Fa’atula’i ese ni aiga mai Satapuala

Tusia Ilia L. Likou ,

118 Hits

Nisi o le afioaga i le aso Toanai na sei mavae atu nei.

Nisi o le afioaga i le aso Toanai na sei mavae atu nei.

O aiga o i latou ua moliaina nei i le maliu ai o se tamaititi e 15 tausaga le matua mai le afioaga o Satapuala ua faatulai ese nei ma le afio’aga.

I le tulai mai ai o lenei mataupu na tulai mai ai ma se isi faalavelave lea na faatamaia ai le fale o se tasi o loo masalomia i se mu i le aoauli o le Aso To’onai.

Sa valaauina le Matagaluega o Leoleo ma o lea ua faatautaia ai nei se suesuega.

O loo masalomia sa faatupuina e se tagata lenei faalavelave.

I le fa’atalatalanoaina ai lava o lea mataupu sa faailoa ai e le pulenuu o le afioaga sa feiloai le nuú i le aoauli o le Aso Faraile ina ua maua le tino o lea tamaititi ae ua uma le ola.

Sa ia taua sa tuuina atu se faasalaga, “E tatau ona totogina mai le $20,000 tala aó lei taina le itula e 4 i  le afiafi o le aso toanai ae a leai o le a mu loa le foaga.”

“E ui a i lea ae sa mafaufau totoa alii ma faipule o le afioaga i lo tatou Tama ma lana silasila o lea na toe suia ai loa le faaiuga e tatau ona tulai ese.”

Sa taua e Vaili Mimita o lea faaiuga o le a faamautinoa i le aso Gafua nei.

Sa maua atu e le Samoa Observer i le Aso Toanai nisi o le aumaga faapea ai matai o le afioaga pe tusa lea ma le toa 30 oi latou ua toe agai ese mai le nofoaga o loo faapea ona aumau ai i latou nei e toa 5 lea o loo masalomia I le maliu ai o lea tamaititi e 15 tausaga le matua.

Sa faamaonia mai foi e Vaili e saó o se tasi o fale o I latou nei ua molia sa faatamaia lea I se mu.

Sa ia taua foi e leai lava se aafiaga o le afioaga e tusa ai ma le faalavelave ua tulai mai lea ua mu ai se tasi o fale.

“I le mataupu foi ua aliae mai o loo tuuina atu lava i lima o le matagaluega o leoleo latou te suesueina ma faatinoina le tulafono. “E le avea ai lea ma itu o le a nofonofoaí ai le afioaga o Satapuala mai le faatinoina o latou titue e tatau ona saili.”

“I lou iloa iai e tusa ai ma faamatalaga na oo mai sa faaoolima ai I latou nei ua molia ma o latou tuú ai lava o ia seia uma lona ola.”

Sa taua foi e Vaili ua maea foi ona talosagaina e le afioaga le aiga o lea alo ua maliu ina ia aua nei toe taui atu ae ia faatupu pea le filemu. “Sa talosagaina foi le aiga e le nuú ina ia o latou maua le loto faamagalo Iai latou sa faaoo le oti I lenei tamaititi.”

“O soo se isi lava e le utagia le talosaga ale afioaga ina ia tausi le filemu o le a tuu atu iai le faasalaga talafeagai.”

“O lea ua faagasolo nei suesuega a le matagaluega o leoleo ae leo mafai ona faamaonia atu sa faatinoina e se tasi le susuina o le fale o se tasi o loo masalomia.”

“O lea o loo galulue faatasi lava le matagaluega o leoleo ma le afioaga e pei ona taua e Vaili.

E fa’atatau ai lenei ripoti e15 tausaga o se tamaititi mai le afio’aga o Satapuala ua oti mai se fa’alavelave ua ta’ua ai le aofia ai ma fuala’au fa’asaina.

O lo’o ua fa’asolo su’esu’ega a leoleo i le taimi lenei mo Uili Uili ma o ripoti o lo’o ua ta’ua ai le  i ai oni manu’aga tugā i lona ulu. 

O le tausailia ai o lenei tamaititi ina ua logoina e le aiga le ofisa i le Aso Lulu o le vaiaso nei na maua ai e leoleo se togā mariuana  i le afio’aga ina ua alu le osofaiga a le matagaluega. Na maua lona tino i tafatafa lava o le vaega o lo’o maua o lo’o ua totōina ai la’au mariuana i totonu lava o le afio’aga.

Na ta’ua e le Sooupu a Leoleo i a Auapa’au Logoitino Filipo o le sailiga o Uili na mafua ai ona maua lenei togala’au fa’asaina.

Ua fa’amaonia mai foi o lenei togala’au tele e silia ma le $100,000 le tupe e mafai ona maua mai ai.

Na fa’ailoa e nisi o sui o le afio’aga na mafai ona feso’ota’i atu ai, o le aso Lua na vaaia mulimuli ai lenei tamaititi.

“O le Aso Tofi e silia ma le 20 ta’avale leoleo na o’o atu i le afio’aga mo a latou sailiga, ma na fa’aaupegaina uma lava,” sui o le afioaga.

“Aepeitai e le’i maua ai lava lona tino maliu na maua o ia i le Aso Faraile ma na iloa ni manuaga tugā i lona ulu.

O le taimi lenei o lo’o ua taofia e leoleo ni taulele’a se to’alua ona o le togala’au fa’asaina.

Na fa’ailoa e  Auapa’au e 200 la’au na mafai ona maua ma e tusa ma le tai ono le maualuluga o la’au fa’asaina nei.

E to’alima a ua taofia e leoleo e fa’atatau i le oti ai o Uili.

Na saunoa Auapa’au e fa’afetaia le afio’aga ona o le fesoasoani ai lea i le galuega a Malu a le Malo ua faigofie ai mea uma.

© Samoa Observer 2016

Developed by Samoa Observer in Apia