Ia fa’aaoga taleni

Tusia Sarafina Sanerivi ma Ilia L. Likou ,

218 Hits

Jan Taeleava, 39 le matua o le soifua o Salani Falealili.

Jan Taeleava, 39 le matua o le soifua o Salani Falealili. (Photo: Ilia L Likou)

 “O la’u ia lea taleni ou te fiafia lava a’u ia e fai e pei o le tuiga o teu mo  teuga o falesa ia aemaise o le tele o le mau fa’atasiga o lo’o mana’omia ai lava vaega nei tau teutuga.”

Jan Taeleava, 39 le matua o le soifua o Salani Falealili.

Na ia fa’ailoa i le Fofoga o Samoa le taua ai tele o le fa’aaogaina lelei ai o taleni ua maua .

“Ia o la’u ia mau , o so’o se taleni lava ua maua o lea lava le tulaga o lo’o i ai le taimi lenei ia o le taumafai lava  ina ia atia’e pea o so’o se vaega mo le lelei lautele o le atunu’u.

“Aua o so’o se tagata lava ia e le mafai ona maua le isi taleni pe a le galue muamua i le isi taleni.

“O lo’o o’u molimauina lea tulaga ma o lo’u ia lea talitonuga, aua e ta te le’i iloa muamua tui teu, o le teuina o ie ma nisi o vaega fa’apenei.

“Ae o le tu’u ai lava o le loto atoa ina ia mafai ona fa’atinoina o so’o se vaega.

“O le tulaga fo’i e pei ona i ai, ia e le mafai ona iloa ona amata se taleni pe a le tu’u ai le loto ma le agaga.

“E pei o le laualuga lava o mea uma o le fa’atinoina o taleni i le fa’amaoni ma le alofa fo’i.

“O nei vaitau ia e pei e talanoa lava le tupe nei vaega uma ae fuafua lelei lava e le tagata ia le tulaga e tatau ona fai ai.

Na ia fa’ailoa o le aoga lava lea o le ola i totonu o nu’u ma afio’aga e malu pulega a matai.

“Aua fo’i e tele lava vaega e mafai ona mauaina ai le tele o taleni, e le gata e fesoaosani i le atina’eina o nu’u ia aemaise lava ekalesia.

“O si a’u nei taleni ia e  tele lava o galuega e mo le lelei lautele o nisi fo’i o taimi ia e pei ona ta’ua muamua ia e fai lava ma le alofa i le tele o taimi.

“O a taleni ua aumai e le Atua, ia a to’a’aga lava e fa’aaoga ia e toe fa’aopopo mai fo’i nisi taleni fo’i mo le ola.

“Ae ia aua lava ne’i  galo le fa’aaogaina lelei o taleni ua aumai e le Atua.

© Samoa Observer 2016

Developed by Samoa Observer in Apia