Sauni le leoleo ua fa’amalolo, e ‘ave le mata’upu i le tulafono

677 Hits

Dave Tomasi

Dave Tomasi

Ripotia e Deidre Fanene

Fa’aliliu e Maiava

 

Ua manatu le Ali’i Leoleo lea na fa’amalolo mai lana galuega, o Dave Tomasi, o le a ‘ave sana talosaga i le fa’amasinoga, e fa’asaga lea i le Komesina ma le Matagaluega o Leoleo.

O Dave – na fa’amalolo e le’i faia Faiga Palota talu ai,  o le Leoleo lea sa tele ai tala i fa’asalalauga ma tusitusiga ona o lona taofia o le Komesina o Leoleo, Fuiavailili Egon Keil ona fa’apea sa paka-sese lana ta’avale i totonu o le taulaga.

Na o’o le mata’upu lea i le Ali’i Palemia, Tuila’epa Sa’ilele Malielegaoi fa’apea fo’i le Ofisa o le Komesina o Sulufa’iga, ina ua fa’asea Dave i le faiga o ia, talu mai le aso na tupu ai le mea lea.   

O le taimi nei la, ua fa’amalolo motu ai Dave, ma ua leai sana galuega.

Komesina o Leoleo -  Fuiava Egon Keil

Komesina o Leoleo - Fuiava Egon Keil

Na fa’aalia e sia ali’i, o nisi o mafuaga o le fa’ate’aina o ia, e aofia ai le “iai i totonu o se ta’avale a leoleo e aunoa ma se fa’atagana” fa’apea le tu’uina atu fa’anana o fa’amatalaga i tusitala ma vaega fa’asalalau. 

O le isi ona a’afiaga na ta’ua, o lana fa’ai’uga na fai e tu’uina atu ai se pepa-fa’asala i le afafine fa’aleTulafono o se tasi iloga o le atunu’u, ae mulimuli ane  ripotia Dave ma ‘ave sana fa’asea i le Matagaluega o Leoleo. 

“E fa’atolu na ‘ou lapata’ia lona afafine fa’aleTulafono lea, ona o le talanoa i le telefoni a’o ‘ave le ta’avale, peita’i, sa toe va’aia fo’i i le aso lava lea, o talanoa fo’i i le telefoni a’o ‘ave le ta’avale, ma ‘ou tu’u loa iai le pepa-fa’asala,” o lana fa’aaliga lea.  

Komesina o Leoleo -  Fuiava Egon Keil
Komesina o Leoleo - Fuiava Egon Keil

 “E le o se mata’upu e matua ogaoga tele peita’i, e taumafai lava tagata nei e sa’ili se mea e tuli ai a’u, ma o la ua fiafia ua taunu’u le mean a manana’o ai.” 

Na ta’ua e Dave, na avea o ia ma leoleo ona o le fia fa’atinoina ma le fa’amalosia lava o le amiotonu, le tulafono. 

“’Ou te le-talia le fa’ai’uga ua faia e le matagaluega i la’u mata’upu, ona e le o ni aga-fa’aPorofesa,” o lana fa’aaliga lea i le Samoa Observer.   

 “’Ou te iloa lava fa’aletonu nei e mafua mai le ma mata’upu ma le Komesina o Leoleo i le tausaga talu ai, lea na ‘ou o’o atu ai le vaega fa’asalalau. ‘Ou te lagona lava ua ‘ou afaina ona o le mea lena.”

Sa le fia fa’aalia mai se finagalo o le Komesina o Leoleo ina ua aga’i atu iai sui o le Samoa Observer, ae na saunoa, ua leva ona mae’a le mata’upu lea, e aunoa ma se tau-fa’amalamalama mai.

Na fa’afeso’ota’i atu fo’i le Sui-Komesina o Leoleo, o ‘Afamasaga Michael So’onalole, ae ‘alo’alo ma fetu’una’i solo. 

 “Fesili muamua i le Ali’i Komesina,” o lana fa’aaliga lea. “E le mafai ona ‘ou talanoa atu i se mea vagana ua fa’ataga mai a’u e fai ma ona sui.” 

“O le mea moni lava ua ‘ou fiafia ua mapu lo’u mafaufau. Na matua olopala lava a’u ma fa’a’esea i totonu o le Ofisa o Leoleo talu ona tula’i mai o lenei mata’upu. Na matua faigata lava.”

Na ta’ua fo’i e Dave, o le fa’ai’uga ua tuli-motu ia o ia, na sau sa’o lava mai le Sui Komesina o Leoleo, o Afamasaga Michael So’onalole.

 “’Ou te le o mautinoa pe na o le fa’ao’o mai lava o le fa’ai’uga le mea a Afamasaga na fai,” o le fa’aaliga lea a Dave.

“A’o le Komesina lava o Leoleo sa tatai ona fa’ao’o maia lana fa’ai’uga ia a’u.”

Na fesiligia po’o le a le isi la’asaga o le a o’o iai, ae saunoa Dave: “Lea ‘ou te fuafua e ‘ave la’u mata’upu i le tulafono, e fa’asaga i le Komesina ma le Matagaluega.” 

Na ta’ua fo’i, o le a aga’i e sa’ili se loia e tauavea le mata’upu i le Fa’amasinoga. 

© Samoa Observer 2016

Developed by Samoa Observer in Apia