O le talatuu o le tagata o le a avea ma Sui Palemia

314 Hits

Fonotoe Pierre Lauofo, Fiame Naomi Mataafa, Faumuina Tiatia Liuga

Fonotoe Pierre Lauofo, Fiame Naomi Mataafa, Faumuina Tiatia Liuga

Lanuola Tusani Tupufia 

Faaliliu e Seagaitumua Tupuola

 

O le a tofia e le Palemia o Tuilaepa Sa’ilele Malielegaoi se Sui Palemia ae le o le tuuina atu o lea tulaga i le palota a le faa-faletui. E ese ai mai  manatu faaalia e faapea o le tulaga o le Sui Palemia, lea o loo umia i le taimi nei e Fonotoe Pierre Lauofo, o le a toe fai i ai le palota, o le faaaliga a le Fofoga o le Vaega e Puipuia Aia Tatau a Tagata- o Peseta Vaifou Tevaga- e leai se mea faapena e faia. 

“E tofi e le Palemia lona Sui e pei lava ona faamaninoina i lalo o le tulafono,” o le faaaliga lea a Peseta i le Sunday Samoan, ma na toe ta’ua ai e faapea o lea faaiuga ua talafeagai ai lea ma taualumaga a le pati. E le’i faaalia manino e Peseta poo le fea tulafono lea na ia ta’ua. Ae talu ai o le taunuuga o le Faiga-Palota Lautele na faalauiloa aloa’ia e le Ao o le Malo, Lana Afioga Mamalu Tui Atua Tupua Tamasese Efi e ala i se faasilasilga faalaua’itele ananafi, o lea tofiga o le a faia i se taimi o lenei vaiaso a’o lumana’i ai le tauaofiaga muamua a le Palemene i le Aso Faraile.

Na teena foi e Peseta fautuaga e faapea o le tulaga o le Palemia e ono tuuina atu mo se palota. Fai mai a ia ua uma ona malilie faatasi le H.R.P.P.ina ia faaauau pea Tuilaepa e avea ma Palemia.

 “O le taunuuga o lea fono na o gatasi me le tulafono lea e fai mai o ai lava ua i ai le lagolago a le vaega toatele e avea ma ta’ita’i o le vaega o le Palemia lava lea.” o lana faaaliga lea. 

“O le mea lea- e leai se isi fono e palota ai le tulaga o le Palemia, ua uma ona fai. Ae peita’i- e tumau pea ona avea Fonotoe ma Sui Palemia i le taimi nei ma o le Sui Ta’ita’i fou mo le (H.R.P.P.)-o Fiame. E le’i faaalia e Peseta poo ai o le –au tamomoe o pito i luma mo le tulaga o le Sui Palemia. Ae peita’i, ua manino le Sunday Samoan e faapea o Fonotoe o se tasi lea o i latou. Na faia’ina Fonotoe i le palota mo le tulaga o le Sui Ta’ita’i o le H.R.P.P. i le vaiaso talu ai. O ia ma Lautafi Fio Purcell, o ia lea o le isi sui faatu mo le Sui Palemia, na faia’ina i taamilosaga muamua o le palota. 

O le faaiuga mulimuli na i’u i se taua i le va o Fiame Naomi Mata’afa ma Faumuina Tiatia Liuga. Na manumalo Fiame i palota e 21-19. O isi sui auai e to’afitu o le faa-faletui a le H.R.P.P na lipotia e faapea e lei auai i le faagasologa o le palota. Na faaalia e se puna o faamatalaga  i le Sunday Samoa e faapea o se mataupu lenei tau le malilie faatasi i totonu o le pati a’o faaauau pea le latou toga-lauapi i Petesa.. O le isi mataupu lea o loo pogai ai le tele o le feeseeseaiga o le fesili lea poo ai o le a tofia e avea ma Minisita o le Kapeneta. I le faaiuga o lenei vaiaso, o le a faaalia ai e le Palemia o Tuilaepa le faatulagaina o lana Kapeneta fou. E tusa ai ma le Faavae fuaiupu 32, o le tofiga o le Palemia e tuuina atu i soo se tasi na te maua le faatuatuaga o le vaega toatele.

I le fuaiupu 32 (2) “O le a tofia e le Ao o le Malo e avea ma Palemia na te vaaia le kapeneta –o se sui usufono o le palemene na te maua le faatuatuaga o le vaega toatele o Sui Usufono o le Palemene. 

“(b) O le a tatau i le Ao o le Malo, i le faia i luga o le fautuaga a le Palemia, ona na tofia e le itiiti ifo i lo le to’avalu ma e le sili atu i lo le sefulu ma le lua isi Sui Usufono o le Palemene e avea ma Minisita; 

(ba) Ole a tatau i le Ao o le Malo, i le faia i luga o le fautuaga a le Palemia, ona tofia se tasi o Minisita na tofia i lalo o le faafuaiupu (b) e avea ma Sui Palemia.” 

Na fesiligia e Fiame pe o lea tofiga-o lona uiga-e otometi lava ona avea ai o ia ma Sui Palemia, fai mai a ia o loo i ai ni tulaga faigata e tusa ai ma lea tulaga. 

 “O lenei tofiga (Sui Palemia) o se tofiga lea a le vaega,” o la faamalamalamaga lea a le tamaitai. “Ae peitai-ua uma ona faaalia e le Palemia o le ana iloiloina le palota a le pati..”Ou te manatu-o se mataupu lea e tatau ona tuufaatasi. E pei lav o lo matou taitai o le Palemia, ou te manatu o se mea aupito i poto lea o le avea o le Sui Taitai ma Sui Palemia.”  

 “Ae peitai o tulaga lavelave ia e tatau ona faatulaga lelei...”

Ae mo le tulaga o le Palemia, faatasi ai ma le toe taliu mai o le H.R.P.P. i le Palemene ma leai ituaiga o malosi, fai mai Fiame “e tatau ona matou fesiligia o matou mafaufau pe sui lo matou ta’ita’i.”

© Samoa Observer 2016

Developed by Samoa Observer in Apia