O LE ULUA’I TUI-MANU’A MA LE ULUA’I TUI-ATUA

14 May 2016, 12:00AM

O le fanau a le Tagaloa-a-lagi o Tui-Aitu (tama), ma Tui-Tagata (tama). Usu Tui-Aitu ia Asoa le afafine o Tuifiti, faaee ai le gafa o Moa, le ulua’i Tuimanu’a. Usu Tui-Tagata ia Sulu le afafine o Tui Rarotonga. 

E oso mai le La i tua o Tui-Tagata, ae fa’apea loa le tala a lona uso o Tui-Aitu, Tui-Tagata, o lou atua lena ua oso mai i ou tua, ae fanau loa le tama, ma fa’aigoa ai loa ia Tui-ma-Atua, o le ulua’i Tuiatua lea.

O Tui-Aitu na maua ai le Fale’ula Tau Aitu, ma le Fale’ula Tau Tagata na maua ia Tui-Tagata. Ona fai loa lea o le taua a Tinoimalo, o To’oto’o, ma Au-a-po, poo tagata lautele. O Leutele i Falefa, e i ai lana fanau o tama e to’alua o Leutogitui, ma Leutogiave, na o i Manu’a a’o fai le taua, a ua vaivai le itu aTinoimalo, aua ua leai se mea’ai. 

Ona fai lea o tama ia Leutogitui ma Leutogiavea e mafai ona ‘ai le fua o le la’au lea o le Ifi, aua sa tele na’ua, sa o ifo loa i tua, ma tolotolo i tua o le taua, ma fafaga ai le ‘autau o Tinoimalo. 

Ona toe ola mai ai lea o le ‘Autau a Tinoimalo,ma manumalo ai i le Taua Ona maua ai lea o le matupalapala a  Leutogitui ma Leutogiavea, o le a sui o la igoa, o Leutogitui ia Leifi, ma le igoa o Leutogiavea ia Tautoloitua.

 Ona avea lea e Leifi ma Tautolo ma tama o Tui-ma-Atua i Aleipata, e fai ma o la Alii. Ona fa’asolo lea o le Tuiatua i le gafa o le tama lea, ae Tuiatua Faanofonofo Fuataga ma Tafua. Ona toe fo’i lea o tama i Upolu i Mata’utu, Aleipata, maua ai le alaga’upu, “E tau mai Saua, ae faalua i  Matautu-aai. 

O le ulua’i Tuimanu’a ma le ulua’i Tuiatua e uso o la tama. O le Tui-Manu’a Moa o le ulua’i Tui-Manu’a, a o isi Tui-Manu’a na soso ai, e ta’i lua o latou suafa, ma o le mafua’aga o ia suafa e lua, ona e ese le suafa e fata ai (tulou) i Fitiuta, ese le suafa e fata ai le Tuimanu’a i Ta’u. 

14 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>