O fa’afitauli ua tutupu mai lenei vaitaimi
O le aso ananafi o se aso pisi lea mo tagata Samoa aua tapenaga mo le Aso Sa o Tama.
O nisi sa o atu i le taulaga o Apia aua faatauga ao isi sa galueina le faatoaga.
Ae o Ioane Amituanai sa faaaoga lona ia aso e faatau atu ai ana niu aua se seleni.
E 42 le matua o lona soifua ma na maua lana faatalatalanoaga ma le Fofoga o Samoa a’o faatau atu ana niu.
“E na’o lou tuagane, le tina o le aiga ia ma le ma tama teine e toatasi,” o lona manatu lea.
“Lea e faatau niu i lenei aso aua se seleni. E tai tasi a aso o le vaiaso e faatau ai ao isi aso ou te galue ai i le maumaga.”
Sa taua e Ioane o loo sologa lelei totonu o le aiga faapea le nuu.
Ae sa ia faaalia lona manatu i le tele ai o faafitauli ua tutupu mai lenei vaitaimi i totonu o Samoa.
“I le mataupu la lea o le fai aiga a o tagata o le aiga, o au ia e leai sau faitio iai aua e pule a le tagata i lana ia mea e fai.
“Ae pau a le itu ou te faanoanoa ai ona o le sui fua o le vaai a le tama i lona ia afafine aua e ta’u mai na ua matua vaivai a le mafaufau.
“E leai a la sau ia faasea e fai atu i lea mataupu aua o vaitaimi foi nei, ua avea le tama ma ulu o aiga, ua pei o se mafuaaga a lea mo nisi tama e pule a latou i a latou faatinoga e fai i tagata o latou aiga ma o se tulaga e le manaia se vaai.
“Pau a sina fautuaga, ia o le mata ala o matua i le vaaiga o fanau aemaise lava le tina aua o le tina a lea e mamafa ai le vaaiga o le fanau ia aemaise lava i le fanau teine. Ua le toe sefe le lalolagi lenei taimi.”