E faigofie le soifuaga i le taulaga

Tusia Sarafina Sanerivi ma Ilia Likou ,

130 Hits

Teleofa Pe’a Taulealeausumai.

Teleofa Pe’a Taulealeausumai.

O le talitonuga o le tinā i a Pe’a Taule’ale’ausumai 56 le matua o le soifua o Safune, ‘e sili atu le olaga i Apia nai lo Savai’i.’

Na ia fa’ailoa i le Fofoga o Samoa e fa’avae lona lagona pe a va’ai i le tele o kamupani tetele o lo’o i le taulaga i Apia aemaise le tulaga lelei o a’oa’oga o lo’o ua i ai.

“Ia e pei o lea le tulaga o lo’o ua i ai fo’i ma le tele o matagaluega a le malo , ma so’o se pisinisi o lo’o ua i le taulaga i le taimi lenei.

 “O lona lelei lea o le olaga o le taulaga i lo’u iloa i ai. 

“E pei o le isi tulaga  lea o le to’atele o nai o tagata ua o atu ma nonofo ai Upolu ona o le lalata atu ai i le tele o pisinisi ma maua ai avanoa lelei mo fanau i a’o’aoga.

 “Ia o iinei, ia a le aunoa ma le ma’umaga, ma se pisinisi ia e leiloa po o fea o le a maua mai ai se tupe e tausi ai le aiga.

Na ia ta’ua o le tele o le mamafa o le olaga fa’a-Samoa o lo’o tauaveina e’i latou o lo’o nonofo i afioaga ei lalo le fa’amalumaluga a matai.

 “Ia e pei o lea le mafua’aga ona e leai ni faiganu’u o fa’atinoina i le taulaga latou ia, e le pei o iinei ia ua loa ona silafia.

“E pei o le taulaga latou e le i ai ni saoga fa’amatai  ma nisi o saoga ua masani ai, ia ma e sili mamao le olaga iinei nai lo le taulaga.

 “Ia ma o lo’u iloa i ai ia e leai se mativa i Samoa, o le mativa latou ia ua matua’i leai lava se mea e pipi’i i le pa’u, leai ni ofu, lavalava, vaiinu ma mea’ai.

 “Ia e leai ni tagata i Savai’i ua leai ni fale e nonofo ai, o lo’o tofu tagata ma o latou aiga.

“Ae ui i le tele o fa’afitauli ae o lo’o solosolo lelei vaega uma lava.

© Samoa Observer 2016

Developed by Samoa Observer in Apia