Mana’o le Minisita e fa’apa’ū le tau o le eletise

Tusia Lanuola Tusani Tupufia ma Fa’aliliu e Maiava ,

225 Hits

Faafeiloai e le Komiti Fa’afoe ma le EPC le Minisita o Galuega, Papalii Niko Lee Hang ma lana soatau, Seiuli Ueligitone Seiuli.

Faafeiloai e le Komiti Fa’afoe ma le EPC le Minisita o Galuega, Papalii Niko Lee Hang ma lana soatau, Seiuli Ueligitone Seiuli.

O lo’o tumau pea le taugata le-mafaufau o le tau o le eletise i Samoa nei. 

A o le lu’i lea mo le Fa’alapotopotoga o le Malosi Tau Eletisi (EPC), ua finagalo ai le Minisita fou, le Susuga a Papali’i Niko Lee Hang, ina ia fa’ataugofie le ‘eletise mo aiga uma i Samoa, i totonu o le lima tausaga ua savalia nei. 

O ananafi na saunoa ai le Minisita o Galuega, Fela’ua’iga ma Galuega Tetele a le Malo, i se sauniga na faia i le Faletupe o Atina’e, sa fa’afeiloa’i aloa’ia ai e le Fa’alapotopotoga o le Malosi Tau Eletise, le Susuga a Papali’i ma lana Minisita Lagolago, le Susuga a Seiuli Ueligitone Seiuli. 

“Leva ona tagi mai le atunu’u ona o le taugata o le tau o le soifuaga ma le mana’o e fa’apau le tau o le eletise,” o le saunoaga lea a Papali’i i le ‘aufaigaluega a le EPC. 

“’Ou te fa’amo’i atugaluga ia, ae maise le tu’u-fesili pea o le atunu’u, pe aisea lava ua tumau ai pea ona taugata le tau o le eletise, a’o lea ua iai poloketi ia o le malosi fa’afouina mai le la?

Na laga fo’i e Papali’i le tulaga ua o’o iai tiute-fa’aopopo. O lo’o fia malamalama fo’i ia (Minisita) talu ai, o ia e tali i le Palemene ae maise le mamalu o le atunu’u, pe fa’apei ona fuafua ia tau.

O le Aso Sa talu ai, na fesiligia ai e Taua Fatu Tielu i sana tusi i le Fa’atonu o le Samoa Observer, pe fa’apei ona fuafua ia lafoga-fa’aopopo.

“O lafoga-fa’aopopo a le EPC lea na fa’asalalauina e amata fa’amamalu mai le Aso 01 o Aperila, e maulalo atu nai lo le masina o Mati talu ai nei.

“Peita’i e o’o mai ananafi (Aso Tofi), ua fitu aso mai mai le Aso 01 o Aperila, o lo’o tumau pea ona fa’atau atu le eletise i le tau e maualuga atu mo Mati. O lona uiga, o latou uma na fa’atau ma totogi a latou eletise i aso ia, ua tele atu tupe ua totogi ma e tatau ona toe fa’afo’i.

“Ina ua fesilisili atu, ae fai mai se tasi o kesia i le Ofisa i le Maota o TATTE, o le tau fou mo Aperila, ua mae’a ona suia peita’i, e leai se mea fa’apena ua faia. E momomo ai le loto ona o le matua le-talafeagai o le tulaga mo le mamalu lautele o le atunu’u fa’apea pisinisi ma fa’alapotopotoga e le o siakia a latou pili.  

E mafai lava e se tasi ona tali mai i fesili nei: 

• E fa’afefea ona fai e le EPC lea mea, o le fesuisuia’i o tiute-fa’aopopo i masina ta’itasi?

• O a lava mafuaga ogaoga ua saga fai ai nei suiga i le tele o taimi, ae pe toe fa’afo’i mai fo’i e le EPC tupe a tagata ua ova-totogi a latou pili i le masina o Aperila? 

• Ua fa’asa’o ea e le EPC lafoga-fa’aopopo ia mo Aperila ina ua fai atu o le faitioga?”

 

O ananafi la, na talia-lelei ai e Papali’i, e tatau ona tali i fesili ua tu’uina atu ma fai iai se fa’atatau.

O le fa’amoemoe mo le fa’ataugofieina o le tau o le eletise, na ia fa’amamafaina ai le ‘ausia lea ma fa’ataunu’u fuafuaga ua mae’a ona fa’ata’oto mai i le manulauti a le HRPP, o le fa’apauina lea o le tau o le suau’u. 

“’Ou te le-fia faia o se tala ae, e tele lava tupe a le EPC ma e tele fo’i ana ‘aitalafu,” o le saunoaga lea a Papali’i.

“Taumafai e fa’aPaleni vaega ia, ina ia pa’u le tau o le ‘eletise.” 

Na fa’amanatu fo’i e le Minisita i le ‘aufaigaluega uma, le taua o le galuega o lo’o latou fa’atino, ona e fa’aleleia ai ma si’itia le tulaga o le ‘au’aunaga e tu’uina atu e le Fa’alapotopotoga, aua le atina’eina o le atunu’u.  

Na ‘oto mai e Papali’i ‘Upu a le Aposetolo o Luka 16, fuai’upu e 10 e fa’apea: “O lē fa’amaoni i mea itiiti, e fa’amaoni fo’i o ia i mea e tele; o lē amiotonu i le mea itiiti, e amiotonu fo’i o ia i mea e tele,”, e fa’amalosi’au ai i le ‘aufaigaluega. 

Sa ia toe fa’amanatu aso ae fa’atoa amata faigaluega i le Faletupe o Samoa i Sisifo, o se Ofisa o le Faletupe, ma e mai i’ina, na o’o ai lava i le maualuga sa iai. 

“E leai se manatu, tatou te o’o i luga i tulaga maualuluga ia, ae o mea-lililo ia tatou te le-iloa, ae fa’atoa iloa i o tatou taimi,” o le saunoaga lea a le Minisita.  

 “Tatou fa’amaoni i a tatou galuega. O la’u fautuaga, afai e masani ona e tuai i le galuega, e te le o faia se fa’ata’ita’iga lelei, a e gaoia lou taimi i le galuega, e le mafai ona e gaoia le taimi a Le Atua. E fa’amaoni ma fa’atuatua Le Atua ia latou e fa’amaoni ia te Ia. 

Na fa’aopopo atu fo’i le Minisita, e o’o lava ia te ia, e taumafai lava ia vave i le galuega ia avea ma fa’ata’ita’iga lelei mo lana ‘aufaigaluega. 

O Papali’i sa avea talu ai ma Ta’ita’ifono o le Komiti o Tupe a le Palemene.

© Samoa Observer 2016

Developed by Samoa Observer in Apia