Toe manatu tasi lava...Siaki Lelei Lou Fale-faigaluega (Vaega 2)

By Fa’aliliu e Maiava 14 July 2016, 12:00AM

Toe mafaufau tasi lava…Ona o le tele na’ua o o tatou taimi e fa’aalu i fale-faigaluega, e taua ai lava ona silasila toto’a i vaega fa’aletonu ua tatau ona amata suia ina ia fa’aleleia atili ai le soifua galue i totonu o galuega. Tatou taumafai e fa’amae’a le siaki lea na amata ananafi. 

O le vaega lona lima o fale-faigaluega le-manuia, o le “moe-galue”, tai pei fo’i o le moe-savali. O lo’o iai lou tino ae ‘ese le mea la e tafao ane ai lou fatu. Ua leai se fiafia, sola fo’i le naunau sa iai muamua ina ua fa’atoa amata i lau galuega o iai nei. Ua fa’asolo ina tele taimi e na o le nofonofo ma fa’asolo mafaufauga i le taimi o galuega, tele ina na o le talanoa i telefoni, le initaneti, alu i le potu e inu ai le ti po’o isi lava mea le-aoga. Ua matua leai atoa se fa’amoemoe e fia si’isi’i i luga i lau galuega.  

O le isi fa’ailoilo o se fale-faigaluega le-manuia, o le nofoaga lea e tele ina faitioina ai, fa’asea, ‘amusia ma fa’asalaina fo’i i latou e faigaluega malosi, fa’amaoni, vae-mo’emoe ma fa’atupu-manatu. Pe afai fo’i e te’ena ma fa’aleaogaina e lou pule po’o isi i luga atu o ‘Oe, ni au fautuaga mo le fa’aleleia o se mea.

O uiga masani lava ia o le “manatu fa’aPule, manatu fa’aTa’ita’i” e mana’o e taofiofia ai pea ‘Oe i lalo i le mea o lo’o e iai. E ui fo’i i le mana’o o le tagata-faigaluega e fa’alelei o se mea e aunoa ma le afaina o isi uso-a-faigaluega, ae le mananao ai lava ne’i manuia ma avea ma tulaga e atili lelei ai le pisinisi, talu ai lava le lotovale.

O aso uma lava la, ia nofouta lelei aua o lo’o to’atele le ‘au-Iuta, tagata le-fa’atuatuaina, tagata paie ma valea e manana’o e taofiofia ‘Oe mai le tulaga lelei o lo’o e fia ‘ausia. E fa’anoanoa ai lava, ona o le leai ose agaga lelei e una’ia ai ma fa’alelei le galuega, ma le-manana’o ina ia sili atu le isi tagata i lo latou.  

O le vaega mulimuli o le siaki, o lou fesili lea ia ‘Oe lava: O iai so’u aoga pe na o lo’u mana’o i tupe? A uma nei lo’u ola, sa iai se suiga lelei i le galuega sa ‘ou faia? Sa fa’aaoga tatau ‘ea lou malosi ma lo’u tagata atoa e faia ai se fesoasoani lelei mo lo’u aiga, nu’u, ekalesia ma le atunu’u? 

Manaia le aso, ae tatalo i Le e To’atasi na foa’ia mo ‘Oe le malosi e fa’atino ai mea uma ma fa’aaoga tatau ou malosi’aga mo Lona Mamalu ae maise se lelei mo isi tagata, e aofia ai ‘Oe lava.

E ta’ita’i ‘Oe e Iesu i se isi galuega; pe finagalo fo’i e te tumau pea i le galuega o iai nei. Manatua, e na o Ia lava e te maua ai Lona atamai moni, le malosi ma le alofa e fesoasoani e suia ai lou uso-a-faigaluega ma amata ai se suiga o lou si’osi’omaga manuia, saogalemu ma fiafia mo tagata uma. Toe mafaufau tasi lava… 

By Fa’aliliu e Maiava 14 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>