E ‘inosia le mata-i-fale! Ae moni lagona fa’atosina fa’aleTagata

Tusia Ripotia e Charlotte Gill ma Fa’aliliu e Maiava ,

391 Hits

Fai mai Kim West, ua alofa fa’amaoni ia Ben, lana tama na fanau mai lona manava.

Fai mai Kim West, ua alofa fa’amaoni ia Ben, lana tama na fanau mai lona manava.

E le mataga lea mea? Pe mālie? Se tina e toe alofa-fa’avalea ma mana’o e nonofo ma sana tama-moni na fanau mai lona manava? 

E le malie na’ua lea mea, a’o faitau atu i le tala ia Kim West – ua 51 tausaga o lona soifua, a ua toe uei-uei ma lana tama ua 30 tausaga talu ona vavae-‘ese mai i a ia. 

Na matua ma’ati’ati lea tala i nusipepa ma fa’asalalauga i le vaiaso talu ai, ina ua fa’ailoa e lea tina, le amataga o lea mafutaga ma ua manana’o ai nei, e fa’aipoipo ma amata lo la aiga.

E leai se tasi o la’ua uma nei, ua tapena mo lea mana’o fa’apea. 

I luga o upega-tafa’iLagi, ua fa’a’upuina e nisi le tina lea ma lana tama, o tagata-faimea-malie ma fa’aigoa ai, o “tagata-mama’i ua leai ni fai’ai”. O nisi ua manana’o e ‘ave West e ta’oto i le falema’i ae ua iloa mulimuli ane nei, ua leiloa po’o fea ua solasola ma lafilafi ai, ne’i molia ma ‘ave i le falepuipui. 

E ogaoga lea mea, ma ua matua le-fiafia ai le to’atele, talu ai, e le se mea fou le tala i le to’alua lea. O le mea moni, na gata i le sefulu tausaga talu ai, le aliali mai o mea fa’apea – ma e leiloa fo’i po’o afea e uma ai ma le-toe tutupu. Sa iai mea fa’apea na tutupu muamua fo’i, o matua ua nonofo ma fanau-a-fanau, o tama ua toe nonofo ma afafine, ma e o’o lava fo’i i masaga ua toe nonofo. 

O le mafuaga o ia ituaiga mafutaga ma so’otaga va-va-lalata, e le ona o le alofa ua ulu-ulu-mamau, pe ona ua pau o le taunu’uga ua o’o iai, ae foliga mai e afua, ona o lagona-fa’atosina fa’aleTagata (Genetic Sexual Attraction). Le natura o mea e le fia talanoa iai se tagata – ona e laga’ia ai tapu fa’aleTagata: o le mata-i-fale.  

Ae moni lelei ma fa’amaoni lea mau – talu ai le telea’i tele o suiga o le ola nei, ua tatau ai nei ona fai o se fa’atatau, ma ia faia vave. 

O vaega ua ta’ua (GSA), e fa’amatalaina ai se lagona-fa’atosina malosi e tupu, pe a feiloa’i mo se taimi muamua, tagata o se aiga e tasi (toto, ivi ma a’ano) – pei o se matua ma sana tama, se uso-taufeagai, po’o se tausoga, pe a o’o ina matutua.  Na ulua’i iloa lea mea i le 1980, i le tina o  Barbara Gonyo, na matua alofa-fa’avalea i lana tama-tama. Ina ua toe fa’atasi ua matutua, e 13 lelei tausaga o ta’afifili Barbara e tau ‘ave’ese ona lagona ma fa’alogona i lana tama. 

O le mea tonu lena e ta’ua, o lagona-fa’atosina o le Tagata (GSA): o se tulaga e matua faigata lava. Ina ua faitioina e tagata le tina o West, sa latou fesiligia lava lona malosi’aga e fa’atonu lelei ai lona mafaufau. Peita’i, o le tele lava o latou e a’afia i fa’afitauli fa’apea, e faigata lava ona latou vave te’ena – talu ai e le faigofie ona toe vave suia o latou lagona ma fa’alogona i mea fa’apea. E matua mea fa’apea na tutupu, na matua afaina ai ma malepelepe nisi aiga. O se mea-tiga, o se fa’atiga mo latou e a’afia ai. 

O le mafuaga o le tupu o lea tulaga, o se vaega lea e manaia pe a talanoaina. E le tele na’ua ni su’esu’ega na faia muamua i le vaega lea, aua o le fesili lava lea, a’o ai e mana’o i se fa’ailoga tauFoma’i o le Filosofia i mea fa’apea, o le mata-i-fale, e pei ona fa’aigoaina ai e tagata Samoa. E manatu nisi tagata-su’esu’e, atonu o se a’afiaga mai le taimi a’o laiti. I le taimi a’o nonofo ma mafuta fa’atasi aiga, sa le anoanoa lava i o latou lagona ma mafaufau, ni lagona fa’apea. O ia suiga o le olaga e fa’apea, e tutupu i le va o le taimi e fanau mai ai ma le taimi e atoa ai le ono tausaga. Ae o’o ane ina toe fetaui ane ai mulimuli ua matutua, e ono tupu ai loa le mea lea ua ta’ua nei, lagona-fa’atosina o le Tagata (GSA). O molimau mai le Iunivesete o Lonetone, o lo’o fa’apea ai, e ono tupu le tulaga lea, i le 50 pasene a aiga e toe feiloa’i mulimuli ane ua matutua. 

E manaia ae fa’apea, e le o se fa’aletonu o West a’o se mea lava e masani ona tupu. Pau lea o lona mitamita i ana so’otaga ma le mafutaga ua o’o nei iai, e fa’ate’ia ai ma foliga e ofo ai tagata, e pei fo’i o isi ulugali’i-fa’apea ua le-fiafia ona o le mea na tupu fo’i ia latou. E o’o lava i luga o upega-tafa’iLagi, o lo’o iai lava nisi (e le manana’o e fa’ailoa o latou tagata) ae o lo’o fia talatalanoa ia West ma lona fa’avasivasti ua iai nei. 

Talosia, ia ‘aua ne’i toe taumafai e lafilafi fa’apea i le lumana’i. 

Atonu o le tasi o mafuaga tele e mafua ai lenei fa’afitauli, ona o faiga-fou ua ta’atele nei i le lalolagi – o le fo’aia lea o sua ola (tulou) o tagata-ola. I le sefulu tausaga ua mavae atu, se le-faigofie lava i se fa’alapotopotoga po’o tagata ta’ito’atasi fo’i, ona tu’uina atu ni sua-ola (ali’i po’o tama’ita’i fo’i) mo nisi tagata po’o ni fa’alapotopotoga fo’i. O le ripoti mulimuli lava a le vaega e ta’ua o le HFEA  mo foa’i fa’apea, na ta’ua ai le si’itia maualuga o sua-ola sa foa’ina, talu mai le 2005 – o le tele o ia vaega, e ‘aumai le Iunaite Setete o Amerika ma Denmark. 

O le fa’asalalauga lea o sua-ola, e mautinoa ai lava, le matua to’atele o tamaiti e fananau mai ma ola i o latou olaga atoa, e aunoa ma le iloa o latou tama-moni po’o tina fo’i fa’apea tagata e aiga iai. Le taimi tonu la lea, e tupu ai le mea lea. 

Talu ai le le-feiloa’i ma o latou tama-moni po’o tina-moni fo’i aiga moni, e le ono tu’ua’ia ai lava ona o lenei mea. Peita’i o feiloa’iga fa’apenei, e matua faigofie lava – ae maise ai, o tulafono fou ua iai nei o lo’o fa’apea mai, so’o se tamaititi e fanau ia Aperila o le 2005 po’o tua mai fo’i, e mafai ona ia sa’ilia fa’amatalaga o ona matua moni pe a aulia lona 16 tausaga. O lona uiga, o le a to’atele atu tamaiti e toe iloa anu o latou so’otaga ua matutua, lea e ono o’o atu i le selau ma selau, e ono a’afia i le tulaga ua talanoaina nei, lea ua afaina ai nei West ma lana tama.

Ae tupu loa le mea lea, ua fa’afuase’i ona fia fai-to’alua ia Mama, Papa po’o le tausoga o Simi po’o Mele, e la’ititi lava se fa’atatau e toe tau fesoasoani atu iai. Pei o le tulaga ua o’o nei iai Kim West.

Soia ia le a’amu ma le fa’atau’emu, ona o le tala i le alofa fa’aTina ua o’o-o’o mamao tele, ae talosia, ia avea le tala ia West o se avanoa e silasila toto’a ai pe fa’apei ona puipuia ma ta’ofia lenei fa’aletonu i toe tupu fo’i i le lumana’i. O latou o lo’o a’afia i lenei mea, e le mama’i pe fai-mea-malie fo’i, a’o tagata ua matua mo’omia se fesoasoani e fa’amalamalamaina ai. Ua le mafai ona taofiofia o latou lagona peita’i e mafai e su’esu’ega ma le lagolago fa’aSaienisi, ona maua o se fofo mo o latou fa’afitauli ma taofia ai le tula’i mai pea o lea tulaga.

© Samoa Observer 2016

Developed by Samoa Observer in Apia