SE’I O TA TALANOA - UA MAMA I OA MAMA I TALOA-LEAKS AT THE GUNNEL AND THE KEEL.”THERE IS NO HOPE FOR OUR MISFORTUNES”

230 Hits

Tatou te faafetaia pea le alofa ma le agalelei o le Atua-ona ua tatou aulia manuia mai lenei Aso Sa i le manuia!

E ui foi ina le ‘asa se aso ma le lu’itauina o lo tatou faatuatua e ala i mala ma faalavelave tutupu faafuase’i-aemaise ai o le maliu ma le oti ua motusia ai mafutaga ma e pele ma mamaē-aemise ai o nai o tatou matua, uso ma tuafafine ma nai fanau iti- ae tatou te faafetaia pea le Atua talu ai na te le tuulafoa’ia  i tatou i taimi o puapuaga- ae na te faa-lotoele ma faamafanafana mai-ua mafai ai ona tafiesea o tatou loimata maligi ma le faanoanoa- ae suia i le fiafia ma le olioli o lona mafuta mai. O lea e tatau ai ona tatou viia pea lona alofa ma lona agalelei. 

Ia malo lava le soifua ma le lagi e mamā! Ae alo maia- o le tatou talanoaga masani foi lenei i Aso Sa uma; ma e pei lava ona logologo atu pea- o lenei tusitusiga ma lona agaga atoa- o le fia faailoa atu lea o nisi o mea o loo tutupu i totonu o lo tatou atunuu-ina ia outou silafia ai e tusa ai ma a outou aia tatau-o mea lelei atoa ma mea e le lelei-aemaise ai o le faailoa atu lea o le pogai o ia mea.

O lona uiga la- e le o se tusitusiga e faaleaga ai pe tuua’ia ai se tasi; e le o se tala fatu fo’i pe o se tau faaleaga, pe faaoloataua ai nisi-e leai, leai lava! O le agaga atoa o lenei tusitusiga- o le faailoa atu lea o mea moni uma o loo tutupu ma sa tutupu-ona avatu lea o so matou manatu aumai so outou finagalo-tatou faasoa faatasi i ai-ina ia mafai ai ona maua se vaifofo mo ia faafitauli! Aisea e tatau ai ona outou silafia ia mea? O le tali-e tatau ona outou silafia ia mea uma-talu ai- o outou le atunuu lautele ma i matou nei-o tatou tonu ia e matua aafia i nei faiga uma!

O le itu taua la-matou te faailoa atu-ona aumai lea o outou finagalo-ina ia mafai ai ona tatou galulue faatasi e fai se faiga e titina ai soo se  mea leaga o loo tulai mai! Ia-o lena ua tuuina atu i luga le Ulutala o le tatou talanoaga-ma e i ai lo’u talitonuga- o loo manino ma malamalama le ulutala i le atunuu! Ae afai lava e moomia pea sina faapulapula teisi- ia faafofoga mai la! O le ulutala e faasino i se vaa ua mama-ua matua mama leaga lava-ua mama le oa-mama le taloa.

O lona uiga ua le mafai ona toe faaaoga; ua leai foi se aoga; ua le o toe saogalemu fo’i ona malaga ai se tasi. O le faatatau la o lenei talanoaga-o le faiga-malo o loo i ai nei-e leai se mea e ese ai ma le va’a ua mama i le oa-mama i le taloa! O lona uiga-ua le o toe saogalemu ona faaaoga e le atunuu! 

A tatou tilotilo la i le tala faasolopito o le faiga-malo o loo i ai nei- o lea ua savali i le 40 tausaga talu ona latou faafoeina le atunuu! O se vaitaimi umi lea taimi ae o le fesili-o le a la outou silasila i ai Samoa? E moni a’u ua tatou matua mama lava?

Afai tou te saunoa mai ua mama- o le a le pogai? Matou te le toe faailoa atu le anoano o faiga pi’opi’o e pei ona lipotia e le Pule ma Su’etusi Sili! Matou te le fia ta’ua foi le faitau miliona ma miliona o tupe a le atunuu na maumau talu ai nei faiga pi’opi’o a le Malo! Matou te le tau faailoa atu foi taupulepulega leaga a tagata faigaluega o le Malo na faaaoga sese ai tupe a le atunuu!

Ae o le itu e sili ona mata’utia- e tiga lava ona lipotia ma faamaonia e le Pule ma Su’etusi Sili a le Malo ia faiga pi’opi’o, ae le o mafai ona taofia ai-o lea lava e fai. Afai la o le faiga-malo o loo i ai nei o le Vaa ua mama i le oa mama i le taloa-o lona uiga –o le vaa ua goto, ua tatau ona toso- ma afai tatou te o faatasi ai-o lona uiga- e goto uga faatasi ai ma tatou i le moana sausau!

Ua atili la ona goto le vaa o le faiga-malo o loo i ai nei- ‘o le mana’o lava ma le faananau e tanu ia lilo ana faiga pi’opi’o; e le fia tali mai i le atunuu, ae o le atunuu e ana tupe ia na aafia ia latou faiga pi’opi’o,  ae mumusu foi e ave i le faamasinoga e saili ai le amiotonu ma le faamasinoga.

O lona uiga la- e leai se mea tatou te toe mafaia i le vaa ua goto-ae o le faalavelave-a tuu nei ia goto-o le a goto atu ai ma i latou na taulamua i nei faiga pi’opi’o uma! Ae peitai- e aliali mai e peiseai e le o popole le faiga-malo i le goto, ae o lona faamoemoe-ia latou goto faatasi lava ma latou mea leaga na fai- ae ia ‘aua lava nei ‘o’o i luma o le Faamasinoga. Fai mai le upu a le atunuu- e te fiu lava e sasa le manu ua gase-ua gase lava!

E te fiu foi e alo ma tatā le vaa ua goto-ae goto lava! Afai la o le vaa lea o loo fia malaga ai Samoa mo le isi lima tausaga o i luma- e lelei ona toatele nisi e tatāina le vaa-aua o le mea e o’o i ai-e malemo ma goto uga Samoa i le moana-ae totoē ma tusitusi-lima i le atunuu! Ia o lea ua uma le Palota-o le fesili Samoa- e te fia malaga i se vaa ua mama i le oa mama i le taloa?

O se vaa faapena Samoa- e na o le oti e maua ai! E le na o oe e te maliu ai-ae maliliu uma ai ma lou aiga! O lau filifiliga la- e te manuia ai-o lau filifiliga foi e te malaia ai! Ae ia faamuamua  le manauia o lau fanau, lou aiga, lou nuu ma lou itumalo!

O le faamanatu-afai o e mativa ma le tagolima- “o i tatou e faia se suiga ina ia manuia ai! O le manuia lea matou te talanoa atu ai -e le mo na o taeao ma ona tala atu-ae o le olaga atoa ma le soifuaga. Afai la ua tatou iloa ua matua mama leaga le vaa o le faiga-malo lea o loo faafoeina nei  le atunuu- o tatou e faia le tonu-aua e leai se isi e fia alu i se vaa ua mama- ae tuu le vaa lelei ma le vaa fou e saogalemu ai le faiga-malaga.

Afai la o lea ua savali i le 40 tausaga o folau Samoa  i lenei vaa mama-o ai la e te faamoemoe na te lavea’ina oe, lou aiga, lou nuu ma lou itumalo?

Afai o e faamoemoe e te alu pea i le vaa mama ae te iloa lelei e te malaia ai, o se faaiuga tonu lea? Atonu e tau feololo pe a na o oe- ae afai e tou te o ma lou to’alua ma lau fanau i lea vaa mama- e leai se mea e ese ai ma lou pule i lou lava soifua! O le upu a le Tusi o lē na te iloa le mea e tatau ona fai ae le faia-o le agasala lea. Ia manuia tele le Aso Sa Samoa- ma ia faamanuia atu le Atua!

 

© Samoa Observer 2016

Developed by Samoa Observer in Apia