Ioe Alatasi Tupou i ona moliaga

14 June 2018, 12:00AM

O le kapeteni o le Manu Samoa Ta’ito’afitu, Alatasi Tupou ua ia ioeina moliaga o loo fa’asaga ia te ia i le Fa’amasinoga Fa’aitumalo.

O le taimi nei o lo’o fa’amalolo ai nei lenei taule’ale’a mai le au, ma e lua moliaga o lo’o fa’asaga ia te ia.

O nei moliaga e lua e aofia ai le ave ta’avale onā, ma le moliaga e tasi o le ave ta’avale e aunoa ma se laisene.

O le ioeina e lea taule’ale’a o ona moliaga sa tu’uina atu i luma o le tama’itai fa’amasino o Alalatoa Rosella Papalii e lana loia o Donald Kerkslake.

E tusa au ma taualumaga o le faamasinoga i le Aso Lua sa faapea ona faaalia ai foi e le tamaitai loia o loo tulai mo le itu o leoleo, Vaisala Afoa e faapea o loo iai foi se tusi saisai o loo iai e faasaga i lea alii, i se isi foi mataupu e ese mai lea mataupu.

Ae na faaalia e Kerslake, o le moliaga o le fa’ao’olima o lea mataupu sa tulai mai i le tausaga e 2016.

“E tusa ai ma le fa’amatalaga lau afioga i lenei mataupu, o le moliaga lea o le fa’ao’olima sa tula’i mai i le tausaga e 2016 ma o se mataupu sa tulai mai i totonu o lona aiga.

“O lenei mataupu sa tula’i mai a’o le’i malaga atu o ia i Amerika i lana konekarate.

“O lea e tuuina atu ai i lau afioga pe mafai ona faia le fa’aiuga o mataupu nei e lua mai le vaega o ta’avale afi ae o le a toe logoina lau afioga pe a toe maua nisi fa’amatalaga i le mataupu lea o le fa’aoolima.

“Talosagaina foil au afioga pe mafai ona faataatia ese tusi saisai o loo faasaga i le taulealea ma sei tuuina mai nisi faamatalaga o lea mataupu.”

Sa taliaina e le tamaitai faamasino ia Alalatoa le talosaga a le loia Alatasi ma ua faataatia ese nei tusi saisai o loo faasaga i lea alii ae o loo mataupu i le moliaga o le faaoolima ua tuuina atu nei i le Faamasinoga o Aiga.

O le a valaauina lea mataupu i le Aso Gafua o le vaiaso fou ma ua faatonuina ai lea alii e toe oo atu i le faamasinoga i le vaiaso foi.

O le aso 22 Iuni o le a faia ai le faaiuga a le faamasinoga i moliaga e lua lea ma molia mai ai e le vaega o taavale afi.

O le vaiaso na tea nei sa faailoa mai ai e le Iuni Lakapi a Samoa le faamalolo ai o Alatasi mo le lua vaiaso e le mafai ona taalo ai i taamilosaga mulimuli o le taitoa fitu.

O lenei faamalologa e lei aafia ai le taamilosaga o le Ipu o le lalolagi lea o le a faatautaia i San Francisco.

Sa toe faafoi mai Alatasi mai Lonatona e le Iuni Lakapi a Samoa e tusa ai ma tuuaiga sa tuuaia ai o ia.

14 June 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>