Manuia le lumana’i o le Aufai-iunite a le UTOS Fa’alauiloa e le Bluesky le 5.7 miliona tala o tufatufaga

Tusia Fa’aliliu e Maiava ,

136 Hits

Sa’u Justina Sa’u of U.T.O.S and Aoe’e Adolfo Montenegro of Bluesky.

Sa’u Justina Sa’u of U.T.O.S and Aoe’e Adolfo Montenegro of Bluesky.

Ua si’i-maualuga le tau o le iunite mai le $1.53 i le $1.57 i le aso e tasi pe a toe amata fefa’ataua’iga i le Aso Tofi, 07 o Aperila 2016.

O le Aso Lulu 06 o Aperila 2016, na tapunia ai le fa’atauina o iunite ina ua maua e le pulega fa’amatalaga, e ono fa’amatu’u mai e le Komiti Fa’atonu a le Bluesky Samoa, se tufatufaga i lea lava aso.

O le tau fou o le iunite, ua tilofia ai se fa’aopopoga e 61.9 pasene i le tau o le iunite e tasi, talu mai le ulua’i iunite sa fa’atauina i le 97 sene ia Setema 2010, e le aofia ai tufatufaga sa tu’uina atu i le ‘aufai-sao ia Aukuso 2011, Iulai 2013, Iuni 2014 ma le 2015. 

I le fonotaga a le Komiti Fa’atonu a le Bluesky Samoa i le Aso 06 o Aperila 2016, na fa’ailoa ai e le Komiti, le aofa’iga e lima-tesi-fitu miliona tala ($5.7 miliona) o tupe o le a vaevaeina mo ana vaega fai-sea. O le miliona, faselau-luasefulu ma le lima afe tala ($1,425,000.00) o lea seleni, o le a maua e le UTOS. O lea seleni, e tusa lea o le 17.9 pasene o ana tupe-maua mai teuga-tupe fa’aVaitaimi 

Ui o le aofa’iga o tupe a le UTOS o lo’o fa’amauina i le Bluesky Samoa e tusa o le sefulutolu-tesi lua miliona tala ($13.2 miliona tala) e o’o i le fa’ai’uga o Tesema 2015, a o le aofa’iga moni o ana teuga-tupe mai le amataga, o lo’o tumau pea i le fitu-tesi-iva miliona tala ($7.9 miliona tala) i fa’amaumauga lava a le UTOS. 

Na fa’aalia le agaga fiafia o le Komiti Fa’afoe a le UTOS fa’apea le pulega ona o tupe-maua mai ana teuga-tupe i le Bluesky, lea e iloga le tele o lona sao mo le una’ia le fa’aopoopoina pea o le tau o iunite ana iunite.

Mai lava i le tausaga e 2011 ina ua avea le UTOS o se fai-sea a le Bluesky Samoa, sa fa’aauau pea ona maua o tufatufaga tau-seleni mai le Kamupani, i tausaga ta’itasi. 

O le aofa’iga atoa o tupe o tufatufaga ua totogi atu e le Bluesky Samoa mo le UTOS i tausaga ua mavae e aofia ai ma vaevaega talu ai nei, ua fa-tesi-iva-lua miliona tala ($4.92 miliona tala). E ‘ese mai ai fa’amanuiaga tu’u-sa’o e agava’a iai le ‘aufai-Iunite pe a latou fa’aaogaina ‘au’aunaga tau-feso’ota’iga a le Bluesky, i lalo o Fuafuaga Fa’ata’oto a le UTOS (UTOS Mobile Plan) na amata aloa’ia i le lua tausaga talu ai. 

E tusa ma le fasefulu ma le lua miliona tala ($42 miliona tala) le sao o le Bluesky Samoa, i le atina’eina o le tamaoaiga lautele o le atunu’u i le 2015.

O lea sao e ‘auala mai i tupe maua mai fefa’ataua’iga i fafo, e tusa o le $12.9 miliona tala i le tausaga, o tufatufaga mo ana pa’aga o le lotoifale lea e atoa ai le 48 pasene o ana vaega fai-sea, e aofia ai le UTOS ($1.9 miliona), le Malo ($4.4 miliona), le ‘aufai-oloa e $15.2 miliona ma le ‘aufaigaluega e $7.6 miliona. E silia fo’i i le miliona tala e tu’uina atu e le Bluesky mo le Manu Samoa To’afitu i tausaga ta’itasi. 

E 25 pasene o le Bluesky Sky e umia e le UTOS ae 26 pasene le Bluesky Pacific Holdings Ltd.

O lo’o fuafua, ina ia fa’aauau ai pea ona fa’aopopo ma saga si’itia pea le aofa’i o tufatufaga ma fa’amanuiaga mai le Bluesky Samoa, i le isi lima tausaga o muamua. 

E le gata i lea, o lo’o fuafuaina fo’i, le amata solo mai o ana tufatufaga mai ana teuga-tupe i le Bluesky Pacific Holdings Ltd. i  le lumana’i. O ia valo’aga ma fuafuaga, e fa’avae lea i le lelei o so’otaga ma le galulue fa’atasi o le Bluesky ma le UTOS, e si’itia ma fa’alautele atili le ‘au’aunaga ma lana tautua e tu’uina atu, e le gata i totonu lava o le lotoifale o Samoa, ae fa’apea fo’i le Itulagi o le Pasefika.

© Samoa Observer 2016

Developed by Samoa Observer in Apia