Ia amata i se amataga fou

By Sarafina Sanerivi 14 January 2017, 12:00AM

O so’o se amataga fou lava e tatau lava ona i ai suiga fou, e le gata ina fesoasoani ai le aga’i ai i luma ae mo le lelei o i latou o lo’o auai.

I le fa’atalatalanoaga a le Fofoga o Samoa ma le tinā i a Fofoa Lolo, 46 le matua o le soifua o Salani Falealili, na ia fa’ailoa ai nisi o vaega e taumafai aua le aga’i ai luma o le aiga aemaise o le fa’aaualuma e pei ona auai ai totonu o le afioaga.

“Ia o lea fo’i ua alu atu le la tausaga ma ona lelei ma leaga , lenei ua i ai le masina muamua o lenei tausaga i a te a’u ia e leai ma se tasi e le’o i ai se loto fa’afetai i lea tulaga.

“O se itu fo’i lea e lelei ai le tuana’i ma mea na tutupu ai ia e a’oa’oina mai fo’i mafaufau i le tele o vaega e ao ona fa’aleleia i le aga’i i luma.

“Ou te iloa o totonu o si o’u aiga ia o le a tele lava fo’i ni vaega e tilotilo i ai e pei o le fa’amalosia ai pea o fanau ma fa’atonu lelei i itu e ao ona o latou ola ai.

“Ua le faigofie nei aso, e ese lava le itu e fa’atonu atu ai fanau i le fale ae ese fo’i aga latou te faia pe a o ese atu ma aiga.

“I a te a’u ia e taua ai lava le tiute o matua , i le ao ma le po, ina ia aua ne’i mapu le fa’atonu, aua ne’i tu’u le tiute ole fautua afai lava e le una’i mai le fa’alogo ma taliga ia o la e fai mai le tusi e tatau le sasa i le tua o le vale.

“E le fa’apea la ia sasa lava i le oti ae o le sasa e fa’atonu ina ia aua ne’i toe faia se sese.

O le isi tulaga na ia fa’ailoa i le fa’atalatalanoaga le lelei ai lea  o le saofaiga o le afioaga i le itu fa’aleaualuma.

“Ia ou te iloa e fa’apena fo’i fa’alapotopotoga uma o lo’o i totonu o le atunu’u i aiga, nu’u ma ekalesia ma le malo ia o lea ua amata feau o lenei tausaga.

“O lo’o aga’i lava i luma ina ia fa’atino vaega e manuia ai aua le aga’i atu ai le lumana’i, e pei fo’i la i le fa’aauluma o si o matou nu’u.

“E tele lava nai fa’afitauli e pei na masani ai, ia masalo o lenei tausaga ua amata o le a le taumate o le a fou mea uma.

“E pei o lea le fa’amoemoe o le aulia ai o le tausaga fou, ia fou mea uma aua o amataga lelei e fa’ai’uina ma le manuia lona taunu’uga po o lona fa’ai’uga fo’i.

By Sarafina Sanerivi 14 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>