Lauga - “Ta’ita’i le Agaga Paia”

By Rev. Petaia Setu 14 January 2018, 12:00AM

A masii se nuu poo se faalapotopotoga, poo se ’au ta’alo foi, e tofi le taitai malaga. A lelei foi se taitai malaga, e saogalemu, e ta’uleleia, e manuia foi se faamoemoe. O lana tofā ma lana faautaga e faalogo iai le malaga. O ona mamalu ma ona tamaliiaga e tausaafia ai le malaga. O le mea lea o loo misi i isi soo na maua atu e Paulo i Efeso. Ua tauto’ai solo ma fai faaleiloga lava le galuega e foliga mai e leai se tapasā. Ua fesili Paulo, Na maua ea e outou le Agaga Paia? O le tali, E le i lagona e matou le Agaga Paia.

O le tusi lenei o Galuega, o le faamatalaina o le taitaiga poto ma le galuega mana a le Agaga Paia i le au aposetolo. O lona uiga, e manaomia ona taitai le Agaga Paia i lou olaga. O le vaa e leai sona tapili, e faataamilomilo ai a i le mea e tasi e leiloa poo fea e alu aga’i iai. Afai ua le i lagona e isi soo le Agaga Paia, ua le o atoatoa foi la ma mautinoa le tulaga o faatino ai le galuega ma le molimauina atu o le feau. Afai e sesē lou tapasā, o lona uiga o loo fai pea oe ma pagota a le mau faafitauli ma mea faigatā.

A o la Paulo i le ekalesia i Korinito, “…o le mea o iai le Agaga o le Alii, o iai le saolotoga” (II Kori.3:17). O le mamafa lea sa tauamo e nei soo ma le lē mautonu. Ona fai sesē ai a lea o le galuega. Ua vaai i le ekalesia, o se ekalesia ola ma le toatele i Efeso. Ona manatu foi lea o le fai ma soo, poo le avea  ma faifeau, tiakono, poo le a le tofiga i le ekalesia tele lea, o le mamalu lea ma le taualoa. Tasi lava le vaai a Paulo iloa le tele o le faaletonu; ua le o iai le Agaga o le Atua i le au uso lea. Ua manaomia ona papatiso oe i le suafa o lo tatou Alii Faaola o Iesu Keriso. Ona maua lea e oe le Agaga Paia e faatautaia ou faiva ma taitai oe i lenei tausaga. 

E iai leo mai lena tausaga ou te ta’ua Samoa, o leo leaga, ua le i malamalama lava i le faaolaina. Tatou te lolotu, a o loo oge lava tatou ma le Agaga o le Atua. Tatou te mapo tofi, ae mativa lava i ‘oa faale-agaga. Ua tatou pepese ma alalaga! Sisii lima ma loimata! Ae iloa oe i lau gagana. E faaalia lou tagata lotu i au amio ma au aga. Po ua maua ea e oe le Agaga Paia?

Le au kerisiano e, faalogologo mai ia i le taiala mo oe i lenei tausaga. E lolotu uma tatou, ae le o tatou uma e lagona. Faalogo i faifeau ia ua leva ona galulue ma la latou tali ia Paulo. Na matou le lagona lava po ua foaiina le Agaga Paia. E le o le lotu e sau ai le Agaga Paia, o OE. O oe le tagata ua talitonu ma talia Iesu i lou loto. E leai se mea e ta’ua o se faauuga i se lotu.

O le faauuga e ifo tonu i le tagata faatuatua ua papatisoina i le suafa o Iesu Keriso. Poo fea lava e te lotu ai, e foaiina i le tagata le mana ma le faauuga a le Atua e ala i le Agaga Paia. Ua leva ona tapena e le Atua lana faaolataga mo oe, ae le o le lotu. Na afio mai le Atua i le lalolagi mo lou faaolaina, oe le tagata agasala, ae le o le lotu.

Tasi lea vaega taua o le lesoni nei. O le tapenaina o ō tatou tagata taitoatasi i le malaga o lenei tausaga. Manatu le au soo nei o le papatisoga a Ioane o le atoaga lea. Ae leai. O le papatisoga a Ioane , o le tapenaina o le loto ina ia salamō. Faatali ai Lē o loo mulimuli mai o Iesu Keriso lea. O le Iesu Keriso lea, e papatisoina ai le tagata ua salamō ma liliu faamaoni i le Alii, ina ia maua loa le Agaga Paia e ala i le talitonu ma le faatuatua moni i lona suafa. A maua le Agaga Paia, ua e saoloto (II Kori.3:17). O lou saolotoga, ua e le toe fefe i le taufaamata’u mai o le fili ma le tiapolo.

Ua māmā mea mamafa uma o lenei olaga. Ua suamălie ia te oe mea faigata uma. Ua leai se popole i le mativa, tauemua ma le ta’uleagaina, tuuaifuaina ma le sauāina ona o Keriso ma lana amiotonu. Ua fai fiafia mea uma i le loto mălie ma le loto mamā. O le telē poo le laitiiti; o le iai o se mea poo le leai, i le faamaoni o le loto i mea ua foaiina e tatou ma le aso. 

Samoa pele e, ia maua e tatou uma le Agaga o le Atua e to’amalie ai la ta folauga. Ua lava ia lena taa taa vale ma le ola faavalevalea i lena tausaga ua mavae. Vaai i lou lotoifale; o lau faasoa ia iai le poto mai le Atua. Tausiga o le aiga i mea uma. O lau fanau, o ou matua, o lau aoga, galuega. O mea a le aiga potopoto, o le nuu, o le lotu; o ou tuaoi ma e ua sulu atu ia te oe. Ia e manatua, o le mea o iai le Agaga o le Atua, o iai le malamalama, le fiafia, le loto malie. Ioe, e saoloto; auā o loo pulea ma taitaiina lou loto e le Agaga o le Atua.

Alu atu ia lena tausaga ma le pisa i tupe, vevesi i le le faamaoni; fetaua’i i le fematea’i; tau i eleele ma tuaoi; fefaamasinoa’i i suafa; felamata’i i tulaga; ma le faufau i le pule. Mafua i se a? E ese le leo o loo e faalogo ai. E le alofa le tagata o loo faataugaina lou ola ma lou malosi. O loo taitai oe e le tiapolo.

E le tauilo le tagata poto. O le tagata ua pulea atoa lona olaga e Keriso. Ua tuu atoa i le Atua lona faatuatuaga auā o le Atua o le alofa lava ia (I Ioane.4:16). Na te taitai, tausi, fafaga, ma leoleo ia te oe i mea uma lava e te iai. (Sala.121:3-8).

Samoa e, tatala lou loto e afio mau ai Keriso i lenei tausaga. Alu nei ia Iesu. Ia lafoa’i lou tagata tuai o le tagata mataga. A ia papatiso nei loa oe i le Suafa o Iesu Keriso lo tatou Alii Faaola, ona maua lava lea e oe o le Agaga Paia ma lana faauuga mana, e te manumalo ai i le fili ma faafitauli uma, i ma’i ma mea faigata uma, i le lalolagi ma ona tuinanauga uma. 

Uso e, ia le iloa i ou mata le fesili lea a Paulo (f2), a ia iloa i lou loto le mamalu ma le faauuga a le Agaga o le Atua.

Taitai le Agaga Paia i lau malaga o lenei tausaga.

 

Amene

 

7737063/7783782

By Rev. Petaia Setu 14 January 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>