Manatu o le Fa’atonu - A’o outou faamanatuina, ia ‘aua ne’i galo tamaiti ia o loo i luga o ala tetele!

180 Hits

Tusia - Mata’afa Keni Lesa

Faaliliu e Seagaitumua Tupuola


Talu ai ona o lea ua faalauiloa mai e le Ofisa o le Komesina o Faiga-Palota le taunuuga mulimuli o le Faiga-Palota Lautele lea faato’a uma atu ona tatou faia, atonu o le taimi nei o se taimi lelei lea e faamanatu atu ai i sui auai fou o le Paeaiga a le Palemene se mataupu e tatau ona matua faate’ia uma ai tatou.  

Pe matou te talia pe le talia le i ai o le tulaga mativa i totonu o Samoa, ae o le mea moni lava ia-o loo faatau-pupula mai ma le toto’a i o tatou foliga. Ma e faasino lea i tamaitai laiti o loo faatauina atu oloa i luga o ala tetele o Apia ma Samoa atoa i itula uma lava i le faagasologa o le ao ma le po-ia e tatau ona latou maua se soifuaga lelei e sili atu. E tatau ona latou maua le aoaoina ma ola i se olaga masani e ala i le tausia ma vaai faalelei.

O lenei itu e mautinoa lava e le o se Samoa lenei e manaomia e nei Usufono fou magafagafa o le Palemene. O le mea o loo tupu e faapea o nei pepe matitiva ua faoa o latou tulaga tau tamaiti laiti talu ai lava le taumafai ina ia faafetaui pito e lua mo latou aiga ia o loo soifua i se tulaga faigata, o le mativa ma le moomoo.

Ua matou fai atu faapena talu ai- i ta’ele o matou loto- o i tatou o se atunuu e popona i ona tagata. O i tatou o se aiga –tagata ua masani- ia latou te tauaveina se talitonuga malosi o le fetausia’i faale-aganuu lea e una’ia e la tatou aganuu ma talitonu faatauaina faa-Kerisiano 

O le pogai lea e le mafai ai ona liliu atu lo tatou mata tauaso i le toatele o tamaitai laiti ma teineiti-ia ua liua e avea ma tamaiti o le alatele ma o loo tutupu a’e e avea ma tagata solitulafono faafitauli ia e mafai ona avea ma faatiga i le lumana’i. O le mea moni, o le faaaogaina o tamaiti, ia e tatau ona o i le a’oga, e faatosina mai ai le alofa o tagata e feoa’i solo, ia foi e faamalosia ina ia faatau se mea mai ia i latou po le tuu atu o se tupe ia i latou, e tatau ona faavaivaia e tagata uma lava. 

O le mea moni e faapea o aso uma lava i totonu o lenei atunuu, tatou te vaaia ai le toatele o tamaiti laiti-o o atu i ala tetele e aisi ai-ma faatau atu oloa-mo soo se tupe e mafai ona latou maua e fesoasoani ai ina ia oloa o latou aiga. 

Mo le tele o tausaga e o’o mai i le taimi nei, ua loa ona faaalia e lenei nusipepa nisi o tala faamomoiloto e uiga i nei tamaiti laiti. I se taimi e le’i mamao tele atu, sa matou faaalia ai le tala o Suliveta e 10 tausaga le matua.  O lea tamaitiiti na te faatau atu fualaau i luga o le alatele, e masani ona vaaia latalata i le Marina poo i le McDonald i aso uma. 

 “Fai mai lo’u tina out e sau e faatau atu ana oloa ina ia mafai ai ona maua sa matou tupe,” o lana faamatalaga lea. “E matua to’atele tagata i lo matou aiga ma e toatele tagata o le matou ‘au-aiga ma e masani lava ona le lava a matou tupe ma mea’ai.”

“O le mea lea-o tupe ou te maua i aso uma ma le po, ou te avatu ia tupe uma i lo’u tina. O lea ua ‘ou masani nei i le mea o loo o’u fia, ma ou te fiafia i ai. Ua ‘ou fiafia ina ua ‘ou iloa e mafai ona ‘ou fesoasoani i lo matou aiga, tusa lava pe le o lava.” O loo filo nisi o mataupu tulaga faigata, ua uma ona matou faaalia se teineitiiti e lima tausaga le matua na te faatau atu kilipa mo lauulu ae le alu i le a’oga.

E sa’o lelei lena, o lea matou te talanoa atu e uiga i se teineitiiti e lima tausaga le matua. Ae peitai-ua na o ia lava o se teineititi e toatasi mai le toatele ia ailoga ua te’a ese ma tulaga o le pepe-ia ua una’ia e aunoa ma se matamuli e o latou matua i itula uma o le ao ma le po e aisi i luga o ala tetele o Samoa. O lenei tulaga e matua faamomoi-loto lava.Ua matou fai atu faapena i le tele o taimi ae peitai-o le mea moni lva lea.

Oso i lau taavale ma aga’i atu i le McDonalds i le po poo fafo ane o ia fale kalapu-ona e vaaia lea o se tulaga mata’utia o loo feagai ma nei tamaiti. Latou te faalagolago i le alofa o tagata onanā, tagata ua fetogi i ma’a o latou foliga, tagata leaga, tagata tosoteine, avetaavale mata’utia ma ituaiga uma o tagata solitulafono.  

E le o se tulaga lenei e masani ai. Ma e le o se tulaga lelei ma le talafeagai ai.

E lelei ona faamanatu ia i tatou iinei ma le taimi nei-e faapea o le tiute o matua ma e vaaia tamaiti ona tausi nei fanau. E tatau ona tuuina atu ia i latou le avanoa e fai aim ea a’oga ma ia tausi pea se’ia o’o i se taimi e mafai ai ona latou o atu e saili ni galuega aloa’ia.  O le mea o loo tupu i aso nei e leai sona eseesega mai le faasaua ma le faaaoga sese. O se mea sese lenei ma e le o se mea e masani ai. O lemea moni-e le o se ituaiga lenei o lumana’i e mana’omia e Samoa.

Matou te faaaogaina lenei avanoa e faatosina mai ai finagalo o Sui Usufono o le Palemene ia o loo faamanatuina o latou manumalo- i lenei mataupu mata’utia. Faamolemole fai se mea e uiga i lea mataupu. Aua e te fulitua i ai e pei o le paeaiga talu ai a le Palemene, Faamolemole. Ia outou maua Samoa se Aso Sa to’afilemu-ma ia faamanuia atu le Atua!

 


© Samoa Observer 2016

Developed by Samoa Observer in Apia