Tali le Minisita i le fa’afitauli o su’ega o le matematika

169 Hits

Minisita o A’oga, Ta’aloga ma Aganu’u, Magele Mauiliu Magele.

Minisita o A’oga, Ta’aloga ma Aganu’u, Magele Mauiliu Magele.

Ripotia e Lanuola Tusani Tupufia 

Fa’aliliu e Maiava

 

Tali fiafia e le Minisita o A’oga, Ta’aloga ma Aganu’u, Afioga a Magele Mauiliu Magele, faitioga e uiga i le su’ega o le Matematika, i le SSLC.

Na saunoa Magele, o le ‘ese’esega o finagalo ua fa’aalia i le mata’upu lea, ua lelei tele ma talafeagai mo le vaega o a’oga aua le aga’i i luma.

 “O le finagalo ua fa’aalia i luga o le nusipepa, ua fa’ailioa tonu ai le tulaga e tatau ona silasila toto’a iai,” o le fa’aaliga lea a Magele i le Samoa Observer. “Lea fa’atoa lua tausaga talu ona seti i Samoa nei le pepa-su’ega ma se’e-‘ese ai mai le SPBE (Su’ega a A’oga o le Pasefika i Saute i Fiti) ma e le’i iloa ai le mea lea.”  

Na tali mai Magele i le mana’o o le Fa’atonu o A’oga a le Ekalesia Katoliko, o A’e’au Chris Hazelman i le Matagaluega o A’oga, ina ia malamalama ma faia ni faiga-malamalama e uiga i le su’ega o le matematika. Sa ia ta’ua le to’atele o tamaiti e le’i pasi i le su’ega o le Matematika i le SSLC o le 2014, ma ta’ua ai, o se mea o le 40 fesili i le pepa talu ai, e mo le “Vasega Fa’avae o le Iunivesete ae le mo le Tausaga 13.”

“E matua le-talia lea mea,” o le le-fiafia lea a A’e’au.

A o le finagalo o le Minisita, o le pau-maulalo o tamaiti le-pasi i le suega lea, e mafua ona ua suia le faiga e fai ai.

Na fa’amalamalama mai e le Minisita e fa’apea, i le taimi o fa’aaoga le faiga tuai a le SPBE, sa fa’aaoga le ‘auala, e fua-fa’atatauina ai togi ma sa “fiafia iai faia’oga, ona e mafai ona lalafi ai tua (o togi o tamaiti-a’oga e maua).” 

Ae na fai loa le fa’ai’uga e fa’aaoga togi-sa’o na maua i su’ega i le faiga-fou lea, aliali loa ma iloa le mea moni lea. A fa’atusatusa la faiga nei e lua, na ta’ua e le Minisita, e afaina tamaiti pe a fa’aaoga le faiga e fua-fa’atatau ai togi e maua, pe a o’o atu i le Iunivesete o Samoa.

Na fa’ailoga fo’i e Magele, i tausaga ua te’a, sa to’atele tamaiti na pasi maualuluga i le matematika, a’o su’e i le su’ega o le School C a Niu Sila ma le su’ega fo’i o le UE.

Ae na o’o mai loa i le vaitau o le 1980’s, le toe su’e loa tamaiti i su’ega ia a Niu Sila. E le’i umi, ae fa’atulaga le su’ega lea a le SPBE. O le taimi tonu lena na amata ai le faiga lea, o le fua-fa’atatau o togi o tamaiti.

I le lua tausaga talu ai, na suia ai e le Matagaluega o A’oga. Na tonu ia latou, o le a seti lava i Samoa nei le su’ega o le matematika. E le gata i lea, ua ‘ave-‘ese ai fo’i ma le faiga tuai lea. 

 “A e le-iloa ou maka tonu na maua i le su’ega, e te leiloa fo’i vaega e tatau ona fa’aleleia aua o le faiga lea e pupuni atoa ai vaega e vaivai ai,” o le fa’aaliga malamalama lea a Magele.

“Afai e moni le tulaga lea e ta’ua e Vavatau ma A’e’au – ona ‘ou te le’i va’ai i se latou iloiloga fa’apea e faigata tele le su’ega, lona uiga, e tatau ona toe-fetu’una’i togi. 

“O le fa’aaogaina o togi na maua i su’ega, e le fa’apea o le a ‘ave’esea ai pe fa’aleaogaina atoa ai le faiga lea (toe si’i ma fa’atulaga togi na maua pe a fa’apea lava e le fetaui ma talafeagai.”

Na ta’ua fo’i e le Minisita, e taua le nonofo fa’atasi i lalo o tagata nei ma latou talafeagai, e talanoaina se ‘auala mo le aga’i i luma ma fa’aitiitia ai lea fa’afitauli ua iloa. 

Na fesiligia pe ua iai se suiga lelei o i’uga o su’ega o le matematika talu ona se’e-‘ese mai le SPBE, ae saunoa le Minisita, na ta’u atu ia te ia, ua pa’u maulalo. 

“Na ma fono ma le Ofisa Sili o le Matagaluega ma o la’u fesili lena na fai, o i’uga o su’ega ae tali mai o lo’o tapena muamua ‘aumai ai.” 

O ananafi na fa’amanatu ai e A’e’au, e tatau i le Matagaluega o A’oga ona fa’amautuina, ia tutusa uma le faiga o tamaiti.

“Lea ua fa’aalia i tausaga e lua ua mae’a atu, e le’i mae’a le latou galuega sa tatau ona fai ae maise, na sa una’ia malosi e nisi sa ‘auai i talanoaga mo le matematika,” o lana fa’aaliga lea.

“E le-valea tamaiti-a’oga, e le taitai manana’o e su’e i se mata’upu e iloa e la’ititi se avanoa e pasi ai. O le tulaga lena e ulagia ai le malo lea e matua taumafai malosi e una’i le fa’aSaienisi ma le Matematika i a tatou fanau-a’oga.

   “Mo le aga’i i luma, e tatau i le Matagaluega o A’oga ona malamalama muamua ma fai ni faiga malamalama i tulaga ia, pei o le filifiliga o tagata e faia ma fuafuaina su’ega, ia siakia lelei pepa-su’ega-fa’ata’ita’i ina ia mautinoa ua fa’amalieina tulaga ma mana’oga ‘uma o lo’o i totonu o polokalame o a’oa’oga, ae ‘aua le fa’atali i le taimi mulimuli (i le fono ia Setema lea e seti ma fuafua ai su’ega) e le tatau lava ona taliaina.”

© Samoa Observer 2016

Developed by Samoa Observer in Apia