LAUGA - “Ia fai ma tagata mătua i le faatuatua”

6125 Hits

Petaia Setu

Petaia Setu

Tusia - Petaia Setu


(Eperu 6:01)

Pe e te laitiiti lava i lau galuega, ae a ‘e amiolelei lava oe ma faamaoni i lau galuega, e te mamalu ai lava. E te mătua lava oe i lau galuega. O le ‘matua;, e aloaia tele e le faa Samoa. Ao le fia mătua, e le fiafia iai Samoa. O le fai ma tagata matua, ua le o le matua lea i le auaunaga poo tausaga o le soifuaga. E le o faailoga foi poo le maualuga tau aoaoga. E le o le lima malosi poo le matua i mea e fai. Leai! E tasi lava le mătua o loo tulimatai e le tusi nei o Eperu. O le tagata toa. E toa i tigā. O le tagata e maua’a i le Atua. E le faaluafesasi lana laa. E laa mautinoa. E finau, tauivi, ma aga’iga’i  pea i luma i le faamoemoe ua taula iai lona faatuatua. O le uiga lea o le fai ma tagata mătua o loo fia faatāūaina i lenei feau. 

O le mea moni, ua manaomia ona aga’i i luma.

Alu ese mai le laasaga o loo e iai. O le olaga moni faakerisiano, o le olaga laalaa. E savali. E galue; e tausiniō. E leai se tagata e tumau pea i sona olaga pepe, poo sona olaga itiiti poo sona olaga talavou foi. E āga’i i luma le taaviliga o le lalolagi ma fesuiaiga o le olaga tuputupu a’e o le tagata mai lea taimi i lea taimi. I le, o foliga uma na o le olaga faakerisiano. E le o se olaga kerisiano le tutumau ai pea i le mea e tasi.

Fai mai le tusitala nei i lana faamalosi i kerisiano Iutaia, ‘Tatou tuua aoaoga ia’. E le o tuua tia’i, pe tuua foi faalēano iai. E le mafai ona lafoai pe faagaloina, auā o le faavae lea, o Keriso. O Iesu Keriso, o le amataga ma le taunuuga o lo tatou faatuatua (12:2). O tagata Eperu nei o loo ave iai le tusi nei, o tagata ua latou lafoai mea uma; o tofi, o tiute, o tu ma aga uma o le lotu Iutaia, ae liliu mai i le talitonuga faakerisiano. Poo Ierusalema poo Roma, ae tāūa le faamalosi’au a le tusitala ma nisi na ta’umătuaina i le faatuatua mo le au uso nei. O le mea ua tupu, ua maalili le faatuatua. Auā foi ua leva ona tatau ona ‘ai i mea aano, ae matanana lava i le faasusu! (5:13-14). Fetaia’i loa ma tigā ogaoga o le olaga, toe vili loa le lipine i tua i lona amataga. Ua faasaga mai sauaga ile au kerisiano. O manatu o nei tagata, ua latou lafoaiina o latou fale tapuai, fata faitaulaga, ositaulaga ma taulaga ona o le talitonuga kerisiano. Ua tautino e le aposetolo, o mea ia ua tā’ua, ua na o ni ātaāta (shadow). Ua lafoaiina ātaāta ia, ina ia maua e outou le moni (Iesu Keriso).  

E iai pea vaivaiga masani faapea o le olaga. O le ioe tōa’i. O le mulimuli i taa’a’iga. O le alu le mautonu, sa ou tā’ua i le vaiaso ua tuanai atu, A ‘e mautinoa ua faatonu oe e le Atua e te alu, alu loa. Alu ma le loto atoa. O le alu mautinoa  lenā! A fetaia’i ai ma faigata, e le toe popole. Ua leai se fefe. Poo le galueina o le vaomatua, poo le fagotaina o le gataifale. Poo taua faalemafaufau i soo se faleaoga, poo le auaunaga i soo se galuega, ia e talitonu, i lē ua fai ma amataga ma taunuuga o lou faatuatuaga – o Iesu Keriso lea. O le vaivaiga lea sa i le au kerisiano Iutaia (Eperu). Ua palaai i sauaga. Ua fefe i le oti. E le i tāpena iai. E le i saunia i aso o afā ma aso matagi. Ou te fia faailoa upu a le tusitala Eperu i tagata Eleni, “O loo outou sailia mai i le paolo le ala i le mea moni, tou te maua lava ia Iesu Keriso” Mo Iutaia, ua faapea upu a le tusitala o le tusi nei, “Ua outou saili i le taulaga atoatoa na te tatalaina le auala i le Atua sa tapunia e ā outou agasala; tou te maua ia Iesu Keriso”. Fai mai se tasi tamā kerisiano tauta’ua, “O Iesu, o ia lava lea na aumaia le faasinomaga i le mea moni ma le ala i le Atua” (Jesus was the one person who gave access to reality and access to God) O le ata lea o mafaufauga o le tusi nei. 

Samoa e, e faapefea ona e ausia? E sa’o pe afai e faatuatua upu ae le faatuatua le loto? E maua Iesu Keriso pe afai e pa’epa’e fafo ae faamisa totonu? E mafai pe afai tau lava ina fai ae leai se alofa o iai? O le olaga lenā sa femēmēa’i ai tagata ia. Ua fefefe ina ua siilima lo latou faatuatua (5:11,12). O le olaga kerisiano, e faapei o le tagata e tietie i le uila – a lē alu i luma, ua pa’ū. Fai mai le tusitala, “Tatou aga’i atu i le faaatoatoaga” (let us go on to perfection). O le faatuatuaga kerisiano e iai lona “taunuuga”. E iai lona “mutaaga”. E “tini” ia Iesu Keriso. O ia o le “Atoatoa”. Ua uma ona ia fofola le ata. Mai le fale povi i Peteleema seia oo i tuāpa o Ierusalema. O le toa i tigā. Mătua i le faatuatua. 

Ioe, atonu e le faigofie ona ausia. Ae le tatau foi ona tatou faafitia. O la Paulo i le ekalesia i Filipi – “Ou te tausisi atu i le faailoga, ia maua ai le taui na valaauina ai a’u mai lugā e le Atua ia Keriso Iesu……A o le mea ua tatou oo iai, ia savavali faatatau i lea lava mataupu, ia manatunatu i lea lava mea” (Filipi 3:14-16). E lelei loa lau tietie uila, ona e le toe popole loa lea. E te le toe pa’ū. E te fefevale pe afai o ‘e tama meamea. Ae a mătua lou faatuatua, ona to’a lea ia te oe le au. Samoa, laa malosi i le isi laasaga o lau tausinioga. Ma ia e faautauta i ou laasaga uma. O la Paulo i le ekalesia i Korinito, Ua uma aso o le faatamaitiiti, ua ola faa tagata mătua (1 Korinito 13:11-12). I le ma lenei Samoa; O le tagata ua mătua lona faatuatua, e leai se piliota (full stop) i lona olaga i le lalolagi nei. Oka! E le o lona uiga ia faaplogaina i tatou uma, a ia tatou iloa le ala i le mea moni ma lona taunuuga. Ia faautauta ona see i luma. Auā ua iai le pale matagofie o i luma; o le Atoaga ia o mea uma. Fai mai le tusitala o le Eperu, Tatou ō seia oo atu i le faaatoatoaga. Samoa, onosa’i! Faamalosi mai! Fai mai le isi koeaiga sisifo, You stop , you drop!

Ia fai oe ma tagata mătua i le faatuatua. 

 

Amene

 

Phone – (0685) 25125

Mobile – (0685) 7737063

 

© Samoa Observer 2016

Developed by Samoa Observer in Apia