TALATUU MA TALA O LE VAVAU NA FAAMAUMAU E PAPALAGI

Tusia Fuimaono Na’oia Faasavalu Touli F. Tupua ,

379 Hits

O LE TALA IA TIGI MA LAU: O Tigi o le alii Amoa-o ‘Olo o le alii Falelatai; o Lau o le tamaitai Taga. O le Taupou lea sa gasolo i ai aumoega a Manaia uma o Samoa. Ona nonofo lea o Lau ma le alii o Olo. Ona sau ai lea o le alii o Tigi mai Amoa e alu i Taga-lea o loo i ai Olo ma Lau.

Ona fesili lea o Lau ia Tigi-pe o fea a maliu i ai le malaga-ae tali Tigi-“o le sailiga o se ama o lona vaa, ae le o se sailigā o se ama o se vaa, ae o le sailigā avā. Ua alu Olo e alo atu, ona nonofo  ai lea o Tigi ma Lau ma ua fai lava Lau ma avā a Tigi.

Ona foi mai lea o Olo-o nofo atu Tigi i le fale. Ona fai atu lea o Tigi-‘Ua mapu maia o tautai alii! Ona fesili lea o Olo-o fea e sau ai lena malaga? Tali Tigi;’O le malaga nei lava e sau i se mea o le Faasaleleaga. Toe fesili Olo-‘o fea e alu i ai lena malaga?  Tali Tigi:-‘O le sailiga o se ama o si o’u va’a. Ona fai atu lea o Olo: “Ua lelei- e tele la’au lelei o le vao nei e aogā i ama o vaa. Sa faapea lava Olo ia-ai o se sailiga-ama moni! Ona fai atu lea o Olo ia Tigi-‘e lelei ona ta usu i le taeao i le vao e sa’ili se ama o lou va’a.

Ona o ai lea o Tigi ma Olo ua su’e se laau e ta ai se ama. Ua alu lava Olo ia ma le manatu o loo alu atu Tigi, ae leai, ua toe fo’i ane ia Lau. Ona o’o lea i le afiafi ua alu ane Olo. Ona fai atu lea o Tigi-Maliu maia- o a’u nei ou te fou i le vao-o le pogai lea na ‘ou toe vave foi mai ai i tai. Ona alu lea o Tigi i lona nuu ae o lea ua fanau Lau-o le tama o Tigi.

Ona nonofo lea o Lau ma le tama-ua matua -ma ua malosi. Ona o ai lea o Olo ma le tama e tilitili. Ona fai atu lea o Olo i le tama-‘Sole- a faapea e lafo le upega-ia vave ona e oso atu. Ona lafo lea o le upega e Olo-ae vaai atu le tama –e lua manini o loo tata’a i le vaivai-ua le oso nei le tama e pei ona faatonu ai e Olo, ae ua punou i lalo ma tapu’e tama’i manini e lua-ona ave lea ua tuu i le ipu niu o i ai le suasami.

Ona fai atu lea o Olo i le tama-“o le a le mea na e le oso atu ai ina ua lafo le upega? Ua toeitiiti ona ‘ou fasiotia lea o oe-pe la o so’u atalii moni oe!  Ona tagi ai lea o le tama ma alu atu i lona tina ma ave i ai ana i’a. Ona fai atu lea o Lau-“E moni- o lou tamā o le alii Amoa o Tigi. Ona o ai lea o Lau ma lana tama i Amoa i le alii o Tigi. Ona alu ane lea o Olo –ua o Lau ma le tama –ona mulimuli ai foi lea ma ia i tua o Lau, e alu atu Olo- o nonofo mai Lau i le fale o Tigi, ona latou nonofo faatasi ai lea i le fale o Tigi.

Ona fai atu lea o Lau ia Tigi -po ai se igoa o le tama? Ona fai mai lea o Tigi-‘ia igoa ia Tigi ma Lau. A e fai mai ‘Olo-Faamolemole Tigi-‘e a pe a tuu i ai ma lota igoa i le igoa o le tama-ona igoa ai loa lea o le tama ia “Tigilauma’olo”; ae o i’a a le tama-ua tuu i le vaivai i le papa-ua fai ai le taulaga a le tama. Ua alu Tigilauma’olo-ua tafao i le vao. Ona fetaia’i ai lea ma fafine e to’alua o loo o ifo mai Palapala.

Ona fai atu lea o le tama-Lua te o i fea? Tali fafine-Ma te utu sami. Ona tau ane lea o fafine i le mea o i ai i’a a le tama. Ua le utua a la sami-a ua fasi i’a a le tama-ma o ma la’ua i uta-ma ua toe fetaui ai ma le tama i uta. Ona fai atu lea o le tama-E mai fea a oulua i’a? Tali fafine-‘O a ma i’a na maua i le papa. Ua vaai atu le tama o ana i’a. Ona ta ai lea o le isi fafine ma oti ai-faapea foi ma le isi fafine.

Ona faapea lea o le upu a le tama:”Ua ‘ai a oulua manini” Ona tipi lea o le io-tua o le i’a ma ave-ua u’u ma sama, ona tuu lea i totonu o le ‘ato-li’i’-ma ua tautau i le ‘au’au o le fale. Ona alu ane lea o le tuafafine o lona tama-ua ‘ai fasi i’a a le tama-ona sau ai lea o le tama ua leai se mea o totoe-ona fai atu lea o lona tina-“Ua ‘ai e le tuafafine o lou tama au mea.

Ona fai atu lea o le tama-A’o ona tau-ua e ‘ai a’u mea-ia e fanau mai o ni i’a ese se lua e sui ai a’u i’a. Ona fanau lea o laumei e lua: O Utuutu ma Toga igoa o laumei a Tigilauma’olo. Ona ave lea o i’a ua tuu i le vaivai i le papa ua osi ai le taulaga a Amoa ia Utuutu ma Toga. Ona faalogo mai lea o ‘Ae mai Toga, le tulafale a le Tuitoga, i le sau o Tigilauma’olo. Ona sau ai lea e fia vaai. Ua leva ona nofo lenei alii; ona toe sauni lea o le a alu i Toga. Ona fai atu le o ‘Ae ia Tigilau-Faamolemole pe mafai ona momoli o ia e Utuutu ma Toga i Toga?

Ona fai atu lea o Tigilau-‘Ae-ua lelei, ae tasi le mea -ia e tausi lelei i a’u i’a-ua e vaai foi e fai i ai le taulaga a lo matou nuu nei i a’u i’a. Ona momoli ai lea o ‘Ae e Utuutu ma Toga. Ona o’o lea i Toga.

Ona fai atu lea o Toga ia Utuutu-Faatali atu i tai-o le a ‘ou alu e momoli ‘Ae i le matafaga. Ona oso lea i lalo o ‘Ae-ua taofi Tonga-ae valaau i tagata o Toga e o atu e fasi le i’a. Ona fasi ai lea o le tasi i’a a Tigilau, ae ua toe foi mai le isi i Samoa. E vaai atu Tigilau-ua na o Utuutu o loo sau-a ua le sau Toga. Ona faapea lea o Tigilau-‘ua fasia la’u i’a i Tonga!. Ona tagi lea o Tigilau i aitu uma o Amoa ona o le fia maua o lona fili. Ona toe sau ai lea i Safotulafai ma Sapapalii-ma tagi foi i aitu-ia lē lavea’ia lona fili. Ona toe sau ai lea i Salelologa. Ona talia ai lea e le aitu fai fili o Supa. Ona o ai lea o aitu o Salelologa ma aumai ‘Ae mai Tonga-ma ave ia Tigilau i Amoa. Ona fasioti ai lea o ‘Ae. 

© Samoa Observer 2016

Developed by Samoa Observer in Apia