O LA’U TALA FO’I

152 Hits

1.Matauina i Tala Fou se ulutala fai mai-“E le faalaua’iteleina le taunuuga o se feutanaiga na fai e uiga i le tuuaiga tau feusuaiga- lea na tuua’ia ai se tasi o Faife’au- lea na faate’aina mai lona Tofi sa galue ai i lana Ekalesia-ona o lea tuua’iga. 

A fua la i le matuiā o lenei tuuaiga-e le traumata o se avega mamafa-tu lea o loo tauave i aso uma e lea Faife’au-pe a fua i le faate’aina mai lana galuega ma le aveeseina uma o ona tofi faale-Lotu. 

Afai la o loo fai mai lea alii –e “matua mamā o ia mai ia tuua’iga uma-ia atonu ua pogai ona le maua se tonu ma’oti o lea mataupu-ona e le o mafai ona maua le tamaitai e faasino i ai lenei mataupu! 

Ae afai la o le a le maua lava lenei tamaitai-o le a la se isi faiga e tusa ai ma le tulafono-e mafai ai ona faamamā le suafa o lea alii? Ia manatua foi-fai mai le upu a le atunuu-“E na o le Lulu lava e lele ae valo’ia….! Afai la o lea-“a faapefea ona aiga i Samoa nei ma nuu e mamao-aemaise ai o ana ‘aumea? A faapefea lona nuu-faletua ma lana fanau-aemaise ai o lona aiga? O le a sou taofi?

2. Matauina le tele o sootaga a Samoa ma isi Malo i fafo-ma o le tino vaaia o ia sootaga-o le tuuina mai lea o fesoasoani tau tupe-e fai ai isi tapenaga a le atunuu mo suiga matuiā o le Tau ma uiga o aso. 

O se mea lelei tele fesootaiga faapenei- e maua ai le tele o tupe e fesoasoani i le le lava o tupe a Samoa. 

O le tino vaaia la o le tino mai o ia fuafuaga-o le faamaoniga lena o le faaaoga tatau o ia tupe- e tusa ai ma le faamoemoe na tuuina mai ai. 

O le matau foi i le atunuu i le taimi nei- o loo totoe pea le anoano o isi galuega e le o faatinoina-ae afai lava o loo alolofa mai pea atunuu i fafo ia Samoa-e tatau foi la i le Malo ona alofa i le atunuu-e tusa ma isi galuega -e tatau ona fai mo le manuia o le atunuu. O le a sou taofi? 

3. Matauina foi i Tala Fou se ulutala fai mai –“E tasi lava le filo o le sootaga!….: ma o lea faaupuga e faasino i se mafutaga e uiga ese le toatele –a le Aiga o Ah Ching.! 

A silasila la i le ata o lenei Mafutaga-e uiga ese le toatele-ma o le molimau ola lea-o se aiga maopoopo. A manatu la i Tua’ā o lenei aiga- o ni tagata tausaafia ma e lauiloa i soo se matatā-e o’o lava i pisinisi ma faatoaga. 

O le toatele foi –e mau galuega lelei-ma afai la o lea-e le o se mea taumateina-o loo latou malamalama lelei i le afuaga mai o le latou aiga! E momoli atu ai le faafetai tele ona o lenei faata’ita’iga lelei mo le tele o aiga o Samoa. 

O le upu lava a le atunuu-“E māmā se avega pe a pulupulu-lima faatasi”. O se Aiga foi e faifai mea faatasi-o se Aiga fealofani lea ma le malosi! 

Ia talosia ia faaauau ai pea lea faamoemoe mo le asŏ ma iēluā-ona leai lea o se vevesi ma le fetuatuana’i! Ia manuia tele lo outou Aiga-aua afai e to’atele se aiga i tamaitai-o se aiga manuia foi lena ma le maopoopo! 

O le a sou taofi?

© Samoa Observer 2016

Developed by Samoa Observer in Apia