Tala mai le Kapeneta

14 August 2016, 12:00AM

1.  Tofia Faimalomatumua avea ma Komesina o Faigapalota

Ua faamaonia e le Kapeneta le tofia o le Afioga Faimalomatumua Mathew Lemisio e avea ma Komesina o Faigapalota mo le isi tolu tausaga. 

O lenei avanoa na faasalalauina muamua mo le silafia lautele, ma na o Faimalomatumua na tusi talosaga ane i ai. Na toe faasalalauina faalua, ae leai se tasi na toe tusi talosaga. 

O lea na valaau ai se faatalanoaga mo le avanoa e le Komiti Faapitoa mo le Afioga ia Faimalomatumua, ma na faavae i vaega tetele e fa i lalo o le Vaega 36 o le Tulafono o Galuega a le Malo 2004.

I le maea ai o le iloiloga a le Komiti, na tuuina mai ai loa le fautuaga mo le faia o le faaiuga a le Kapeneta.

O Faimalomatumua sa tauaveina tiute faakomesina talu mai ona avanoa lea tofiga. O ia o se Loia, ma e umia le faailoga Tikeri o Vaega Tau Tulafono mai le Iunivesite o le Pasefika i Saute. Sa aoaoina o ia i le Aoga Malisi i Mulivai, Kolisi o Sanele i Moamoa, Kolisi o Samoa ma le Kolisi o Sagato Ioane i Niu Sila.

Na amata galue Faimalomatumua i le Ofisa o Faigapalota mai le tausaga 2013 i le maea ai o lana tautua i le Faalapotopotoga o Malosiaga Faaeletise i le vaega o Tulafono mai le 2010. O le 2008 i le 2010 na galue ai i le Ofisa o le Loia Sili ma sa galue foi i le IRETA/USP i le 2004. Sa galue foi o se tusitala i le nusipepa o le Samoa Observer i le 2001 i le 2004 ma le nusipepa a le Savali i le tausaga 2000 ma le 2001.

O Faimalomatumua o le Sui Peresitene o le Nuanua o le Alofa ma o se sui foi o le Komiti o Taaloga a le kalapu a le Malisi.

O Faimalomatumua e mai afioaga o Alafua, Saleaaumua, Lotofaga, Nofoalii, Saleimoa ma Satupaitea. O ia o se sui o le Ekalesia Katoliko. Ua faaipoipo ma e toalua o laua alo. 

 

2.  Fesoasoani tupe $10,000.00 mo le Asosi Tenisi a Samoa

Ua faamaonia e le Kapeneta le tuuina atu o le fesoasoani tupe e $10,000.00 mo le Asosi Tenisi a Samoa e fesoasoani ai mo le taligamalo mo Taamilosaga Tenisi a le Pasefika faapea ma le auai atu i nisi o taamilosaga i atunuu i fafo.

O le taamilosaga a le Pasefika lea na auai mai ai Tahiti, Tonga, Rarotonga ma Amerika Samoa i le vaiaso ua mavae. 

O le a auai atu foi le au a Samoa i le taamilosaga tenisi a le Pasefika e faia i Lautoka i Fiti i le aso 15 - 24 Aukuso 2016 ma le Taamilosaga Tenisi Faavaomalo e faia i Vanuatu ia Tesema o le tausaga nei.

O le faamoemoe maualuga ia atinae atili le taaloga i totonu o Samoa aemaise i le tulaga o taaloga faavaomalo.

3. Tuuga fautasi mo le Faaaliga o le Teuila 2016

Ua faamaonia e le Kapeneta le faataunuuina o le tuuga fautasi mo le Faaaliga o le Teuila 2016.  O lea foi ua tatala le avanoa e tauva ai ni vaa mai Amerika Samoa i soo se fausaga o vaa ma foe.  E $150,000.00 ua fesoasoani mai ai le Pulega o Tupe Faavaomalo a Samoa mo le faatupeina o faailoga ma ua faaigoaina o le ‘SIFA Teuila Fautasi Challenge 2016’.

14 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>