Ua lu’i e le Fofoga Fetalai muamua le Sui Palemia

157 Hits

SUI FAATU: Leota Ituau Ale ma le SUI PALEMIA: Fonotoe Pierre Lauofo.

SUI FAATU: Leota Ituau Ale ma le SUI PALEMIA: Fonotoe Pierre Lauofo.

Tusia - Lanuola Tusani Tupufia 

Faaliliu e Seagaitumua Tupuola 

 

O lea ua lu’i e le Fofoga Fetalai muamua o le Palemene o Leota Itu’au Ale, le Sui Palemia o Fonotoe Pierre Lauofo, mo le nofoa o le Itumalo o Anoama’a Sisifo i le Faiga-Palota Lautele.

Ma i le faamaonia o lona avea ma sui faatu ananafi, fai mai a ia e le o faanatinati i sana faaaloaloga faale-aganuu ia Solosolo ona o lea ua uma ona aumai se poloaiga a le Faamasinoga lea na talia ai lona toe fo’i atu i le nuu. 

Ae o loo faatūtū le silasila a le sa avea muamua ma Sui o le Palemene i faiga-palota ma e faatoa fai lana faaaloaloga faale-aganuu pe a mavae Mati. Ua toe sui lo’u mafaufau e uiga i le faiga o la’u faaaloaloga i le taimi nei,” o le faaaliga lea a Leota. “Ou te manatu o se mea e sili ona poto pe a tuu lea fuafuaga se’ia uma le faiga-plota ona e mafai ona ave e isi tagata i le Faamasinoga ma e ono mafai ona faauigaina o se faiga pi’opi’o ma le tau faasese. 

E tumau pea lava ona i ai lea fesili ma le masalo ona o le Faamasinoga e aumai ai le faaiuga. Ae peitai-pe ou te manumalo pe faia’ina –ou te faia lava lea faaaloaloga pe a uma le (faiga-palota).O le tilotilo i le faiga-palota, e talitonu Leota ua lava ma totoe mea na ia faia e maua ai le lagolago a lona itumalo. O lē sa avea muamua ma Fofoga Fetalai na ia mua’i ulufia le Palemene i le 1970 ae faatoa luasefulu ma ona tupu ona tausaga. 

 “O lea ou te peti i tagata o lo matou itumalo ina ia ‘aua nei galo ia i latou le 20 tausaga sa ‘ou i ai i totonu o le Maota (palemene) ma le faiga sa ‘ou fesoasoani ai ia latou fanau e ala i a’oa’oga ma taaloga,” o le faaaliga lea a Leota. 

“E leai sa’u folafolaga e tasi na fai i soo se tasi e uiga i soo se mea ae sa ‘ou fesoasoani ia i latou e ala i galuega tau pepa o femalagaiga faatasi ai ma le toatele o le ‘au-matutua sa malaga atu i Amerika, Ausetalia ma Niu Sila e vaaia a latou fanau o loo i na atunuu…..e matua toatele lava ae o le a taatia ai faapena.” I le toe ta’ua o le taimi ua tuana’i, o Leota sa ta’ita’ifono i se tasi o ulua’i fono a le Vaega Faa-Upufai e Puipuia Aia Tatau a Tagata i le 1975 lea na tasi ai e tofia Vaai Kolone e avea ma Ta’ita’i.  

I le faiga-palota o loo loma nei-o le a tauva Leota e ave ma sui faatu tu-to’atasi.  

O le matua o lona soifua ua 74, ma o le lagona o Leota-ua “manuia o ia ma faamanuiaina e le Atua.”  E ui lava ina leai sona mana’o e fai ni folafolaga i le itumalo o Anoama’a Sisifo e tusa ai ma ana fuafuaga pe a manumalo, ae fai mai Leota o le a na faia le mea sili e auauna atu ai ia i latou.

Ina ua fesiligia e uiga i lana faatosina, fai mai a ia: “E leai se faatosina e sili ona lelei i lo le fesootai ma tagata.” 

© Samoa Observer 2016

Developed by Samoa Observer in Apia