Filemu ma Fiafia o le malosiaga lea o Aiga
Faimai Luaipou “ e leai seisi nofoaga e sili atu nai lo le Aiga”
O le tinā ia Luaipou Mulipola,48-tausaga mai Siusega, o lona talitonuga o le ola filemu ma le ola fiafia e āfua mai i totonu o aiga
O lo’o latou nonofo i lo latou fanua i Si’usega ma lana fanau ma le atali’i o lona tuagane.
“E to’alua tagata faigaluega o lo’u aiga, ae mai lea to’alua o le tupe e maua mai i leisi e $430tala i le 2vaiaso a’o le tasi e $380tala foi i le 2 vaiaso”
“O lo’u aiga o se fa’amanuiaga sili lea mo a’u i aso uma” o lana saunoaga lea i le Fofoga o Samoa
Ta’ua e Luaipou e le’i leva ona latou nofoia lo latou fanua o lo’o iai nei, ma i le taimi nei ua atia’e lava ia ma lona lava aiga i mea o lo’o maua mai i le latou fanua.
“E iai le fa’atoaga ma le togala’au’aina, o nisi aso ua fa’asavali ma maua mai tupe.
“O lo’u talitonuga o lo’o maua lava i le ele’ele mea e tausi ai matou i lea aso ma lea aso.”
O le mau a lea tinā “o le tupe o le fa’apogai lea o mea leaga uma.”
“O le mafua’aga lea o le tele o le vevesi ma fevaevaea’i ai le tele o nisi o aiga,” o lana saunoaga lea.
“Out e talitonu lava o lo’o maua lava i ō tatou lima mea e tausi ai aiga ma fanau.
“O la’u fa’amanatu i lo’u aiga, e le tāua le tupe, ae o le mea tāua ia maua le ola filemu ma le fiafia e malosi ai le aiga”
O se olaga faigofie e maua ai mea uma male faigofie auā o lea e te galue lava oe ia i lou fanua ma lou si’osi’omaga
“O le mea lava ua maua o lenā, ae ia tatou maua le loto fa’afetai ona o le foa’i a le Atua i lea aso ma lea aso.”
Sa tapā fo’i se finagalo o le tinā i le tau o le soifuaga.
“O lo’o taugofie lava le soifuaga pe a fua atu i nisi o atunu’u o le Pasefika,” o lana saunoaga lea i le Fofoga o Samoa.
“Ae fa’aalia lo’u agaga fa’afetai ona o lo’o i ai fa’atoaga o lo’o matou galulue ai ma maua mai ai le isi alagātupe ma fa’atuputeleina ai lona fiafia.
“Matou te lē fa’amoemoe i oloa o lo’o maua i le faleoloa, auā e maua lava mea’ai i le fanua o lo’o nonofo ai ma atia’e ai aiga ma fanau
“Telē le suiga ua iai nei le soifuaga ma luitau ua iai nei, ae o le aiga lava e maua ai lou fiafia”
E ese foi le ea o Siusega ia i le nonofo ai o Luaipou ma lona aiga.
“Leai ni fa’alavelave ‘ai ona o le mao tua o le matou fale, auā o i’inei e leai ni faigānuu, e filemu mea uma i lō matou nonofo ai aemaise o le si’osi’omaga o lo’o matou ola ai”
O se feau tā’ua fo’i lea mai ia Luaipou mo aiga uma, e leai lava seisi mea e maua ai lou fiafia ma le filemu na’o lou lava aiga moni.