Manatu o le Fa’atonu - O Aso ta’itasi uma lava o se meaalofa lea

Tusia Mata'afa Keni Lesa ma Faaliliu e Seagaitumua Tupuola ,

129 Hits

O le Asō o se meaalofa lea; o taeao-e le o iloa lea.

O a’u o se tagata e matua talitonu i lenei faaupuga pu’upu’u. E mafua ona e ui lava i tupe uma, o le poto ma le talitonu i lenei lalolagi, e leai se tasi na te iloa pe o le a le mea o le a ono aumai e le isi sefulu minute o le olaga nei. 

Ua outou silasila la, o loo tatou soifua i se lalolagi lea tatou te i ai iinei i lenei minute ma alu ese i le isi minute. E matua vave la. E faapena ona vave le suiga o le olaga. O lona uiga la-e le tatau ona alo tamala i soo se taimi.

E tatau ona tatou a’oa’o e faitau o tatou faamanuiaga, faafetaia le meaalofa o le ola, alofa i tagata e latalata mai ia i tatou e o’o lava i lu’itau e avea ai i tatou ma tagata e sili ona lelei. O le mea lenei ua tatou iloa uma lava. E tutupu mea leaga ma o le soifuaga nei e leai se taimi e faapea ai e faigofie ae na faia i tatou e avea ma e e faato’ilaloina. Na faia i tatou ina ia tatou manumalo, ia a’oa’o ona faatu i tatou i luga pe a tatou pa’u’ū i le taimi nei ma ieluā.. Aisea ua tatou talanoa ai i lenei mataupu i se Aso Tofi i totonu o le parataiso?  E matua faigofie lava le pogai. Ua leva ona avea ma mea faigata ona lūlū ese le tala ia Moemulinuu Toleafoa Siaki. O ia o se alii e galue i mea tau uelo lea na maliu i Matautu ina ua mua se tane suau’u i le uafu lea sa galue ai-ae na pa ma sasao ai le afi.

 O lea tamā e 31-tausaga lona matua ma e to’atasi lona alo mai Nuu –o se tagata faigaluega a le Petroleum Products Supplies Ltd (P.P.S). O le atalii o Toleafoa Mamea Savea Siaki ma lona faletua o  Maria Monika, e tusa ai ma faamatalaga na faailoa mai ia i matou,o le taeao lea na maliu ai, na ia tuua lona aiga e peiseai o se isi lava aso.  

 “O lea teao, na ia fafagu ai a’u i luga ma talosaga mai ia te a’u e ave o ia ma lona faletua i o la nofoaga e galulue ai,” o le faaaliga lea a lona tama o Toleafoa.

 “Na ‘ou tuua lo’u afafine faale-tulafono i le Valentine ona soso’o ai lea ma ia i le Petroleum Products Supplies e faigaluega ai. “Ina ua ma taunuu i le nofoaga e faigaluega ai o ia, e pau lava lana tala ia te a’u e na te faamae’aina nisi o mea sa galue ai i le fale pe a uma galuega i lea aso. “Sa faatofa mai ia te a’u ma ‘ata ona savali ese loa lea.” Fai mai le tamā loto faanoanoa e leai sona manatu o le taimi mulimuli lea e vaai ai i lona atalii o ola. O se tulaga lea e faanoanoa ai. O le asō, o loo faanoanoa lea aiga. Ma e matua faigofie lava ona tatou malamalama.  O le itu e uiga i le maliu e faapea maumau pe ana tatou iloa le taimi e tupu ai. Faapea la e iloa e tagata uma o le asō o lo latou aso mulimuli lea i le lalolagi nei? Mafaufau la i sauniga faamavae, taumafataga tetele mulimuli, fusifusi, feāsogi, ou te alofa ia te oe ma le isi anoano.

E ui lava ina tatou iloa lautusi o le Tusi Pa’ia e faapea o le oti o se tofiga faale-agaga lea, ae o le mea moni- e leai se taimi ua tatou maua tatou te faafetaia ai aso uma i se tulaga e sili atu. Aua tatou te le mafai lava ona iloa. E ono mafai ona faapea o taeao, tausaga a sau poo le isi 10 tausaga mai le taimi nei, tatou te le mafai lava ona iloa. I Samoa i aso nei, e toatele tagata ua pagatia talu ai le maumau o i latou e pele ia i latou. 

I nisi itu, e faitau afe ma afe isi e le o maua lava se malosi atoatoa ona o le maumau o ia tagata i le tele o tausaga ua mavae..E le o se mea e faigofie. E talafeagai pe a faapea e tofu tagata uma ma le tagata e pele ia te ia ua maumau i isi taimi. Ma o se mea e matua tiga tele. ma e matua o’o i tino le loloto o ia faanoanoaga. 

O isi tagata ia latou te faia le mea sese o le ta’u atu i tagata o loo faanoanoa ina ia ‘aua nei faanoanoa. O se mea valea lea, e tusa ai ma lo matou manatu. O le mea moni e i ai le taimi e faanoanoa ai ma tagiauē. Ia manatua foi- i tatou o tagata soifua ma o le teena o tatou lagona ma faalogoga ona o le maliu o se tasi e pele i le aiga- o lo tatou pepelo lea ia i tatou lava. O le itu e taua ona manatua pea e faapea o faalavelave ma mea sese o se vaega lea o le olaga. Ma o le oti o se tofiga lea e tatau ona taou o’o uma i ai, poo le fea lava ala e taunuu ai. 

O lea la itu ua toe avatu ai a’u i tua i le autu o lenei tusitusiga. E le tatau lava ia i tatou ona tatou faaaogaina se mea e aunoa ma le iloa o lona taua. E tatau ona tatou faamasani i le faafetaia o mea uma lava ua tatou maua i o tatou soifuaga-aemaise ai lava o tagata ia e sili ona taua ia i tatou. Tatou te le ma iloa le taimi e aveeseina ai i latou mai ia i tatou. E faapenei lona faitauina: 

 O ananafi na auina mai ai se uo se fe’au ia te a’u. Na matua ootia lo’u loto i lea fe’au ma ou te loto e faasoa atu ia te outou i le asō.

E te manatu ua na o se isi lava aso o lou olaga. E le faapea ua na o se isi lava aso, o se aso lea ua tuuina atu ia te oe-o le Asō. Ua tuuina atu ia te oe. O se meaalofa. Ona pau lava lea o le meaalofa o loo ia te oe i le taimi nei lava. Ma ona pau lava le tali e talafeagai ai o le faafetai.”

 “Afai e leai lava se isi mea e te faia- ia totō lelei lea tali i le meaalofa sili e ala i lenei aso uiga ese; pe afai e te faaa’oa’o ona tali atu e peiseai o le aso muamua lava lea o lou olaga, ma o le aso mulimuli foi lea, ona e faaaogaina lea o lenei aso i se tulaga i se tulaga lelei.” 

“Ia amata i le pupula o ou mata ma faate’ia e faapea ua ia te oe mata e mafai ona e faapupula. O lea faagasologa uiga ese o lanu e ofo mai ia i tatou i aso uma mo le fiafia e matua tele. “Silasila i le vanimonimo. E seāseā lava ona tatou tilotilo i le vanimonimo, e seāseā foi ona tatou matauina lona eseesega mai lea taimi i lea taimi faatasi ai ma ao e aga’i mai ma o atu. “E na ona tatou mafaufau lava i le tau ma uiga o aso. Ma e o’o i le tau ma uiga o aso, tatou te le mafaufau lava i le tele o uiga o le tau. E na o le tau lelei tatou te mafaufau i ai ma le tau leaga. O lenei aso, i le taimi nei lava, e uiga ese lona tau.  O foliga vaaia o ao i le vanimonimo e le mafai lava ona tulaga tutusa ma tulaga i le taimi nei. Pupula ou mata —tilotilo i ai. “Masalo o se ituaiga lea e le mafai lava ona tula’i tonu mai i lea tulaga pe a toe sau. 

“Silasila i foliga o tagata tou te feiloa’i. E tofu i latou ta’ito’atasi ma se tala uiga ese o i tua o latou fofoga, o se tala e matua le mafai ona e fuatia; e le gata i le latou lava tala, ae o le tala i o latou tua’ā.. O ia tala uma e matua afua mai tua, ma i le taimi nei, i lenei aso, o tagata uma lava tou te feiloa’i. O lea soifua atoa mai auga-tupulaga mai le tele o nofoaga i le lalolagi atoa, e faatafe faatasi ma feiloa’i ma oe iinei, e pei o se vai faaola pe afai e mafai ona tatala lou loto ma inu. Tatala lou loto i meaalofa uiga ese ua tuuina mai e auga-tupulaga ia i tatou. E te oomi se ki ona maua lea o le molī eletise. E te ki se masini ona maua lea o le suavai mafanafana ma le suavai malūlū- ma se suavai e mafai ona inu. O se meaalofa lea e faitau miliona ma miliona o tagata o le lalolagi e le’i tofo i ai. 

“Ua faaitiitia le aofaiga tele o meaalofa ia e mafai ona tatala i ai lou loto. Ma ou  te  talotalo o le a tatala lou loto i nei faamanuiaga uma ma ia tuu e tafe i totonu ia te oe, ina ia mafai ai ona faamanuiaina tagata uma lava tou te feiloa’i i lenei aso ina ia e faamanuia i ai. E na o ou mata, lau ata ma lau pa’i i ai-tau lava o lou auai faatasi. 

 “Ia tafe le loto faafetai e avea ma faamanuia ia i latou uma o auai ma oe. Ona avea lea ma aso moni e lelei.”

Ia outou maua Samoa e aso uiga ese, ma ia faamanuia atu le Atua! 

© Samoa Observer 2016

Developed by Samoa Observer in Apia