Fa’aaoga Tatau le Tu’uaga

Tusia Ulimasao Fata ma Vatapuia Maiava ,

32 Hits

Dickelium Scout Malaki mai le afioaga o Fasito’o-uta.

Dickelium Scout Malaki mai le afioaga o Fasito’o-uta.

I lenei vaitau i le tu’uaga umi o a’oa’oga i Samoa, ua tele foi taimi avanoa a le fanau.

O nisi o le a fa’amaepa’epa i le fale a’o isi foi o le a tu’u usu i le taulaga mo evaevaga, vagana ai le taule’ale’a ia Dickelium Scout Malaki mai le afioaga o Fasito’o-uta.

Na molimau le taule’ale’a ia Dickelium 17 tausaga le matua I le Fofoga o Samoa ananafi, e sili atu lona fa’aaoga’ina o lana tu’uaga mo se feau taua a le aiga nai lo’o le fa’ama’imau taimi solo.

Na maua atu lea taule’ale’a i le gataifale o Fasito’o o fai lana kili, na ia saunoa ai o lana lea gafa e fai pe a malolo aoga.

“O le ma galuega lava lea ma si o’u Tama pe a maua le avanoa.

“O lea foi la ua malolo mai a’oa’oga, ua tele foi le taimi e mafuta ai ma le aiga ma fai nai feau laity aemaise fo’i le asi’ina mai lea o le gataifale.

Na saunoa le taule’ale’a ia Dickelium o ia e lona fa I le fanau e to’aono, ma e na te fa’afetaia ona matua I le taumafaiga o lana aoga.

Na ia taua ai foi o le ala lea lea e fia fesoasoani ai I feau o le aiga ona lana agaga fa’afetai I ona matua.

“O lea fa’atoa uma la’u aoga I le Kolisi o Samoa lea na fa’au’uina ai I le vasega 13 I le aso Faraile na se’i mavae atu, ma o lea e fa’atali se tala lata mai I le I’uga o suega.

“Eui lava na’o le to’alua lava pea tagata o lo’o faigaluega I le matou aiga ma le tausiga o matou, ae fa’afetaia pea si o’u Tina ona o ana galuega faigata I le ma’umaga lea ua I’u ai ma le manuia a’u a’oa’oga mai le tulaga lua seia o’o mai I Kolisi.

“O le masani lava a si o’u Tina o le fa’atau’ina atu lea o mea toto mai le fanua aua le sailiga o se pili aogha mo a’u.

“E le gata ina matou galulue I le ma’umaga, ia ae matou te fiafia foi e asi le gataifale o lo’o iaia meaai mo le lautele.”

Na fesiligia foi le taule’ale’a ia Dickelium I le tulaga o lo’o iaia le latou aiga, na ia saunoa ai o lo’o tulaga lelei uma mea uma.

“O le tulaga lelei pea le matou aiga i le taimi nei.

“So’o se taimi lava e avanoa ai e taumafai lava e fai se feau taua I le aiga.

“Ia e maua foi le avanoa e taumafai ai e saili se seleni aua le tausiga o le aiga e fesoasoani ai foi I matua I se isi itu.

“Ia ua ou masani foi I le gataifale, e fai lava le kili poo le a le I’a e maua mai e talia ma le fa’afetai. E sea’sea ou fa’atau atu ni I’a ae ave lava I le fale mo le meaai a le aiga.

I le mae’a ai foi o a’oa’oga I le Kolisi a le taule’ale’a ia Dickelium, ua ia sauna atu nei e fia avea ma Loia I le lumana’i.

“O la’u lea naunautaiga o lo’o iai nei o le fia avea I lea o a’u ma Loia I le lumana’i.

“O le mafua’aga e ala ai na ou fia Loia, ona e tai tutusa lava ma le galuega a si o’u Tama.”

© Samoa Observer 2016

Developed by Samoa Observer in Apia