To’aga e gaioi mo lou soifua maloloina

Tusia Sarafina Sanerivi ma Ilia L Likou ,

104 Hits

Sina Panapa, 60 le matua o le soifua o Safotu i Savai’i.

Sina Panapa, 60 le matua o le soifua o Safotu i Savai’i.

“O a’u a leai ni a’u fe’au e faia i le aso e pei e ma’i lo’u tino i la’u fa’alogo” o lea le finagalo o le tinā i a Sina Panapa, 60 le matua o le soifua o Safotu i Savai’i i le fa’atalatalanoaga ma  le Fofoga o Samoa.

Na fa’ailoa e le tinā o le olaga lava lea na soifua mai ai le tele o tatou tagata o le ola e galulue i aso uma.

“Ia e pei o lea le olaga na masani mai ai le tele o nai  tua’a ua mavae, o a galuega uma e fai lava i lima mea uma ma fa’amoemoe i le malosi o tatalo.

“Ia na fiafia tagata uma, na tele aso na foa’i e le Atua i nai o tatou tagata aua e galulue ia ma maua ai pea lo latou malolosi.

“O nei aso, ia ua pei o le to’atele ua maliliu laiti ona o le le fuafuaina lelei o le tausami i mea’ai mai fafo ma le le o i fafo e galulue.

“O le itu lelei lena, o a fe’au e mafai ona fai, e pei o le saluina o le vae, o le taeina o le otaota, o le la’ai i le faleoloa ma toe sau, ia e fiafia lava a’u ia aua e maua ai le fa’amalositino.

“Ae pei, o le to’atele e tiga lava ole faleoloa e toeititi si’i i le fale ae oso lava i le tama’i ta’avale, oso le pasi , ae e lelei le fa’agaioi pea o le tino if eau.

Na ia fa’ailoa o lana maitau i le taimi lenei ua amata ona le toe ausia  le to’atele tausaga na au i ai le soifua o tua’a ua mavae.

“E pei o lea le fa’anoanoaga lea ona o leva’ai alofa i  nai fanau, o le laiti ae ua lapopo’a, ia o le so’ona tausasami lava.

“O lo’o tele le aufa’i, ia fai ma misi le vaemoa le isi aso, ia ae fai le fa’alifu ma le ti laumoli.

“O nai fanau fo’i e a la na so’ona ‘a’ai ia o le so’ona ave i ai o mea’ai ae a fuafua lava e matua ina e masalo o le a matutua ane ma pasi fo’i i fanau.

“O le isi itu ia o le au faigaluega, ua na’o le manava mai lava momoe, ae le o e fai sina fa’aafu i fe’au o le aiga.

“Aua e sili mamao atu le alu o le afu i feau nai lo le alu e tui se’evae koleni ae tamo’e luma o le auala.

“Ae pei o lea le fautuaga i nai o tatou tagata – ia gaioi mo lou soifua maloloina.

© Samoa Observer 2016

Developed by Samoa Observer in Apia