TALA OLE MAFUA’AGA OLE TUIATUA FA’ANOFONOFO

647 Hits

(Ole tasi nei o taofi)

Usu #29 Tuiatua Polailevao ia Momoeifuifatu le afafine o Pa’u i Safotulafai faaee le gafa o #30 Tuiatua Fotu’itama’i.

Ona tau loa lea o taua i le tuaoi o Atua, ua to’a fa Tuiatua: #31 Tuiatua Toeta, #32 Tuiatua Samo, #33 Tuiatua Leteleipesega #34 Tuiatua Vaiotui, lea e i ai alaga’upu e fa’apea isi: “O Atua Le Tonu”, ” O Atua Le Faiga”, “O Atua Le Auliuli”.

Sa autasi le Tuiatua i le Paepae o Mailei i Aleipata, i le pule a Leifi ma Tautolo. Ona o’o mai lea i le nofo a Tuiatua Fotu’itama’i, ona aumoe ai lea o Tuiatua Fotu’itama’i i le Ao ole Tuiatua, o tagata ma lauele’ele o Aleipata, ona o le fia fai’ava i le tama’ita’i o Leteleipesega le alo o Mata’afa Laululoloa i Faleata.

Na Tuiatua uma alo o Mata’afa Laululoloa, o le tama’ita’i o Leteleipesega ma ona tuagane o Toeta, Samo ma Vaeotui. O Tuiatua ia e fa i Faleata i lea lava taimi. O TUIATUA TOETA na mana’o e fai lona FUSI i SATAOA i Safata.

O Aleipata na o latou faia lea Fusi, e pei ona mana’o i ai Tuiatua Toeta. O le pine lena e fa’amaonia ai le pule a Faleata i le Ao ole Tuiatua, o tagata ma lauele’ele o Aleipata. Ona mana’o mai fo’i lea o TUIATUA SAMO ia fai lona TIA I LEFATU, e tu ai ma maimoa i le laulelei o Amoa.

Ona o mai lea o tagata mai Aleipata ma la’u mai ma’a, e fai ai le Tia o Tuiatua Samo i Lefatu. O lo’o i ai pea ma’a o lea Ti’a i le tolotolo i Lefatu. O ma’a o lenei Tia, e la’u mai Aleipata. E tau amo mai i ua ma’a. Ona o’o mai lea o le amoga ma’a i gauta o Aufaga, ona isa ai lea ele lo’omatua Aufaga, Isa!

E leai ni ga’au o nei mea. Ona lafo ai lea o le amoga ma’a a Aleipata, ona fa’aigoa ai lea o lena ele’ele i gauta o Aufaga o “LAFOGAMA’A”, o lo’o iai lava ma’a i lea ele’ele e o’o mai i aso nei. Ona toe fo’i lea o Leifi ma Tautolo ma Aleipata i Aleipata.

Ona taunu’u lea i Aleipata o Leifi ma Tautolo fono loa, o le a si’i le taua i Faleata. Ona maua lea o le finagalo o Leifi ma Tautolo, o le a logo uso. O upu o Atua o Leifi ma Tautolo o Ao ia o Atua, a’o Falefa o uso o Atua, o Falealili o i’u o Atua.

O le mea lea na autasi ai Leifi ma Tautolo ma Aleipata, o le a logo uso, ma i’u o Atua ae si’i le taua i Faleata e toe fia maua mai le Ao ole Tuiatua. Ona malaga lea o Leifi, Tautolo, ma Aleipata e logo uso. Ae te’ena e Falefa, ona toe Malaga ai lea e logo I’u, ae te’ena fo’i e Falealili.

O lenei Malaga e alu ma usu la latou pese e fa’apea; Sia-sia-umue! Sia-sia-tu! Ua taunu’u atu i Sapo’e i Falealili le malaga o usu pea la latou pese, ona tali a’e lea ole tagata i Sapo’e, Sia-sia-tau! Ua tilotilo atu i ai Aleipata i le fale o sau ai le vala’au, e leai se tagata oi i ai. 

Ua nofo le tulafale Sapo’e o Letoga le igoa, ua avane le launiu ua fili fa’atasi ai ia ma le pou o le fale. O le mafua’aga lea o lo’o i ai le upu e fai i lea tulafale “O LETOGA-LE-FAI-ALAGA” e o’o mai i aso nei. O na sau lava lea o le solo ua toe fo’i i Aleipata, ma usu mai la latou pese Sia-sia-umue, Sia-sia-tu se’ia o’o mai i VAIPALOA i Sasa’e o MATA’TUFU.

O i ai le tagata e igoa ia FALEPUAVAVE, o usu pea la latou pese, Sia-Sia-umue! Sia-Sia-tu! Ona tali atu lea o Falepuavave, Sia-sia-tau! Ona afe ai lea o Leifi ma Tautolo ma Aleipata, i le fale o Falepuavave. Ona sau ai lea o le tulafale o Letoga i Sapo’e ma lona ava e tuli loa mai Leifi ma Tautolo ma Aleipata, E taunu’u mai Letoga i Vaipaloa ua talia e Falepuavave le mana’o o Leifi ma Tautolo.

Ona palasi ai lea o Letoga ma tu’itu’i lona ava, o lo’o igoa ai lenei ele’ele o “TU’IGA’AVA”. Ona fa’apea atu lea o Falepuavave ia Leifi ma Tautolo, O! ina fola lo lua fale i le Paepae o Mailei, ona lua fo’i mai lea, si’i le taua i Faleata.

Ua lagna e Falepuavave ua lalata mai ‘au a Tuiatua Vaeotui. Ae ua le alu Leifi e fola lo laua fala i le Paepae o Mailei, e tusa o le fa’atonu a Falepuavave. Ua fa’apea atu Leifi ia Falepuavave, o ia ua ma’i mata.

Ona fa’apea atu lea o Falepuavave i le aualuma e o ane, e fai lo latou poula ma Leifi. Ona sola loa lea o Falepuavave e fa’afetaia’i au a Faleata. Ona fetaia’i lea o Falepuavave ma ‘au a Faleata i le VAITELE i gauta o LOTOFAGA ua igoa ai i aso nei. Ona tau ai lea o lo latou taua. 

Ua te’ena lava ‘au a Faleata, se’ia la’asia le tasi vai. Ona iloa atu lea e Falepuavave o le fata, o tu ai i luga Tuiatua Vaeotui. Ona a’e lea i ai o FALEPUAVAVE ma ua ia sala le Ao o TUIATUA VAEOTUI, ua alu ifo ma ia i lalo.

E tu ifo loa Falepuavave i le ele’ele ae fa’alogoina loa le gasese o le vai, ose tagata o loo asa i le vai. Ona iloa atu lea e Falepuavave o Leifi o asa’asa mai le vai, ona igoa ai lea o lea vai o “VAIGASESE” e o’o mai i aso nei. 

ONA FA’APEA ATU LEA O FALEPUAVAVE IA LEIFI, SAU IA! UA E TUAI MAI, AE SAU INA ALU MA LOU TUIATUA-FA’ANOFONOFO, AE O LE A OU TUIATUA-FA’ASAVALI. O lo’o fa’alupe nei pea Tafua ma Fuataga o Tuiatua Fa’anofonofo. O le suafa Mata’afa o le tama lena a leAiga Salevalasi.

© Samoa Observer 2016

Developed by Samoa Observer in Apia