O LA’U TALA FO’I

14 April 2016, 12:00AM

1. Matauina i Tala Fou fai mai ua teena e le Malo le faia o se mea sese e tusa ai ma pepa o faamaumauga a le Panama ia na mama mai i fafo-ma o ia faamatalaga uma e faasino lea i se nofoaga aupito i telē e nanā ai tupe o lafoga.

O loo teena malosi foi e le Malo le aafia ai o se tagata Samoa o loo fai ma sui o Samoa i fafo poo se Amapasa-ma lona auai pea i ia faiga- na fesoasoani ai i le Mossack Fonseca ma le faatuina o lana kamupani. O ia la faamatalaga tete’e e faapea na tuuina mai e le Ofisa o Failautusi Tau Nusipepa i le po o le Aso Gafua-e tusa ai ma le fesiligia o  le aafia ai o le Malo i ia faiga pi’opi’o.

O le agaga la o lea pepa o faamatalaga-ia faamaonia ai e le o faaaogaina Samoa e tagata o loo faaaogaina tupe i ni faiga pi’opi’o-atoa ai ma le ‘alofia o le totogiina o lafoga. O le fesili la-e faapefea ona fai mai ua malu puipuia Samoa mai nei faiga pi’opi’o? A tatou tilotilo lava tatou ia i faiga pi’opi’o a le faigamalo i le taimi nei- lea e faitau miliona ma miliona tupe a le atunuu ua maumau ai- e faapefea lava ona lavea’ina Samoa mai nei faiga pi’opi’o ua faailoa mai fafo? E faapefea ona teena ae o lea ua aumai uma pepa o faamaumauga?

O ai la lea e taulamua i faiga pi’opi’o? O le upu moni- e le toe mavae Samoa ma faiga pi’opi’o leaga ua suamalie-ua manuia ai na o ta’ita’i o le atunuu-ae malaia ai le atunuu! O le a la le mea e saga olegia ai le atunuu? E le o toe valelea Samoa-ae ua ala ona valelea-ona ua faamativaina ma ua faatau mea uma e ala i faiga pi’opi’o! Afai la ua le mafai ona faatino le amiotonu ma le faamasinoga-e faapefea la ona toe manuia le atunuu pe afai o le laumanu’ia mai lava o ia faiga pi’opi’o-tete’e le Malo ae ua leva ona ia faia faiga pi’opi’o? O le a sou taofi?

2. Matauina ma le faanoanoa le tulaga ua i ai le amiotonu ma le faamasinoga i totonu o Samoa! A silasila i faamasinoga tau Faiga-Palota o loo faagasolo nei-o isi mataupu ua mafai lava ona faatino e tusa ai ma le Tulafono ua uma ona faata’oto-ae o isi mataupu tau palota-o lea ua tuu le tulafono –ae avane le aganuu e pupuni ai le soli o le tulafono.

O le fesili la-aisea la ua faaaoga ai le aganuu-ae o mataupu tau le solitulafono? Afai la o lea ua faaaoga le aganuu e taofia ai le soli o le tulafono-faamata e le o le mea tonu lea vae atu lava Samoa- e igoa o le “faa-talitane” o le aganuu? Afai ua soli le tulafono-ave e faatino le tulafono ma le amiotonu e pei ona faata’oto e o tatou matua-ae le o le mu loa o le lima ona tapa lea i le i’ofi –ae faalafi ai le soli o le tulafono. Afai la o le tulafono e mo tagata uma-aisea ua faapea ai ona fai? O ai ‘ea e pule i nei tulafono? O le Pati o loo maumalo poo le atunuu atoa? Afai ua soli le tulafono-ave i luma o le Faamasinoga-o tu na ma aga a le amiotonu-ae le o le soli o le tulafono-ae ‘alo ane lafi i le aganuu! O le a sou taofi? 

3. Matauina foi i Tala Fou se ulutala e faapea ua ioe se Sui Faatu mo le Faiga-Palota i lona nofosala i le faia o se ta’utinoga e le moni-ma o lea ulutala e faasino i se sui faatu o le Itumalo o le Vaa o Fonoti. O lea la ta’utinoga e faapea e leai ni ona moliaga faale-tulafono muamua. Fai mai Tala Fou na maua mulimuli ane -e i ai ona moliga muamua ma o lea na una’ia ai loa e le Ofisa o Faiga Palota ia moliaga i luma o le Faamasinoga. Ina ua ioe la lea sui faatu i ona moliaga-sa na faaalia i luma o le Faamasinoga na te le manaomia se loia-ma o lea na tolopo ai loa e le Faamasino o Vaepule Vaemoa Vaai lea mataupu i le aso 2 o Me 2016-e iloilo ai. Ia -o le fesili la- afai la o ituaiga ia o ta’ita’i e ta’ita’ia le atunuu-faamata o le a le tulaga e o’o i ai? O le a sou taofi?

14 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>