O la’u tala fo’i

14 January 2016, 12:00AM

1. Matauina i Tala Fou le ta’ua soo e le Palemia o le Solo Tete’e a Tagata Faigaluega-ona o le leai o ni oloa i fata o faleoloa; leai o ni tupe a le Malo ma le leai o ni tupe teu faaagaga-lea fai mai le Palemia e na o ponaivi o moa le mea sa taumafa e le atunuu i na aso…..!

O le fesili la e fia malamalama ai- afai la sa leai ni tupe a le malo toe leai ni tupeteu faa-agaga faaagaga- o fea na aumai ai na ponaivi na ta’ua e le Palemia? Afai la e leai se faamaoniga o na faamatalaga-o le fesili la i le Palemia-

(1) Na faatau e Tupuola Efi ni Tusi Folau a Samoa i tagata Saina?

(2) Na o’o i se faitau miliona ma miliona tupe a le atunuu na faaaoga e Tupuola Efi ma lana faigamalo e ala i ni faiga pi’opi’o e pei ona fai e Tuilaepa ma lana faiga-malo? E i ai se Minisita a Tupuola Efi na fasioti e nisi o ana MInisita e pei ona taupulepule ai isi Minisita o le HRPP  e fasioti le isi o a latou Minisita ona o faiga pi’opi’o?

O le fesili taua lava e uiga i le Solo Tete’e a Tagata Faigaluega o le Malo-e le’i auai uma le aufaigaluega a le Malo-fai mai o le mea na faaoso! O le isi fesili -na maua uma la totogi o tagata faigaluega ia na auai i le Solo Tete’e e pei ona folafola i ai?

O isi ua taui i galuega maualuluga ma e tiga lava ona latou iloa faiga pi’opi’o a le faiga-malo, ae nofonofo lava nei toe tutuli mai a latou galuega! O le a la le pogai e ta’ua soo ai le Solo Tete’e a le PSA? O fea la o i ai nei le PSA? 

O le fesili mulimuli lava- na fai la e Tupuola Efi le VAGST lea ua taugata ai nei le tau o le soifuaga ma pagatia ai le atunu? Na fai e Tupuola Efi se aitalafu e pei ona i ai nei le aitalafu i fafo e $1.1 piliona? Na aumai e Tupuola Efi ni faipisinisi mai Saina e pei ona i ai nei e fai o latou faleoloa i Samoa?

O le tasi fesli-e matua leai-leai lava se mea leaga e tasi na fai e Tupuola Efi na pologa ai Samoa? Aisea? O le tali- e alofa i lona atunuu na tafetotoi faatasi ma ona tua’a i le tau sailiga o le Malo Tutoatasi o Samoa-lea ua tafili saunoa ai nei le HRPP! O le a sou taofi? 

2. Matauina i Tala Fou se lafoga a Afualo i le Palemia- afai e poto-ona faamavae lea.

O le mau a Afualo e matua leai lava se mea e igoa o le poto o loo i le Palemia! Fai mai Afualo-“ana poto e le soona tautala ma faaleaga isi tagata-ma e le mafai ona ia tuua lea amio vagana ai ua na maua le poto mai le Atua! Ia afai la ua silafia e Afualo ma nisi o sui o le atunuu-o le a le pogai ua le fai ai se faatatau i lea tulaga?

E le tatau la ona ta’ita’i e se tagata e leai se poto le atunuu lenei leaga o le atunuu e mamala-e le utuvai tofo i ai se tasi! Tusa lava pe o le a le tomai o le tagata-ae tu’itu’i lava e atunuu –ona uma atu ai lava lea.

Afai la o le finagalo o Afualo ua tatau ona se’e ese le Palemia mai lea tofi ae faaaoga le taimi o loo totoe o lona olaga e fiafia ai-ae le talia-ia o le a faapefea ona faafitia na manuia ma le pule aoao fa- toatasi e tanutanu ai soo se mea faaletonu e aunoa ma le sailia o le amiotonu ma le faamasinoga.

O aso foi nei- e tatau lava ona silafia e Afualo-o le tulafono ia e fai nei -e mo le atunuu lautele-ae le aofia ai le Palemia ma lana Vaega. O le pine o lena faamatalaga-e gaoi e le tagata le $50 ma le $100 ona ave lea i le faamasinoga –faasala; ae tusa lava pe fia milioona e faaaoga e le Palemia ma lana faigamalo e ala i faiga pi’opi’o-e le o se solitulafono lena mea e tusa ai ma le Tulafono a le HRPP ! O le a la sou taofi

Matauina foi i Tala Fou se ata o le Faipule o Lealailepule ma sana ta’utinoga lea ua leva ona tatali e tagata pe moni le tala’ave ole a sui le La o lona Vaa! O le la ua tautinoa mai e le Faipule o Faleata Sisifo-ma o le ta’utinoga o lea solo- o loo tumau pea ona avea o ia ma Sui o le Vaega Faa-Upufai o le Tautua Samoa Party.

Ia-o le a la le isi mea?

Ona o Leala e le o se tagata e luma ma tua-o lona uiga- e alofa Lealailepule i lona itumalo- e faamaoni foi lona finagalo i le tapua’iga a lona itumalo aemaise ai o a latou talosaga! Ia-afai la o talosia Lealailepule e lona itumalo-o lona uiga e a’e foi ma le malo lona faiva!

O ituaiga ia o faipule e matua manaomia lava e soo se itumalo! O le a le ituaiga o faipule?

O le Faipule e savali i le upu e tautala ai-ona faigofie foi lea i le itumalo ona mulimuli ai!

O ituaiga foi nei o faipule- e mafai ona latou faia le suiga lea o loo manaomia e Samoa-o le a atoa le 40 tausaga-o fetosoa’i solo faa-pa’utolo a loi-talu ai le mata’utia uiga ese o faiga pi’opi’o a lenei faiga malo!

Ae o le itu e sili ona mata’utia- fai mai le igoa o le latou Pati-o le Pati e Puipuia Aia Tatau a Tagata! Ia ta’u mai la e oe lava ia-o e iloa ma mautinoa-o loo puipui pe sa puipui au aia tatau i nei tausaga e tele?

O le a sou taofi?

14 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>