Samoa ne’i Galo Talau’u ma Tala o le Vavau a Samoa - O LE FAFĀ O SAUALI’I

694 Hits

E pei o se lamepa lotolotoi i le pogisa, ma o le a le-mate le susulu o lona malamalama e ofaga iai mafaufauga o tupulaga au i luma o Samoa

O nisi nei o Tala ua ‘oto mai le Tusi, Samoa Ne’i Galo (Volume 1) sa tu’ufa’atasia ma fa’amaumauina e le Matagaluega mo Tupulaga, Ta’aloga ma Aganu’u, ua ‘auina atu e lau Nusipepa, le Samoa Observer aua tupulaga ma le mamalu o le atunu’u e pei ona fa’ananau iai. O nei tala, o le a ‘auina atu i vaiaso ta’itasi.

Upu Tomua:

Ailoga e i ai se tulimanu o le Atu Samoa, mai Sasae e o’o atu i Sisifo, e le o gagana i le Fafa o Saualii. Ua mautinoa e leai se isi ogaeleele o laufanua o le atunuu ua taua o le Fafa ua na o le va lea o Tufutafoe ma Falealupo i le motu o Savaii. E amata i Saua [le vaega pito i sasae] seia pa’ia le Fafa o Saualii [le vaega pito i sisifo]

O le 1987, na to’ai atu ai se sailiiliga i le afioaga o Falealupo mo ni faamatalaga aua o nu’u ia ua ta’ua e i ai le Fafa. Toatele ni Tusitala ua maea suesuega ma ni tusitusiga e uiga i le Autu, peitai o le tele o mau e saga faatamaoaigaina ai manatu. 

O Mulinuu le tolotolo o i le va o Tufutafoe ma Falealupo. E faafeagai tonu i gatai o le siu o le tolotolo i le sami, o le Fafa lea o Sauali’i. Toetoe a faafeagai tonu fo’i le Fafa ma le mutaaga o le mea ua taua o le Pa Sopoia. O le talitonuga o le afioaga, o le ala lenei e afua mai Manua e pa’i i Falealupo e malaga ane ai sauali’i i le Fafa. 

I le ma lea, atonu poo le Fafa o se vaega eleele o Tufutafoe. E ui ina lautala Samoa o le Fafa e i Falealupo, o le a le avea lea taofi lautele o le atunuu e suia ai upu taoto ma faavae o tuaoi o nu’u o le Atu Samoa. Sei asiasi atu i ai ni faamatalaga e uiga i le ulutala “LE FAFA O SAUALI’I”

 

O LE TALA

“Ao le Tama a Moso ina gogolo atu ia i le Fafa” E leai se isi vaega o laufanua o Samoa e ta’ua o le Fafa, sei vagana ai le vaega eleele pei ona taua i le faatomuaga o lenei tala. O le va o Falealupo ma Tufutafoe o i ai le tolotolo o Mulinuu ma e feagai tonu lea i tai ma le Fafa.

O le mau a ia afioaga, e lua loto poop u ma o le ala lea o le tasi ta’u, o lualoto. O le loto o loo i le aloalo pe tu lata i le matafaga faapea o le loto lea mo tamalii ao le loto i le moana o le loto lena mo tagata lautele.

Pei o se tasi lea o vavau e talitonu tagata Samoa, a oti le tagata ona malaga lea o le agaga i le Fafa poo lualoto, ma o le faitotoa lea e ulufale ai i le mea ua igoa o Pulotu.  Sa faamaonia i le vaai le mau a le afioaga, masalo na pogai le igoa Fafa, aua o le fafati mai o peau ma le suasami e gogolo ma faaifo uma i le loto o i gatai, e le toe mapuna ae i luga a ua mou atu lava ma le toe alu a’e i le fogatai.

Se tasi uiga o le upu fafa o le pu poo le to fo’i, e le taumate la se loloto i lalo fua i le le toe manu ae le suasami i luga. E foliga fo’i lenei mea o ni au vivili o le moana sausau ma e le iloa lava poo fea e tau i ai. 

Ua foliga tutusa le finagalo faaalia o nisi o tamalii ma failauga o Falealupo ma tusitusiga a le tele o Tusitala o le Fafa o le faitotoa lea e ulufale atu ai agaga o e ua oti i le nu’u o aitu o Pulotu lea. Tusa poo le aoteatea e te savalia ai le tolotolo o Mulinuu e lagona i tino le pau e ta’aligoligoa ma mogea fo’i ou tino. O le faailoga lea e moni ai se manatu, o le ogaeleele lava o loo gasolo i ai agaga o e ua feoti ma ua taasaualii ai lea laueleele. 

O le molimau a lea afioaga, e lei nofoia lava e nisi lea ogaeleele pet u lata atu fo’i i ai ni fale ona o le talitonuga o le nofoaga lava o loo ‘aina e sauali’i i aso uma, ao ma le po. O loo taua e nisi tusitala o loo iai le tolotolo i le itu i sisifo o Upolu ua igoa o le ‘FATU’.

E faapea o le mea lea e feosofi ifo ai agaga o e ua oti i lea vaega o Samoa, ona feausi lea agai i le Fafa. Pe a tuumalo se tamalii e le feausi lona agaga ae momoli e vaa o sauali’i ua igoa o Vaaloa ma malaga atu i le Fafa. 

E faafeagai tonu fo’i le muta’aga o le mea ua taua o le Pa Sopoia ma le agai lea i tai i le Fafa. Fai mai le tala, o le auala lea e afua mai Manu’a, e ae i mauga, ifo vanu ma faasolo atu ai i le moana loloto, ma faatutu atu lava i le Fafa o Sauali’i. Afai e folau i le sami, e ‘alo’alo mamao ese ni vaa ma le Fafa nei apoia e au vivili ma miti’ia atu i le loto. 

Sa taua e tamalii ma failauga o tautai fagogota i le po, latou te faalogo i nisi i’uleo lelea mamao i le gataifale, o leo o pesega, tata ai kitara ma ukulele, e fetagisi ma laue nisi, atoa ma leo vavao. E le gata i le lagona o leo, leo o le fiafia ma i’uleo o le faanoanoa ae faapena ona sasala o manogi eseese o fugalaau o le vao, pe le taumate o ni faasolo ma tauseisei a sauali’i. O se tasi taofi, faapea o Pulotu o loo i le Atu Sasae o Samoa e feagai lea ma Manu’a.

Peiseai e moni fo’i lea manatu ona o le taua i le va o tagata o Papatea ma Pulotu lea na tulia ai tagata Papatea e toa o Pulotu, e i ai toa e toalua o Utuma ma Utumou’u. A liliu fo’i i le mea tonu na taunuu i ai Nafanua o le pito lea i sisifo o Falealupo ma ua ta’ua lea ogaeleele o Taliifiti, ona moni ai lea o le taofi, o le Fafa o le faitotoa lea e ulufale atu ai Aitu i Pulotu. Ua le gata i finagalo faaalia o le afioaga e ou ia Vavau, ae o se taofi fo’i lea o nisi Tusitala faapea, e i ai Aitu e leoina le Fafa mo le ulu atu i Pulotu.

O Leosia le isi a o Sisiolefafa fo’i le tasi. O se mau e faapea na usu le aitu mai Safata i Upolu e igoa ia To’uto’u ia Sisiolefafa ona i ai lea o le tagata itu sauali’i e igoa ia Tualemoso, ma na tupuga mai ai le tagata o Lufasiaitu.  “Ao le tama a Moso, ina gogolo ifo ia i le Fafa”, o loo fai ma auau lea upu i le amataga o le tala, e faamanino atili ai uiga o le upu Fafa. O le aga faa-Samoa, e masani ona peiseai e ‘ote le matua pe a faalogogata le fanau, ona fai lea ma agana i lena fuaitau o loo taua i luga.

O lona uiga, ua loto le usitai le tama poo le teine fo’i ua amio malosi. Afai la ina gogolo ifo i le fafa, o le a mou atu ma le toe vaaia, ailoga e moni ia lagona o se matua i le fanau. Pe fia ‘ai so’o le tama poo le teine ona faapea ane lea, “paga oe ua faafafaina”.

Ua leai ma se isi vaipanoa o Samoa e faaaoga i ai le upu fafa, na o lea o loo i le va o Falealupo ma Tufutafoe i le faatausiusiuga o le motu o Savaii. E i ai fo’i le talitonuga faa-Samoa o sauali’i poo aitu o loo mio solo i le fogaeleele, e o mai lava i le Fafa, le faitotoa i Pulotu le nu’u o agaga o tagata pe a oti. E pepese ma lagi fatuga anamua nisi, i le Fafa o Sauali’i. 

MANATU FAAOPOOPO:

1. Ua anamua su’esu’ega a Tusitala e uiga i le Fafa o loo ua maea ona faamatalaina. Na sailia fo’i e C.Stuebel ma ia taua ai “Tala o le Vavau”, e moni o lea mea e i Falealupo. O lualoto, e mo tamalii le isi ae mo tufanua le tasi poo tagata lautele fo’i. O papa tetele o loo faamalumalu agai ane i le loto ‘Fafa’, o ala ia o Aitu o Upolu ma aitu o Savaii, tasi lea mau. A o’o ina a goto le la, e lafoia lona ataata i tafatafa ane o le fafa ma foliga ai e lanuauro.

E matua manino le vaai i le la pe a tietie i luga tonu o le sami, i le mamao i tafatafailagi. O le muagagana fo’i, le tama e, ina gogolo atu ia i le mea e goto iai le la. Le ala lea e fai mai ai upu a Samoa, o Falealupo e goto i ai le la. 

2. O le taofi o Even Huvdhaugen le alii Tusitala e uiga tutusa ma se vaega o lenei tusitusiga. O Pulotu e i le atu sasae o Samoa, lea na tau ona tagata ma Papatea. 

3. E logo i tino fo’i le mau a Gatoloai Peseta Sio, “Tapasa o Folauga i Aso Afa”. O loo ia faamatalaina ai uiga o le upu Fafa, peiseai o auvivili, o le vasa poo auvivili o lualoto o le Vasa. Ua faamaonia atili, e le o ni upu fatu, ao mea moni e o’o mai i le aso. Tagai i le ata o le fogatai ma le fefatia’i o peau agai i le fafa. E leai se tasi na te fia agaaga pe ulaula i lea mea o le fafa, aua o le nofoaga lava o sauali’i. 

Manatua o le tama’ita’i ta’uta’ua o Nafanua sa nonofo ma ona matua i Pulotu, ae na faalogo i le mapuea a Tai’i i Falealupo, ona auina ane ai loa lea e Saveasiuleo lona tama, e laga le pologa o lona nu’u o Falealupo. 

4. Ua ta’ua Nafanua ma ona matua ina ia faamautuina le manatu i le fafa faapea ma Pulotu, aua sa latou mau i Pulotu. E tele Tusitala ua faia nisi taofi mautinoa faapea o le nu’u o Aitu, Pulotu o loo i se isi vaega o le Vasa Pasefika. Atonu e taotasi manatu o Samoa e felata’i le Fafa ma Pulotu, ona o le ala lea e o ai agaga o e feoti i se nu’u e le iloa e se tasi. 

5. Sa naunau lava it ala moni ma o le mea fo’i lea ua faafetaia ai nisi o le mamalu o tamalii ma failauga o Falealupo. O nei tusitusiga e talosia ia faagae’etia ai ni lagona ma’ema’e o tupulaga au i luma o Samoa pei o se lamepa i se pogisa ina le mou atu Talatuu ma Tala o le Vavau. E avea fo’i ma faavae e momoli atu ai gagana loloto o le fetalaiga ma le saunoaga ma ia tumau pea Samoa i ana tu ma aganuu. 

UIGA O UPU: Faaaogaina faatatau i le faaaogaina i le Tala. 

‘aina – nofoia, mau ai, nonofo ai

‘au’au – faapogai, autu, ‘auga, faatumutumuga

Afua – amata, mafua mai, pogai mai ai, 

Le lau nu’u – le lau maua, le tutusa, seasea, iloga 

Uputu’u – upu faavae , tala tausi, upu mai anamua 

Usu – faiava, faaipoipo, avea ma toalua 

Faautaga – manatu o tulafale, finagalo faaali o tulafale

Fafa – lualoto, pu, lualoto i le sami, to maualalo

Fatu – tolotolo, Fatuosofia le pito sisifo o Upolu 

Fatuga – ituaiga o fati o pese, faiga o pese i ona leo

Gogolo – goto ifo, magoto ifo, solo ifo, maui i lalo 

Lagi – pese, pepese, usuina o pese, pepeseina

Lotoifale – faatatau tonu, faapitoa tonu i se mea

Lualoto – lua, pu, fafa, loto po o to maualalo

Maemae – sogasoga, filiga, tauivi, taumafai

Manu – ea i luga, aliali a’e, iloa, vaaia

Measina – mea taua, mea faapelepele, teuina lelei 

Sausau – sami loloto, vasa loloto 

Mogea – maniti tino, fefe, mata’u ma popole 

Saua – atu Samoa i Sasae, Manu’a 

Tiu – pale ai, mitamita ai ma sagisagi 

Tofa – manatu o tamalii, finagalo o tamatalii 

Vaaloa – vaa o sauali’i, vaa o Aitu, vaa uumi 

MUAGAGANA:

1. “Ina gogolo ifo ia i le Fafa”

a) upu ita, upu ‘ote ma le le malie 

e) upu uiga fetu’u, ua faafoliga e malaia pe leai ai, ae le moni i le lagona aemaise matua i fanau 

2. “Ua faafafaina”

a) se tagata e taumafa soo, toetoe o taimi uma

e) faatatau i le mana’o tele, faaloloto

i) o le tagata uiga matape’ape’a 

FA’AMATALAINA:

O le mamalu i nisi o tamalii ma failauga o le nu’u o Falealupo, Afioga ia Auvaa, Seumanutafa, Gisa ma le mamalu o nisi o le afioaga.

 

© Samoa Observer 2016

Developed by Samoa Observer in Apia