“O Keriso o le Atoaga o mea uma” - (2. Korinito.12: 9)

By Rev. Petaia Setu 15 January 2017, 12:00AM

E le o aso uma e taugalemū ai. Ua le o taimi uma foi e sologa lelei ai. O le aso ua to’a, o le aso foi ua louā. O le aso e fiafia ai, ma le aso e faanoanoa ai. O taimi e ’ata ai, ma ituaso e tagi ai. E le gafataulima e le pese ma le upu faamafanafana ona soliesea mafatiaga ole olaga. E le nana foi se lauga e unafi ese ai tigā o le tagata. A o le mana o le Alii na lagona e Paulo, “ O lo’u nei alofa tunoa e lava lea e fesoasoani ia te oe; auā o le vaivai e faaatoaina ai lo’u mana” (2. Kor.12:9).

O ai ua tu faa mauga? E leai lava so tatou e malosi faapea. E fesouaina pea ma osofa’ia i tatou e peau malolosi ma āuma o le lalolagi nei. Tatou te momoe ma manū e le fati, a o mala e ati a’e! E le i ’alo faafitauli ma puapuaga ole olaga i le aposetolo. Sa matuā iloga ona lailai ai Paulo. O lana tusi lenei na ia tala pipi ai i le ekalesia i Korinito le faataugaina o ia ona o Iesu ma lana talalelei. A tautalagia lona tulaga faaaposetolo, ua sili ia i le sasaina ma faafalepuipui soo. Ua faatolu ona afatia i le sami. Na po ma ao o faaopeopea i le vasa. Na maalili, fia ’ai, pupula faasoloatoa i le ao ma le po. Sa fetogia i maa. Na agateleina ma inosia e Iutaia. Semanū a leaga i tagata o nuu ese ma ona lava uso a tagata. Na sauaina i le aai, fesēa’i i le vao. Na loka i filifili uamea. E atu tolu ona sasaina i laau. Ae faa lima ona sasa e Iutaia i ta e tai faasefulu ma le iva! Ua atu lasi i oti (2. Kor.11:23-27). Talofa e, e matuiā. Ae sa mitamita ai Paulo i ona tiga. Auā ua ia mautinoa e i’u ia Keriso ona tiga.

O le alofa tunoa o le Atua, o le malosi fou lea. O le mana lea tatou te lagonaina ai le suamalie o tigā uma ua ogotia ai i tatou. Na te faasaolotoina i tatou mai fita ma faigata o le ola nei. Tatou te le ola faafifilemū. E faapea uiga o lo tatou ola aumau i le lalolagi nei. E faatupu e le Atua faigata i nisi foi taimi o lo tatou ola ina seia o tatou molimauina ai lona alofa laveai. Tatou te talitonuina ai lona auai ma lona mafutaina pea o i tatou ina ia noga ia te ia o tatou mafatiaga.

O Iesu Keriso o le alofa tunoa ia o le Atua. E le mafai e se puapuaga poo se tiga e oo lava i le oti ona faatoilalo le alofa tunoa o le Atua. E lava ma totoe lea e mapu iai lou tiga. Auā o ia o le atoaga o o tatou faafitauli; o lo tatou oge; o lo tatou mativa; o lo tatou gaogao; o le faanoanoa. Fai mai le aposetolo nei, “ A ua tatou manumalo aiai i nei mea uma lava,ona o ia ua alofa mai ia te i tatou.” (Rom.8:37)

Samoa e, e tele luitau ma fili o le malaga. E le na o le natura faalesiomaga, a o ō tatou foi tino tagata. Tatou te le mafaia se mea na o i tatou. E te le amoina foi na o oe mamafa o le lalolagi. O Keriso o le atoaga o mea uma. E atoatoa ia te ia lo tatou saolotoga. E lava ia te ia ou mafatiaga. ’Aua le popolevale. ’Aua le masalosalo. O la Iesu, “Aua le atuatuvale o outou loto; ia outou faatuatua i le Atua, ia faatuatua mai foi ia te au” (Ioane.14:1). O le faatuatua lea o loo taumafai Iesu e faamafanafanaina ai oe, o lou talitonu lea ma talia Iesu Keriso i lou loto i itu aso faapenei. Aso e vevesi ai. Aso e le mautonu ai. Aso e fetosoaina ai oe e le faanoanoa ma le fefe vale. Aso ua e gase ai ma ua e vaivai. Ua e siilima ai ua le mafaia se mea. Fai mai Paulo, “Na ou aioi faatolu atu i le Alii ona o lea mea, ina ia alu ese ia te au” (f.8) O le tali, “ O lou nei alofa tunoa, e lava lea e fesoasoani ia te oe; aua o le vaivai e faaatoaina ai lo’u mana.” O le mana o Keriso, ole mana fai vavega. O le mana faaola. O le mana sa iai lava i le amataga faatasi ma ia.  Ua faia ai faailoga tetele. Ua molimauina ai le mamalu o le Atua le Tamā. Aua ua pupula ai tauaso; savavali pipili; faalologo ai tutuli; tutuli ai temoni; utu ai punatoto; mālōlō ai le mau mai eseese. O le mana na usitai iai le matagi ma le vai; na toe tutū ai e na oti. Na līlīvale ai le tuugamau ae maasiasi ai le oti.

Ua moni lava, e lava ma totoe le alofa tunoa o lo tatou Atua, tatou te saoloto ma manumalo ai i puapuaga ma tofotofoga o lenei olaga. O ai la e taufaamatau mai ia te i tatou? O le vao? O le sami? O le fatu aiga po o le tausi aiga? O le aoga po o le galuega? O lou toalua poo ona matua? O a tatou pili ma loan, poo le tau o le soifuaga? Ae faapefea le  ma’i? Faapefea le oti?

Samoa e, ua iai ea se mea ua faigata i le Atua? E le mafai ona e manumalo i na faafitauli uma ma puapuaga pe afai e te le talitonuina le alofa tunoa o le Atua. E te le maua foi se toafilemu pe afai e te le taliaina le mafanafana o lo tatou Alii.

Na tagi lava le tasi faifeau Amerika, ua leva ona feaveai e fomai faapitoa lona atalii, ua 17 tausaga i se mai faigata na maua ai ina ua 10 ona tausaga. O ona lipoti uma lava, e leai se faamoemoe ola. Ua leai lava se togafiti e laveaiina. Na valaau lenei faifeau ma sa’i i le Atua. Le Atua, ua atu fia ona ma tatalo atu ma anapogi e te le o faafofoga mai lava! E iai ea sou alofa? A ’e le mafai ona laveai lo’u atalii ona tuu lea i se isi tagata na te mafai ona faia! Na talanoa mai iai le Atua i le miti ina o moe vaivai le tamā i autafa o le moega o lona atalii. ’E te le mafai ona onosai faapei o a’u? Sa matuā tigaina ma tafetotoi le tino o si o’u atalii i le sauā o le lalolagi, ae sa ou gūgū. Sa tuu iai le paletuitui, tutu’i, ona lima ma ona vae i fao. Sa ’eē i le tiga. Sa tutu’i lona itu i le tao, ae sa ou le gagana lava. A o lo’u Atalii pele e toatasi. Ua ou vaai i tiga o lou atalii, e mapu i lo’u Atalii. Na oti le Atalii o le faifeau i le aso na sosoo ai. Sa tagi lenei auauna i lana molimau ma faatoese atu i le Atua. O ana upu mulimuli, “Le Atua e, ua ou iloa lou alofa tunoa. Ua ou iloa foi e te mafaia mea uma lava pe a e finagalo lava iai.”

Samoa e, o la tatou malaga i lenei tausaga, e le alofia  e puapuaga ma faigata e oo lava i le oti. A ia outou lototetele ma tatou faatuatua i le Atua ma lona Alo. ’Auā fai mai Paulo, ‘Ua ou mautinoa, e le mafaia e le oti, poo le ola, poo agelu poo alii, poo ē malolosi, poo mea i nei ona po, poo mea atalī, poo le maualuga poo le loloto, poo se tasi mea na faia, e le mafaia e ia mea ona faate’aeseina mai i tatou i le alofa o le Atua o loo ia Keriso Iesu lo tatou Alii. (Rom.8:38-39)

Ia manatua Samoa, e uma timuga, mu mai le la. E te’a matagi to maninoa. E lutia i Puava, ae mapu i Fagalele. “Auā o lo’u nei alofa tunoa e lava lea e fesoasoani ia te oe; o le vaivai e faaatoaina ai lo’u mana” Ioe, e atoa ia Keriso mea uma tatou te tiga ai.

 

Amene

By Rev. Petaia Setu 15 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>