Toe Ulutaia ole Tautua Samoa

359 Hits

Sui Faipule ole Itumalo o Falealupo- A’eau Le’avai Peniamina, ole sui ta’ita’I foi ole Vaega ale Tautua Samoa.

Sui Faipule ole Itumalo o Falealupo- A’eau Le’avai Peniamina, ole sui ta’ita’I foi ole Vaega ale Tautua Samoa.

Sarafina Sanerivi 

 

O lo’o iai pea le fa’amoemoe mo le vaega fa’aupufai ale Tautua Samoa. O le saunoga maumaututu lea ale sui ta’ita’i ale Tautua, Afioga A’eau Le’avai Peniamina.

O le manatu o se tasi o sui faipule ua leva ile palemene, e le’o le fuanumera e taua.

“O lo’o o’u fiafia lava ma faafetai ona o lo’o iai pea sui ole Tautua Samoa,” o lana fa’amatalaga lea.

O le manatu ole “toe ulutaia ole Tautua,” ole mea e ao ina taula’I iai le vaai ole faaleleia lea ole palemene o Samoa. 

O le iai la ose vaega e agaia le malo ole auala sili lea, e tusa ai male finagalo o Aeau.

“E mo’omia le taofiofi mau o tu ma aga faa-temokalasi I totonu ole palemene o Samoa. O lona uiga o lo’o tele le mo’omia ose leo malosi mase una’I malosi mai ile vaega ale itu agai.

“O lo’o tele lava lo’u fa’atuatua ma e le’o fa’avaivaia ai lava lo’u sui ona ole to’a laiti o sui ole tautua.”

Na ia fa’amamafa lava e ele’o numera e taua.

“O le iai ose leo e sili atu ona taua nai lo’o le numera,” o lana tala lea. 

“E tusa lava pe na’o le to’a tolu I matou, e le afaina lea I lo’u manatu, pau lava le mea e tatau ona fa’ataua, ole iai ose leo malosi I totonu ole palemene. Aua ole a le aoga ole iai o sui e to’a sefulu ae leai ni leo I tonu fai ale palemene? Ia te au lava ia, ole itu e sili ona taua ole faaleo lea o manatu e tonu male sa’o. O ala lena oute manatu ai e le taua tele le fuainumera.”

E manatu A’eau ole itu e alaga tatau le iai ose vaega faaupufai e agaia le malo I so’o se faiga malo fa’a-temokarasi.

“So’o se vaega lava o lenei olaga, e tatau lava ona iai le paleni. O le’a faigata nei pe fai ole’a na ole tasi le vaega fa’aupufai I totonu ole palemene. Aua ole palemene e le na’o se fa’alapotopotoga mo na’o se vaega. O se fono o lo’o faia ai filifiliga mo le atunu’u atoa.”

Na fa’afetaia e A’eau le lagolago a I latou uma na palota mo sui ole Tautua.

“Ou te fa’afetai lava au ile Atua ma I latou uma ua aumaia le latou lagolago ma le fa’atuatuaga ia I matou ua mafai ai ona matou omai e opogi lenei vaega. O lo’o faaalia mai ii o lo’o iai lava I latou o lo’o iloa le taua o lenei itu ole faiga malo a Samoa ma le sao taua ole vaega ale itu agai ile faiga filifiliga ale atunu’u. Aua ana le toe manana’o ise vaega e agaia le malo, semanu e le toe iai se isi o matou e toe fo’I mai.” 

E manatu A’eau e le toe aoga ona talanoa ile iuga ole faiga palota ma e leai se mea e mafai ona toe faia iai.

“O le a le fesiligia le fa’aiuga ua faia e tagata. Afai lava ole to’atele o sui o lenei vaega ua le toe fo’I mai e tusa ai male iuga ole faiga palota, ai lava ona ua latou fa’atamala foi. O lea la, e le alaga tatau iai matou ona fesiligia le fa’aiuga ua faia e tagata ole atunu’u.

“O le a lava le iuga ua maua mai, ole finagalo lava lea ole atunu’u, pau ole mea, ole talia ma agai I luma. Aua e le tatau ona tatou talanoa I mea ua tuana’I, ae tatau ona aoa’ia ai I tatou mo le lumana’I, ma aga’I I luma.

“O le fa’amuamua la lea e iai, ole faia lea o mea e tonu ma sa’o ma mulimulita’I I faiga fa’avae o faigamalo fa’a-temokarasi.”

Na fesiligia le sui ta’ita’I po’o a ni a latou fuafuaga mole lumana’I e fa’afetaia’I ai le H.R.P.P, ae saunoa A’eau, o lo’o tele lava a latou fuafuaga ua uma ona fa’ata’atitia.

“Ae silafia fo’I, a iai sau fuafuaga, e le tatau ona fa’aalia pe fa’ailoa atu, ina ne’I iloa mai e lesi vaega ona latou fa’aogaina mai lea e osofa’I mai ai oe.”

© Samoa Observer 2016

Developed by Samoa Observer in Apia