Manatu o le Fa’atonu - Ni ta’otoga e mo’omia po’o ni faiga masani?

165 Hits

Tusia - Marj Moore

Fa’aliliu - Maiava

 

O le peritomeina o fanau-tama a le atunu’u e mafai ona fa’amatalaina fa’apea, o se aga-masani ma o le mea moni e tatau ona fai.

A o le fa’alavelave la, e matua ulagia lava se po’a ae le ta’oto.

I Tonga, Niue ma Tikopia, o le tulaga lava lea e tatau ona fai.

E fa’ale-ano tele iai Niu Sila, lea e ripotia so’o mai ai i le tele o falema’i, le le-toe faia ai o ni peliga mo tama pe a talosaga atu, ma fa’amalosia ai loa aiga Polenisia e sa’ili se foma’i-agalelei e fa’atinoa lea mana’oga mo fanau. 

O le tasi mafuaga ua mumusu ai foma’i e faia ia ta’otoga, ona o le talitonuga fa’apea, “e tatau ona puipuia fanau mai suiga tumau o o latou itutino e faia, e aunoa ma so latou maliega, ae talu ai ona o le aga-masani lea, o aga fa’aKerisiano, e aoga ma e manana’o fo’i iai matua e fa’atino. O le tulaga masani lava ma le talitonuga ua talia-lautele, e mafai ona malilie atoatoa matua e faia se ta’otoga o sa la tamaititi pe a mo’omia mo le puipuiga o le ola ma le soifua maloloina lelei o le tamaititi. O le peritome la, e le sao ai mai le tulaga lea, talu ai, o le ‘ave’esea o se vaega o le ‘pi’ a le tamaititi, e tiga ma e le o puipuia ai le ola maloloina o le tamaititi, a o le mea moni, e ono tupu ai nisi popolega po’o a’afiaga fou. O le ‘ave’esea o pa’u, e le ‘ese ma le ‘ave’esea o se tamatama’ilima po’o se isi lava vaega o le tino.” 

Atonu la o se tasi lea o mafuaga o le taugata tele o ia ta’otoga i atunu’u mamao (lea e ta’i-afe tala) pei ona ta’ua e Tagaloa Dr. Rober Thomsen, le Lagolago i le Pule Sili o le Vaega mo le Soifua Maloloina Lautele. (silasila i le tala i le itulau muamua).

Sa saunoa Tagaloa i le mea lea na tupu i se tama-a’oga fa’aFoma’i i le Iunivesete Aoao i le Papaigalagala, lea sa fai ana periperiga ta’i-70 tala, ae $150.00 e masani ona fa’atino ai e foma’i-mo’i ua resitala ma fa’atagaina. 

O le isi mafuaga e tete’e ai e le tele o foma’i i le Lalolagi nei le toe faia o ia periperiga, ona e ‘ave’esea ai vaega o le tino o se pepe po’o le ‘pi’ fo’i a se tamaititi, aua e le gata e tiga, e lamatia ai le ola ae tigaina ai fo’i le tamaititi. O le tele o periperiga e le fa’aaogaina ai ni vaila’au-fa’amoe pei ona ta’ua mai, aua e ui ina fa’aaoga fuala’au ma vaila’au, e le ‘ave’esea ai lava le tiga.

 “So’o se ta’otoga lava, e iai lava mea e ono tutupu i le fa’atinoina o ta’otoga nei, e aofia ai le siama o le tipi, e alu le palapala (toto), e titipi-‘ese le tele o pa’u, tele vaega-ola e ‘ave’esea ai, fa’afitauli pe a fai fe’au-vai ma e ono maliu ai fo’i se tagata. O le ta’otoga lea, e momotu-‘ese ai le tele o le pa’u o le ‘pi’ ma lona aoga ae tumau ai lava ma’ila’ila o vaega sa titipi-‘ese.” 

O a’afiaga uma e mafua i le fa’atinoga o ‘tipiga’ nei, o se tulaga na ioeina e le foma’i o Tagaloa.

“O le peritomeina o fanau o se ta’otoga e faia ma le fa’aeteete aua a iai se fa’aletonu, e ono tele se a’afiaga ma e ono uma ai se soifua o se tamaititi.  

 “O le mafuaga tonu lena e na o foma’i fa’apitoa lava ua resitalaina, e mafai ona fa’atinoina lea gaioiga, ae le mafai lava e so’o se tasi ona faia; e le faia e se tausima’i po’o se tamaititi-a’oga fo’i.”

Lea ua ta’ua le le-tatau ona faia o nei ta’otoga e so’o se tagata e le o se foma’I, ae maise fo’i le ta’ua o le iai pea o foma’i i nofoaga i tua i vaiaso ta’itasi, ma ua tu’ua ai na o le tulaga i le tau po’o le totogi o nei ta’otoga. 

Mo aiga e to’atele fanau-tama, e lima-vaivai ma tele isi mea fai-tupe, o ai o le a le-talia se ofo mo le faia o tipiga pe a fa’apea e taugofie atu i lo le tau masani. E faigata lava ona te’ena. 

Ae ui lava i lea, o le faia o nei ta’otoga e se tagata e le’i resitalaina fa’aleTulafono, e matua atugalu ai popole pe a le’i avea e matua i le tulafono.   

Atonu e tele ni mafuaga o le le-o’o i le tulafono, e aofia ai le matamumuli ona o a latou fanau po’o le matamumuli fo’i i le le-siakia lelei pe o se foma’i-mo’i. 

Ae matou te talotalo, ia avea lenei mea-matuia ua tupu se’i toe silasila lelei ai i lea aga ua masani ai, pe o talafegai pea ona toe faia.

A silasila fo’i i isi vaega o Aferika, o lo’o fa’atinoina ai pea lea gaioiga i tama’ita’i, ma o se tulaga o le a alalaga fiafia ai le itupa o tama’ita’i ma latou o lo’o finau mo aia-tutusa mo le itupa-vaivai, lea e le manana’o i mea uma e faia e tamaloloa.  

 

© Samoa Observer 2016

Developed by Samoa Observer in Apia