Filifili Yen e ‘avea ma fai fa’ato’aga i le lumana’i

Tusia Vatapuia Maiava ma Ilia L Likou ,

156 Hits

Yen Chang (taumatau), 19 tausaga o Aleisa

Yen Chang (taumatau), 19 tausaga o Aleisa (Photo: Misiona Simo)

“O a’u ou te mana’o e avea a’u ma faifa’atoaga pe a ou matua” Yen Chang, 19 tausaga o Aleisa.

O le aso ananafi na maua ai le fa’atalatalanoaga  a le Fofoga o Samoa ma le ali’i talavou o Yen a’o ia fa’atauina atu i le mamalu o le atunu’u le tele o fua o fa’atoaga a se tasi o lona aiga i Lotopa.

O le taimi fo’i lenei, o lo’o ia galue ai  aua se tupe mo le tausiga ai o lona aiga.

“O le taimi lenei e $150 lo’u totogi e maua i le vaiaso.” o lana tala mai lea.

“O lo’u faigaluega ai ma ou va’ava’ai i fua o fa’a’ele’eleaga nei i aso uma o se fiafiaga tele mo a’u aua ua una’ia ai lo’u tagata e avea ma fai fa’ato’aga i le lumanai.

“O la’u ia molimau i ai, o le tupe lelei ia o le ‘au fai fa’ato’aga, a lelei lava le aso o le matua’i tele lava o le tupe maua.

“O  lo’u galue ai mo lo’u uncle e fa’atau fua o fa’ato’aga uma nei, ua ou ‘avea ma se miti ua ou momo’o i ai ina ia ‘avea ai a’u ma fai fa’ato’aga.

Na fa’ailoa e Yen i le Fofoga o Samoa e silia ma le $1,000 le tupe e mafai ona maua i fa’atauga o le vaiaso.

“O lo’o iloa ai i le taimi lenei a tele fa’atauga o le aso, e ono latalata le tupe maua i le $300 i le $400 i le aso.

“O le fa’ai’uga lava ia o le vaiaso, ia e silia ma le $500 le tupe e maua ai.

“O le fa’ato’aga i lo’u iloa i ai, o se galuega e foliga e le ano ai le to’atele , ae o se matuā fa’amanuiaga lava mo lo’u ia aiga i le lumana’i pe afai ae fai lava e a’u ia sa’u fa’ato’aga.

“Ou te fa’afetai fo’i i si o’u uncle aua e moni lava o lea e faigaluega ai, ae o lo’o tele se avanoa mo a’u ou te a’oa’o mai ai le tele o faiga mo le tōtōina ai o le anoano o le mau fuala’au ‘aina.

“O le itu pito sili lea ona taua mo a’u lava ia.

Na ia ta’ua o le taimi lenei e le’o i ai se manatu e toe fo’i i le aoga.

“E pei lava le tala masani, a ua fa’aletonu le aoga, ia fai le ma’umaga.

“E moni lava la e faigata ae ou te iloa a tago i ai e amata ona fai, ia e faigofie lava mea uma.

© Samoa Observer 2016

Developed by Samoa Observer in Apia