‘Fa’amuamua le fanau’ - Faiese

By Seia Soloi 14 March 2017, 12:00AM

E ui i le faigata o auala e saili ona o le tausiaina o aiga, ae e ave lava le faamamafa a matua mo le lumanai manuia o fanau.

O le manatu lea o le tina ia Faiese Nua, 54 tausaga mai i le afioaga o Solosolo. E faigata lava mea uma o le olaga ae o le faamuamua o fanau o le mea lea o lo’o ave iai lana faamuamua.

“Ua savali ai iinei le lima tausaga ua maliu le tama o le aiga, ma o le tulaga faigata lena aua na’o a’u lava o lo’o gafa ma le tautuaina o la’u fanau i le taimi nei” o lana tala lea i le Fofoga o Samoa.

E toalima, 4 teine 1 tama le fanau a le tina ia Faiese, ma o lo’o ao’oga uma i le taimi nei , i le Kolisi o Maluafou ma Leififi.

“E leai seisi o le aiga nei e faigaluega, pau le itu o lo’o faamoemoe iai o la’u galuega o lo’o faia nei, o le lalagaina o fala ma faatau e maua mai ai se tupe aua mea fai a lo’u aiga” 

“E ui lava i le faigata ona o le leai o se tama o le aiga, ae e tuu atoa lava iai lo’u malosi o mea lava e maua i o’u lima ou te galue ai, e faapena ona avatu i la’u fanau aua lo latou ola manuia.

I le mau a le tina e tele suiga ma luitau ua feagai ai nei ma le tagata soifua, o faalavelave fai i totonu o aiga ae mo ia lava ia po o le a le lea faigata e na te saili lava mo se manuia o lana fanau.

“Ou te faia lava la’u galuega lea i aso uma o le lalaga ma faatau, $30tala i le fala e tasi ma e $150tala lava e maua mai i a’u fala e lima e faatau i le aso, o le tupe la e maua mai e mo pili aoga o la’u fanau ma mea fai i totonu o le nuu ma le ekalesia ma le pili o le vai ma le moli.

Na ia faaalia foi lona agaga faafetai I se tasi o ana uo e masani ona faatauina ana fala mo le fesoasoani pito sili ona faamama avega o le totogi ina lea o le pili a lana tama matua lea o lo’o aoga i Leififi.

“Out e faafetaia ia avanoa le aumaua faapea, o le totogiina lea o le pili o le tausaga atoa a la’u tama tama mo le aoga i lenei tausaga.

O moomooga o le tina ina ia maua se fesoasoani mo sona fale fou ma mautu mo le tausiga o ia ma lana fanau.

“O la’u miti na mo le lumanai, ae e alu aso ae sau aso atonu e tali mai lava se tali o lo’u manao.

By Seia Soloi 14 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>