Faatonu e le Palemia Avele ina ia tuuina atu se ta’utinoga

By Lanuola Tusani Tupufia 14 May 2016, 12:00AM

Ua tāpā e le Palemia o Tuilaepa Sa’ilele Malielegaoi se ta’utinoga mai le Kolisi o Avele e faapea o le a le toe tupu mai ni amioga mataga e pei ona faaalia e nisi o a latou tamaiti a’oga- ma o le a le toe faia. 

O se tasi lea o mana’oga na faamamafa ananafi e faapea afai ae toe tatala le a’oga i le faagasologa o se fono i le va o matua, faia’oga ma Tuilaepa.

E tusa ai ma le Palemia o Tuilaepa-se’ia vagana ai ua mafai e le Kolisi o Avele ona faamaonia e faapea o le a sui le amio a tamaiti a’oga-e ono mafai ona tapunia tumau lea a’oga.

O lea fono na usuia a’o tapunia pea le a’oga-ina ia faatagaina ai leoleo e faia se suesuega i se faamata’u tau le fasiotia-e pei ona tuua’ia-na fai e tamaiti a’oga i luga o fesootaiga lautele ia na faamata’u ai le saogalemua o tagata lautele ma isi lava kolisi. 

E sili atu i lo le luasefulu matua, faia’oga ma tama a’oga tuai sa auai i lea fono ananafi.. I sana faaaliga i nusipepa mulimuli ane ai, fai mai Tuilaepa ua uma ona ia talosagaina tamaiti a’oga tuai o Avele ma faia’oga ina ia saunia ma saini se fuafuaga e faamanino ai lo latou maliega.

“Ua uma ona matou feiloa’i ma o le a latou tapenaina se maliega lea latou te talitonu –o le a le toe faia ai nisi fusuaga-e saini e tama a’oga tuai ma matua,” o lana faaaliga lea.

“O lena maliega faatasi ai ma le lipoti e leoleo, ona matou talanoa ai lea ma fai se faaiuga pe tatau ona toe tatala le aoga pe leai. “Afai e tapuni (tumau) o lona uiga-o le a a’o’oga tama ma teine i isi kolisi e aupito i latalata i o latou aiga e faaauau ai a latou a’oga.

Afai e toe tatala, o le tatalaga mulimuli lava lea.”Na toe ta’ua e Tuilaepa e faapea o le ta’utinoga mai le aoga, matua ma faia’oga e tatau ona mautu ma faamaoni. “Afai e tupu mai soo se isi lava mea-o lona uiga-o le muta’aga lena.”

Na faafetaia foi e le Palemia matua ia sa auai i le fono ananafi

Fai mai a ia e o’o lava ia te ia ua na iloa le tiga talu ai “e tofu i tatou uma ma fanau.” E ono fai e le Kapeneta se faaiuga i le Aso Lua o muamua.” Ae peitai-i mataupu e tatau ona e faia ai se faaiuga, e le mafai ona e tilotilo i lou itu taumatau poo lou itu tauagavale,” o le faaaliga lea a Tuilaepa. 

O nisi faamatalaga o lea fono o le a tuuina atu i le lomiga o taeao.

By Lanuola Tusani Tupufia 14 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>