Tatala aloaia le faleaoga Laumoliafi i Avao
(OFISA SO’OUPU) E $966, 937. 63 ST le aofa’iga o le galuega tele, mo le toe fausiaina o le faleaoga a le Aoga Tulaga Lua i Laumoliafi Avao Savaii.
O lenei galuega na amata fa’agaioi ina ua talia e le Malo o Iapani le talosaga a le Komiti o lea Aoga, i le tausaga ua mavae, mo se seleni e fesoasoani ai i le fa’atupeina o le toe fa’aleleia o le faleaoga tuai sa i ai muamua.
Na fa’amatu’u mai ai ma le seleni e $282, 768. 00 ST i lalo o le fesoasoani mo Aoga Laiti Tulaga Lua i Samoa (GDP), mo lea fa’amoemoe, ma e aofia ai potu aoga e valu, o le Ofisa mo faiaoga ma le Potu Tusi.
Na autasi Alii ma Faipule o lenei Falelima e aofia ai Lelepa, Avao, Vaipouli, Saleia ma Manase ina ia toe fa’aleleia le falea’oga tuai, peita’i o le Afioga le Sui Fofoga Fetalai o ia fo’i o le Faipule o lea Itumalo, na finau malosi ina ia fausia se faleaoga fou, fuafua i le tele o seleni alu mo le fa’aleleia o vaega ua fa’aleagaina o le faleaoga tuai.
O le aso 24 o Iulai 2017 na amata fa’avaeina ai lenei galuega tele ua tino mai, ma sa molimauina e sui o le Malo o Iapani e aofia ai Sui o le Malo o Samoa.
O nisi nei o fesoasoani mo lea galuega tele;
• Tupe mai le Malo o Iapani - $282, 768. 00
• Falelima faatasi ai ma le Komiti - $547, 101. 70
• Faipule / Sui Fofoga Fetalai - Afioga Nafoitoa Talaimanu Keti - $98, 567. 93
• Meaalofa Malo Saina - 200 Nofoa ma Laulau - $38, 500. 00
• Taina o Piliki, sa feagai ma le Nuu o Avao
Nisi o Meaalofa sa fesoasoani ai i le Galuega;
• Minisita o Tupe - Afioga Sili Epa Tuioti - $1,200
• Minisita o Punaona Fa’alenatura ma le Si’osi’omaga - Afioga Fiame Naomi Mataafa - $100
• Minisita o Fa’ato’aga ma Faigafaiva - Lopao’o Natanielu - $300
• Galuvao - $1,000
• Galuvao Ioane - $1,000
• Loto Ale Vena - $500
• Tufuga - Lina - $500
Na momoli le fa’afetai a le Malo tauala atu i le Afioga le Palemia ia Tuilaepa Dr Sailele Malielegaoi, i le fa’amalolosi o le nu’u, e ui i le tele o faigata sa feagai pea ma i latou e pulea aoga (Komiti Aoga), peita’i o le fa’amalumalu a mᾱtua ma le Pulega mamalu a le Nu’u, ua tino ai lenei galuega matagofie.
O le aoga lenei ua ta’ua o le Falelima e aofia ai Afio’aga e Lima, o Sale’ia, Avao, Vaipouli, Lelepa ma Manase.
Na fa’afetaia foi e le Amapasa o le Malo o Iapani Maugaoleatuolo Shinya Aoki le galulue mae’ame’a o le Komiti ma le Pulega a le Aoga Tulaga Lua a Laumoliafi, ua tino ai lenei faleaoga mo fanau aoga.
Na fa’ai’uina lenei fa’amoemoe i fa’aaloaloga fa’aleaganu’u masani a Samoa, e tali fa’aaloalo ai lana Afioga le Faipule o le Itumalo, Alii ma Faipule o le Itumalo i le fa’aeaea ma le amanaia e le Malo ma ana Pa’aga totino o i latou tauala atu i nei fa’amanuiaga.