’uina mai e le Vaega Va’ai-Tau i Mulinu’u, se lapata’iga o mugala mo Samoa i le tolu masina ua mae’a nei ma atonu o le a fa’aauau ai pea mo sina taimi se’ia pasia tatou e le Vaitau Vevela (El Nino).

O se fa’afanua o le tau na tu’uina mai e le Ofisa i Mulinu’u, o lo’o ta’ua ai, o le aso aupito vevela o le masina talu ai, na fa’amauina lea o le Aso Faraile 15 o Fepuari 2016, lea na o’o atu i le 36.2 tikeri le maualuga, e 6.1 tikeri e sili ai i le tulaga sa tatau ona iai. 

O le vevela sa tatau ona iai Ianuari, o se vaimea o le 30.1 tikeri, pe a fa’atusa i le vevela sa iai i le 30 tausaga ua mavae (1971-2001).

Ae le na o le pau lea. E ui sa fuafua e fa’aitiitia tau-vevela o El Nino ia Mati o le tausaga nei, peita’i na fa’ailoa mai e le Ofisa Va’ai-Tau, e iai le avanoa e tumau ai pea ma fa’a’umi’umi ona vevela.

“O tulaga masani ia, e ui ua mae’a le Tau Vevela (El Nino), ae tumau pea ona iai ona a’afiaga e te’a atu Mati ae atili fa’ateteleina lava le vevela,” o le fa’amalamalamaga lea a Tile, ma atonu o le a sili atu ona vevela le masina o Fepuari peita’i e ao lava ona silasila i itu lelei.

“Lea lava e tumau le matagofie o o tatou laufanua – o matafaga e tafafao ma fiafia ai aiga – pe a tu’ua a’oga ma galuega!”

 

© Samoa Observer 2016

Developed by Samoa Observer in Apia