O la’u tala fo’i

116 Hits

1. Matauina i Tala Fou ananafi se ulutala fai mai ua osofa’ia e le Palemia le Samoa Observer ona “manatu o le faatonu”- fai mai  o mea lava e “nonofo latou ma faatupu, faalumaluma ma e faapito-tasi…”

Fai mai la o ia Manatu o le Faatonu i le va o le Aso Tofi 26 o Me ma le Aso Gafua 30 o Me, ua matua pupuna ai le ita o le Palemia-lea na tali mai i ai-e ala i lona osofa’ia o i latou o loo tusia “Manatu o le Faatonu” o le Samoa Observer fai mai e faalumaluma ma e faapito tasi…….o manatu lava e nonofo ma fai!

Ae peitai-fai mai le Samoa Observer-o ‘manatu o le faatonu’ ia o loo faaseā ai Tuilaepa-“e na o le mea moni lava o loo auina atu ai.”

O le le fiafia o le Palemia -ua matua manino mai e tusa ai ma ana tali i le faagasologa o le talanoaga ma le Nusipepa o le Savali i le vaiaso talu ai-o se faamatalaga autu lea na auina mai i le Samoa Observer e le Sui Failautusi o Nusipepa o Renate Rivers-lea na lomia e le Samoa Observer- i le upu i le upu- e pei ona tusia ai.

E aliali mai la-o le le fiafia o le Palemia ona o fesili na tuuina atu ia te ia! Afai la o lena le pogai-o le fesili la-“o le a le aoga o nei upu o le  “faimea tonu-“mautali atu” ma  “faigamalo lelei”?

O lona uiga la-afai o faavae tonu ia o faigamalo faa-temokalasi-o lona uiga la-“poo le Palemia poo ai lava-ae a fesiligia loa e le atunuu se mataupu e fia malamalama ai pe moni pe leai-o le tofi la o le Palemia ma soo se ta’ita’i laa o le atunuu –o le tali lelei mai- ma ia faamalamalama mai i le atunuu mea uma-ae le o le faailoa mai o lona ita-aua e le o se Malo o lona Itumalo Faafaipule-o le Malo o Samoa atoa-ma o le atunuu atoa fo’i- e filifilia ta’ita’i uma o le Malo o Samoa! O le a la sou taofi? 

2. Matauina foi i Tala Fou-o lea foi ua toe lavevea isi taavale i Vailoa-ma fai mai na manunu’a ai nisi ma na auina atu faanatinati i le Falema’i mo ni togafitiga-ma e le o mautinoa le tulaga ua o’o i ai i la’ua i le taimi nei.

O le molimau a tagata na vaati tino i le pogai o lea faalavelave-o le saoasaoa-O lona uiga la-o lea sa fai le tuuga-taavale poo le taavale a ai e saosaoa.

O le popolega la ua tulai mai-afai la o le faiga lenei o le a i ai-o le sailia lea poo le taavale a ai e sili ona saosaoa i lenei auala-a faapefea la tagata e le o fia auai i ia tuuga-taavale? O lona uiga la- e fai tuuga taavale a isi taavale- ae oti atu ai ma tagata e le o fia tutu’u taavale!

Afai la ua tupu soo lenei tulaga i lea lava vaega o ala tetele mo femalagaiga-o ai tonu lava e gafa ma le tineia o lenei faafitauli ona o le manumanu i soifua e le sala- ia o le a aafia ai fua!

Afai ua le o iloa tonu pe o le LTA poo ai lava e tatau ona tuu i ai lenei matafaioi ina ia mafai ona fo’ia nei loa lava-o le a tuu ai lava faapea ae i’u ina aafia ai foi ma i tatou!

Afai e le o kea tagata avetaavale i Leoleo a le LTA pe afai o loo latou leoleoina nei auala i le ao ma le po-ua tatau loa ona ave le faamuamua a le Malo i lenei faafitauli leaga e aafia ai soifua lautele o le atunuu -e le o auai i ni tuuga-taavale. O le a la le pogai e le toe faatoatele ai le aufaigaluega a le Ofisa o Leoleo-ina ia mafai ai ona latou faatinoina lea tiute?

A vaai mai le tagata Samoa o le Leoleo lea e tu atu-ona fefe lea-ae afai e le o se Leoleo-o lona uiga-e leai se isi e fefe ai! O le a sou taofi?

3. Matauina ma le fiafia le ki atu o le Televise i le taeao-o fai mai le sauniga-lotu-e pei lava o le olaga masani o Samoa.

O ia sauniga-lotu o Faafeagaiga Taulagi ma latou ‘aulotu-ma o se mea lea ua fiafia ai le agaga-ona o lea lava e atagia mai-o loo fai lava le mea masani a Samoa o le faamuamua o le lotu i le Atua i le taeao-ma le afiafi- ona soso’o ai lea ma isi lava mea.

O isi foi fale televise –ua na o le anoano lava o tagata Papalagi e pepese mai  ma sisi’i o latou lima i pese masani faa-Papalagi-toetoe lava o aso uma e usu mai ai lava nei pese!

Ia atonu e eseese lava tofo a le tagata-ae faafetai o lea ua i ai fale Televise a isi Ekalesia- ua mafai ona lolotu ai aiga pe a leai se latou lotu taeao-ia poo le to’atele foi o le aiga ua o atu i galuega o le aso!

Ae poo le a lava-o le upu lava  a le atunuu fai mai-“E muamua lava mea i Matautu-Sa”-o lona uiga-e muamua le mea e tatau ona muamua. Afai la o le Atua o loo faavae ai Samoa-e leai se isi faamuamua e sili atu i le faamuamua o le Atua-ae sili ai pe afai e avea lena ma faavae o upu uma tatou te tautala atu-ma galuega tatou te faia! O le a sou taofi?

© Samoa Observer 2016

Developed by Samoa Observer in Apia