Te’ena e le Pule-Fa’atonu tu’ua’iga

247 Hits

Ripotia e Lanuola Tusani Tupufia

Fa’aliliu e Maiava 

 

O lo’o te’ena e le Pule Fa’atonu, o Unutoa Auelua Fonoti, tu’ua’iga na faia e se tasi o le atunu’u e uiga i se fa’alavelave tau-ta’avale sa a’afia ai i le masina ua mavae. 

I lana tali na tu’uina mai i le Samoa Observer, o lo’o fa’amautuina ai lava e Unutoa lona a’afia ai i le fa’alavelave na tupu i Vaitele a’o aga’i atu i le ta’avale a le ofisa ae o lo’o tumau pea lona taofi, e le o sona sese na tupu ai lea fa’alavelave. 

Sa fa’afeso’ota’i atu Unutoa mo se fa’amatalaga talu ai le tu’ua’ia e Atuaia Michael Liu, o ia e sese na mafua ai le fa’alavelave. Fai mai sa tatau ona tu’u-avanoa atu le Pule Fa’atonu mo ia. 

Peita’i, e matua te’ena e Unutoa lea tulaga.

“Na mana’o ia ‘ou faia lana ta’avale ona fa’apea o a’u e sese,”o le fa’aaliga lea a Unutoa.

“Lea ‘ou te fai atu, e le o a’u e sese. Ua uma ona fai la’u fa’amatalaga i leoleo ma ‘ou alu a’u aua o lea na ‘ou iloa o lo’o avanoa le ‘auala. Ai na saoasaoa mai lana ta’avale na mafua ai ona sau soso’a le ‘autafa o la’u ta’avale. 

“Na alu i Leoleo fai iai e mana’o e teuteu i tua le ma mata’upu.”   

Na ta’ua e Unutoa, sa taumafai le ali’i o Atuaia e fa’amalosi o ia e totogi mea na leaga o lana ta’avale ina ua fai su’esu’ega a Leoleo. 

“O le mea moni, o la e taumafai le ali’i lea e fa’aaoga lo’u tulaga o le Pule Fa’atonu ia fa’amalosias ai a’u e fai lana ta’avale a’o faia su’esu’ega a leoleo,” o le fa’aaliga lea a Unutoa. 

Na te’ena fo’i e le Pule Fa’atonu se lafoga fa’apea sa fa’asua-avā.

“E le moni lena tala,” o le fa’aaliga lea a Unutoa. 

 “Sa iai leoleo ma e leai se fa’amaoniga o lena mea fa’apea na ‘ou fa’asua-‘ava, aua o le mea moni,  sa ‘ou faigaluega i le po lea.

“E tele a’u galuega sa fai, o tapenaga mo fa’amasinoga ma e fa’amaonia e leoleo lena tulaga mai le leoleo-po sa iai i le Ofisa i le po lea, a’o le’i aga’i atu i le fale ma tupu ai le fa’aletonu lea.”

© Samoa Observer 2016

Developed by Samoa Observer in Apia