O la’u tala fo’i

15 January 2016, 12:00AM

1. Matauina i Tala Fou ni finagalo faaalia o le Faatonu o A’oga a le Ekalesia Faapotopotoga Kerisiano i Samoa ma le Faatonu o A’oga a le Ekalesia Katoliko.

O ia la finagalo faaalia-fai mai e mana’omia le faimea tonu-ma o ia faasea -e faasino i mataupu o le faa-Saienesi ma le Matematika mo suega a le Vasega 13. Ua mafua la ona lagalagā e ia Taiulu o Aoga a Ekalesia lea mataupu-ona o le tulaga faaletonu o Su’ega a le fanau i le 2014.

Sa faaalia la e le Faatonu o Aoga a le Ekalesia Katoliko-fai mai o ia mataupu o le faa-Saienesi ma le Matematika ma lo la faatulagaina-ua talafeagai lea ma le Tausaga Amata o aoaoga faa-Iunivesite ae le mo le Vasega 13….! Ia-afai la e sa’o finagalo faaalia o ia Alii Faatonu-o lona uiga-o le matua faatautala lava ia faiga! O ai la e tuuaia ona o lea faaletonu? O le tali-o le Matagaluega o Aoga, Taaloga ma Aganuu-aua o i latou ia e gafa ma mataupu tonu mo ia suega! Afai la o loo mana’omia le faimea tonu-o le fesili-a faapefea ona fai le mea tonu e tagata faigaluega pe na o ta’ita’i o le atunuu-latou te le o faia se amiotonu? O le a sou taofi?

2. Matauina foi i Tala Fou se ulutala fai mai –‘Ua saogalemu Samoa.’ Ia, afai la o le aoina o fana ma auupega solitulafono ma lo latou faatama’ia-e faasino i ai lea ulutala-ia atonu ua sa’o! Ae o le fesili-e moni ma faamaoni ua saogalemu Samoa mai mea leaga uma? A faapefea le gaoi, talepe fale, fasioti tagata-toso teine ma le toe ‘ai lava e le laumei ia o lana fanau? Afai la ua saogalemu ona ua leai ni auupega mata’utia e pei ona faatama’ia-a faapefea i latou o loo faato’aina laau faasaina ma faatau atu? O saogalemu Samoa i lea itu? O le a sou taofi? 

3. Matauina i Tala Fou o lea ua faamavae aloa’ia le Afioga a Leota Laki Sio mai lona tulaga sa galue ai e  avea ma Pule o Auaunaga Tau le Soifua Maloloina Lautele i le Falema’i Tele o Tupua Tamasese i Motootua-ae o lea ua tapenapena e tauva i le Faiga Palota o loo loma nei -mo le tofi o le Itumalo o Palauli Le Falefa-lea o loo umia nei e le Minisita Muamua o Tupe –ma le Minisita o le Siosiomaga-o Faumuina Tiatia Liuga.

O fuafuaga la a Leota mo le faiga-palota-fai mai o le a faaalia uma lava i le taimi e tatau ai. I le taimi nei la- e le o iloa pe o i ai nisi sui faatutu faaopoopo- ae afai e na o Leota ma Faumuina le la palota-o lona uiga o le a sili ona faigofie lena. O lea la o le a palota le sa Minisita muamua ma le Leota sa avea ma Pule. O lona uiga la-afai e na o i latou-o le a manaia ma faigofie le la taaloga-ma afai la ae le toe fo’i mai Faumuina-a faapefea le anoano o mea e pei ona lipotia e le Pule ma Su’etusi Sili-o loo aafia ai? Afai la ua le mafai e le Malo ona fai se faiga i le Minisita muamua o Tupe ma ana faiga na fai i tupe a le atunuu-o afea la e fai ai? O le a sou taofi?

4. Matauina foi i Tala Fou le anoano o fono ma potoptoga, talanoaga ma le isi anoano sa fai-ma o loo fai pea lava e uiga i Sauaga I totonu o Aiga! O le itu ua matauina- ua ova fono le mea o loo fai nei-ae leai lava se galuega e manino mai ua uma ona faatino!

O le fesili la-o maua ni tupe a nei tagata e tumutumu i nei fono ma maumau ai taimi sa tatau ai ona fai ai nisi galuega aoga. E mafai e nei tagata e tumutumu i nei potopotoga ona faatonu o latou nuu e taofi sauaga i totonu o aiga? E mafai ona latou faatonuina le Pule Mamalu a Alii ma Faipule-ia tapu sauaga i totonu o aiga?

Afai la e le mafai ona latou faatonuina le pule a Alii ma Faipule-o le a le mea e maumau ai fua taimi ona faaalu i nei feiloaiga? Afai la o maua ai ni a latou tupe i ia potopotoga-o tupe maumau na tupe-talu ai latou te le faatonuina le Pule mamalu a Alii ma Faipule! Aisea la e le tuu ai loa ia feiloaiga ma potopotoga-ae matua o atu loa le matagaluea e gafa ma nei mataupu e feiloa’i i fanua  ma le pule mamalu a Alii ma Faipule –ona faatoa mafai ai lea ona alo mai nuu e lagolago lea taumafaiga! O le a sou taofi? 

5. Matauina foi i Talafou fai mai o loo saili e le Malo se Faatonu o le Ofisa e Faia Moliaga a le Atunuu lea fai mai e le’i leva ona faatu. O loo faapea foi ona faasalalau le avanoa o le tofi o le Loia Sili a le Malo.

O lea la Ofisa fou o Moliaga a le atunuu  o le a vavae atu i ai nisi o galuega a le Loia Sili a le Malo. Ia poo le a lava le uiga o lea Vaega Fou-atonu o le a tatou vaai tino lava i ai i se taimi vave. Ae o le itu taua lava- pe faamata a tino mai nei ofisa uma-ona mafai ai lea ona faatino le amiotonu ma le faamasinoga? O le a sou taofi?

15 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>