O VA’A E IGOA O LE TA-I LE- VAI MA LE TA- I -LE TAI

14 May 2016, 12:00AM

E i ai Toa o Samoa sa ta’uata’ua ma logologoa o latou va’a, ma latou folauga i le Atu Samoa, ma le vasaloloa. E i ai le tala i le Va’a o le Tui-Manu’a sa fau i la’au o le Pau ma le Ifilele i Savai’i, e i ai le va’a o le Toa o Liava’a, e i ai foi tala i le va’a o Fiame ma lana sailiga-malo, e i ai ma va’a e lua a Safune Savai’i, o le Ta i le Vai , ma le Ta i le Tai .

O le Tagaloaalagi  Funefe’ai, o ia lena o le Toa ta’uta’ua i na ona po, ma le ‘Autau a Safune, sa to’ilalo ai le tele o nu’u i Upolu ma Savai’i, ma sa i ai lona va’a e igoa o le Pualele. Fai mai na usu le Tui-Atua Fepulea’i ia Utufaasili, le afafine o le Tagaloalagi Funefeai.

Fai mai sa ma’ema’ea ma ita tele le Tagaloalagi Funefeai ona o le Nunu sa fai ma le a’amu i le ‘Ietoga na tatala e Safune, mo le Tui-Atua Fepulea’i ae sa le talafeagai ma le latou mafutaga, ma o le isi mea, ua le tatalaina le Ato Ponapona, po’o le Ato Pumo’omo’o a Taema ma Tilafaiga na ave i le Tui-Atua.

Ona sau lea o le Fuava’a a Tagaloalagi Funefeai, ma le ‘autau a Safune. O Letogo i le Malae o Lalotea, sa tatanu ai ‘au a Tui-Atua Fepulea’i, ma fai ai le Fale-va’ai o Taua.

Ona va’ai atu lea o le ‘autau a le Tui-Atua i le fuava’a ma le ‘autau a le Tagaloalagi Funefeai ma Safune, e mata’utia lea Fuava’a ma le to’atele o tagata totoa o le ‘autau a Safune.

Ona tata lea o Lali ma alu le tili i le Tui-Atua Fepulea’i, o le a oti uma i latou pe a fa’apea e tau ma Safune, e leai se isi e sao. Ona fa’atoga lea o le Tui-Atua Fepulea’i i lana masiofo o Utufa’asili, le afafine o le Tagaloalagi Funefeai e alu e tu i le matafaga.

Ona se’ese’e atu lea o va’a a Safune, ma ua va’ai atu le Tagaloa Funefeai, o lo’o tu mai lona afafine i le tolotolo i le matafaga, ma ua ma’i-to fo’i, ua ma’i tagata. Ona fa’apea lea o le Tagaloa Funefeai i lona ‘auva’a ma le ‘autau a Safune, “taofi le taua, o lo’u afaine lena o lo’o tu mai i le matafaga”, ona fa’apea atu lea o le ‘autau a Safune, “le Ali’i e, ua faigata,

Ua se’e le Va’a o Safune”, ua fia tau le ‘autau a Safune. Ona fa’apea lea o le malelega a le Tagaloa Funefeai, ” E leai se Gaumata’u, na o Gaualofa” . Ona tolo ai lea o le taua, ma ua fa’aigoa ai le tama a Utufa’asili ia Tologataua poo Tuiatua Tologataua, ma maua ai le igoa o le aumaga a Safune o  “ O Tama o le Lupe Tua’efu’efu “ (mai le Tuiatua), ma  faaigoa ai le Malae i Lalotea-“O le Malae o le Faautuga-tagi a Tumua, ma maua ai le igoa o le Toga a Safune- o le “Faila-tu-matafaga”

14 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>