O le aiga fiafia le meaalofa sili

By Aruna Lolani 14 May 2017, 12:00AM

Pau lava le tulaga muamua e viia ai le Ali’i ua o’o i le Aso Sa o Tinā o le ola ma le malosi. 

O lea le manatu fa’alia o Manino Malu mai le afioaga o Faleasi’u i le maua ia o le la fa’atalatalanoaga ma le Fofoga o Samoa le aso ananafi. 

“E pei ona lua tagatagaa’i mai, o lo’o fa’atau lava le kofe ma isi tulaga ia ina ia maua ai se seleni,” o lana lea tala i le Fofoga o Samoa. 

“E mana’omia lava le tupe e fa’atau ai se mea’ai aua foi le to’ona’i taeao." 

“O le ala ga tupe lava ia e fa’amoemoe lava i i’a mai le sami, ia ae talu ai ua leaga le tau, ia e le mafai foi ona tu’u atu le tamā le aiga e alu e fagota ona o lenei e leaga tulaga i le tau." 

O Manino e to’a fa le fanau, ma e leai lava se faitio o le tinā pe a galue aua o le lana galuega tele e fesoasoani malosi i le tamā le aiga i mea’ai ma tulaga tau aiga. 

“Ia o a’u lava ia, e leai so’u naunauta'iga ou te naunau e fa’atau ni tulaga ou te le gafatia."

“Pei fo'i ona ou fa’apea atu, o a’u ia e leai so’u naunau i se ofu fou pau lava le tulaga taua ia te a’u ia iai se mea’ai mo le to’ona’i taeao pau lea." 

“Aua o le tulaga lava ia, tusa pe ofu se ofu fou pe se ofu tuai foi, o le tali lava o le auga o le aso sā o tinā e fa’ataua lava lou tinā ma lo’u tinā e le taua i laei ma ni ofu." 

“Ia te a’u lava ia, o le aso sā o tinā e fa’atasi ai ma fiafia fa’atasi ma le fanau aua fo'i tau te leiloa lava le isi aso ma ona tauālumaga." 

“Ia te a’u lava ia, pau lava le meaalofa sili o lo’o o’u naunau  ai le Aso Sā o Tinā o la’u fanau ina ia usiusita’i, fa’alogo ma fa’amāmā avega mai i le galuega fai o lo’o fai nei e matou matuā." 

“Ou te tatalo foi mo tinā uma o Samoa ae maise o le lalolagi atoa ina ia maua le malosi e tau'ave ai tiute i totonu o Aiga, Nu’u ma Ekalesi, ma fa’afua loa soifua aua mafutaga ma aiga ae maise lava e e pele ia te'i latou."

By Aruna Lolani 14 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>