E le faalaua’iteleina le taunuuga o le feutana’iga e uiga i se tuuaiga tau feusuaiga

Tusia Lanuola Tusani Tupufia ma Faaliliu e Seagaitumua Tupuola ,

182 Hits

Reverend Dr. Afereti Uili.

Reverend Dr. Afereti Uili.

O le Failautusi Aoao muamua o le  Ekalesia Faapotopotoga Kerisiano i Samoa, o Reverend Dr. Afereti Uili, lea na faate’a ona o se tuuaiga tau feusuaiga e faasaga ia te ia, o loo tumau pea ona gūgū e uiga i lona lumana’i.  

Ona o lipoti e faapea o le tama’ita’i lea na faia lea tuua’iga ua sola ese, sa teena e Rev, Uili le faaalia o sona manatu e uiga i le isi laasaga o le a na faia –e tusa ai ma le faaiuga a le Ekalesia ina ia aveese tofi mai ia te ia-ona o lea tuuaiga. 

“O loo o’u faatali mo le isi lua vaiaso se’ia o’o ina toe valaau le mataupu ma atonu o le taimi lena o le a outou maua ai auiliiliga uma,” o le faaaliga lea a Rev. Uili i le Samoa Observer.  

“I le taimi nei, ou te le o i ai i se tulaga e faailoa atu ai so’u manatu. Ona pau o le mea e mafai ona ‘ou faailoa atu e faapea o loo tumau pea ona avea a’u ma vaega o le ekalesia. 

Sa fesoota’i atu ia Rev. Uili mo se manatu faaalia ina ua uma ona fofoga le tagi lea na ia faauluina e faasaga i lea tamaitai ma se nusipepa, lea na lomia faasalalau ai le tuuaiga muamua. O lea tagi sa tuuina atu mo se faa-talanoaga.  Fai mai Rev. Uili o le taunuuga o le feutanaiga na faamanuiaina ae le faalaua’iteleina.

I totonu o le Faamasinoga i le amataga o lenei vaiaso, na ta’utino e le loia o Alalatoa Rosella Papalii e “foliga mai ua sola ese lana paaga.”

 “Ua uma ona tuuina atu le anoano o fe’au ia te ia ina ia faafesoota’i mai matou ma ia fesoota’i foi ma tagata,” o le faaaliga lea a le loia. “E le’i sau.” 

Sa fai ma sui o Rev. Uili le loia, o  Semi Leung Wai. Ina ua mae’a se maliega i le faagasologa o le feutanaiga i le aso 10 o Iuni 2016, sa sailia e Mr. Leung Wai se maliega e faaulu ai le maliega o lea feutanaiga e avea ma faaiuga a le Faamasinoga. 

Ae peitai-fai mai le Faamasino Sili, Lana Afioga PatuTiava’asue Falefatu Sapolu, e le mafai ona faatino lea tulaga e aunoa ma lea tamaitai. Ona ia tolopoina ai lea o le mataupu se’ia aulia le aso 22 o  Aokuso. O le amataga o lenei tausaga na aveeseina ai e le Ekalesia matafaioi uma mai ia Rev. Uili talu ai lea tuuaiga. Na faate’a e le Komiti a le ‘Au-Toeaina le galuega a le Failautusi Aoao na faate’a o ia mai ona tiute uma faa-faife’au mo le lima tausaga. O le taunuuga, e tatau i le Ekalesia ona tofi le Failautusi Aoao Fou. “O le faaiuga a le Komiti e mata’ituina faiga faavae ma amio a tagata faigaluega sa faavae i luga o faamatalaga molimau na tuuina atu (i o latou luma) e uiga i lana amio.” 

O le faaaliga lea a  le sui o le Komiti o Rev. Elder Soti i lea taimi. 

 “E ui lava ina teena e Afereti lea tuuaiga, ae ese le mea na ta’u mai ia i matou e le tamaitai na aafia ai. 

Ina ua talosagaina mo sona manatu faaalia i lea taimi, sa puipui e Rev. Uili lona le nofo sala ai.

“O la’u finauga e faapea. Ou te le sala. E leai se mea sese na ‘ou faia. E leai lava se faamaoniga o nei tuuaiga,” o lana faaaliga lea.

“O le faaiuga na o latou faia sa faavae i luga o lo latou lava manatu e faapea ua ‘ou agasala ae ou te teena malosi lea tuuaiga. E le gata ina ‘ou teena, e tusa ai ma lo’u iloa, ae leai se mea e tasi ua faamaonia. 

“ I le taimi muamua na fai ai lenei tuuaiga, fai mai Rev. Uili na ia talosagaina le Komiti a le ‘Au Toeaina ina ia iloilo ma le toto’a ia mea-ona e leai se mea e tasi o ia mea-e moni. “Ou te teena malosi ia mea ae foliga mai ua uma ona fai le latou faaiuga e faavae i luga o le latou talitonu e faapea e sa’o le tuuaiga ae sese a’u. 

Na toe ta’ua e Rev. Uili e faapea e leai ni ona lagona le fiafia i le Ekalesia ma le Komiti. E ui lava ina ua aveese a’u mai le ekalesia, e le faapea ai ua ‘ou inoino i le ekalesia. Leai, o le Ekalesia o le Ekalesia a Iesu Keriso lea o loo galue ai le Atua ina ia ‘ausia tagata. 

E i ai lava mea e tutupu i totonu o ekalesia mai lea taimi i lea taimi ma o faaiuga e fai e tagata mo tagata. A pa’ia loa tagata, ona latou faia lea o faaiuga e faavae i luga o mea latou te lagona e sa’o. 

O le itu mulimuli, na ia toe ta’ua e faapea o lea faaiuga ua fai ae le’i o’o i le taimi e tatau ai.

 “O lea faaiuga e leai sona faavae. Sa tatau i le taimi muamua ona latou taumafai e faatulaga tonu pe o i ai se mea moni e tusa ai ma lea tuuaiga a’o lei faia le latou faiuga. O lea mataupu ua matua afaina ai a’u ma lo’u aiga. Sa le mafai ona maua mai se manatu faaalia mai le Taitaifono o le Komiti a le Au Toeaina ananafi.

© Samoa Observer 2016

Developed by Samoa Observer in Apia