Taula’i le va’ai a le Manu ia Fiti

Tusia Ilia L. Likou ma Fa’aliliu e Maiava ,

143 Hits

Oneone Faafou in action for Samoa during the rugby union test match between Manu Samoa and Georgia, at Apia Park, Samoa, on Saturday 11th June 2016. Photo: ©Renee McKay/SRU

Oneone Faafou in action for Samoa during the rugby union test match between Manu Samoa and Georgia, at Apia Park, Samoa, on Saturday 11th June 2016. Photo: ©Renee McKay/SRU

Ua teteva atu Georgia, a ua taula’i nei le va’ai a le Manu Samoa ia Fiti, mo le ulua’i ta’aloga o le Ta’amilosaga o le Ipu a le Pasefika lea e amata i le fa’ai’uga o le vaiaso nei. 

E iai le manatu o le a tele ni suiga fou o le Manu Samoa mai le vaiaso talu ai, i le ‘Au o le a feto’ai ma le Tama-saoasaoa a Fiti i o latou ‘ele’ele.

Ae moni ai, fa’afetai ua tutusa le ta’aloga, e ta’i 19 ‘ai ma le ‘Au-finau a Georgia i le Apia Park i le Aso To’ona’i.    

Na ta’utino lava e le Faia’oga o Namulau’ulu Alama Ieremia fa’apea le Kapeteni o David Lemi, e fa’afetai ona sa tutusa. Na ta’utino lava fo’i e la’ua uma, sa tatau ona sili atu sa latou taumafaiga talu ai, ma ua fa’ananau ai ina ia matua galulue e fa’alelei atili vaega masani o le ta’aloga a’o le’i feiloa’i ma Fiti. 

Ioe, e mautinoa lava e le faigofie tama a Bainimarama i le taimi nei ae maise, o latou lea e tau-malae ma o le a faigata ai fitifiti le ta’aloga ma Samoa. 

O le vaiaso talu ai, na sikoa ai le Numera 8 a Fiti, o Eremasi Radrodro, le sikoa na manumalo ai ia Tonga ma taualuga ai le finau-maua’i mai tua, a’o sili pea ‘ai o Tonga i le tele o le ta’aloga. 

Na fesiligia e sui o le Nusipepa o le Fiji Sun le ali’i 28 tausaga mo sona finagalo, ae tali Eremasi, e tatau ona si’itia tulaga o lana ta’alo i le fa’ai’uga o le vaiaso nei, i le fetauiga ma Samoa.    

 “Ua tele lava nai a’oga lelei na maua mai tama-matutua o le ‘au,” o lana fa’aaliga lea. 

“Ia te a’u lava ia, o le a taumafai e fa’aleleia nisi o vaega e vaivai ai a’o le’i o’o i le ta’aloga.

“O le isi o’u vaivaiga i le aso, o la’u pu’e ma le puipui a o le talanoa so’o mai o tama-matutua o le ‘au i le tulaga lena, ua tele ai se a’oga lelei mo mea e ao ona ‘ou fa’atino ma o le a taumafai lava e fa’atino i le ta’aloga o soso’o nei.” 

O le aso e tu’ua ai e le Manu Samoa ona ‘ele’ele mo Fiti.

Sa faia a latou koleniga ma tapenaga mulimuli i le Kolisi o Sagato Iosefo i le afiafi ananafi.

© Samoa Observer 2016

Developed by Samoa Observer in Apia