Fa’ateleina le Pisinisi o le Coin Save

Tusia LanuolaTusani Tupufia ma Fa’aliliu e Maiava ,

161 Hits

Le fale-sikaleti fou i Falelauniu e le o toe mamao ae fa’aaogaina ai le tapa’aSamoa e gaosi ai sikaleti.

Le fale-sikaleti fou i Falelauniu e le o toe mamao ae fa’aaogaina ai le tapa’aSamoa e gaosi ai sikaleti.

O lo’o aga’i pea i luma ona fa’ateleina le faleoloa o le Coin Save, se tasi o pisinisi ua vave ona olaola i totonu o Samoa. 

O le taimi nei, ua aga’i fuafuaga a lea pisinisi mo le tatalaina o se fale-gaosi sikaleti e fa’aaogaina ai la’au e maua i le lotoifale o le atunu’u.

I se talanoaga ma le Samoa Observer i le telefoni, na fa’amaonia mai ai e le Pule o le Coin Save lea fuafuaga.

Na saunoa Tu’itu’ioaiga Teeking Weng, o le fale-sikaleti – lea ua fa’atuina i Falelauniu, e le o toe ‘umi ae tatala aloa’ia loa. 

“O lo’o matou fa’atali mo se ioega, ona tatala loa lea,” o le fa’aaliga lea a Tu’itu’ioaiga.

“Ae le o le taimi nei. Matou te mo’omia se isi taimi fa’aopoopo e fausia ai le fale e fai ai galuega.”

Na fesiligia po ua iai se laisene o lana pisinisi e gaosia ai sikaleti i Samoa nei, ae tali, ua iai.

E le’i mana’o le ali’i-faiPisinisi – o se ali’i-Saina, e talanoa fa’alaua’itele, pe fa’apei ona fa’atino lea fa’amoemoe e le kamupani.

Ae na ta’ua e se tasi o le ‘aufaigaluega e le mana’o e fa’ailoa lona suafa e fa’apea, o le fuafuaga lea, o le fa’aaogaina o le tapa’a-Samoa o lo’o tele i le lotoifale o le atunu’u, e gaosi ai sikaleti.

O lo’o fuafua fo’i le Coin Save e tatala se fale’aiga tele e fa’aigoa o le KMC.

O lea fale’aiga o lo’o iai nei i le Plaza a le NPF, e soso’o ma le faleoloa o le Coin Save, o le a tatala aloa’ia ona faitoto’a i le lua masina o muamua.

“E leai se uiga, ae faigofie ona manatua e tagata-fa’atau,” o lana tali lea ina ua fesiligia i le uiga o le KMC. 

 “Ae na fautua mai la’u ‘aufaigaluega, e mafai ona fa’aumi o le Kentucky Master Chicken…e leai se uiga, ae faigofie ona manatua.” 

Na fa’aopoopo mai fo’i, o le a va’ava’ai le fale’aiga e fa’atauina atu taro ma le tuna, o taumafa e fiafia lava lana ‘aufaigaluega e a’ai ai.

Ae na tautu lava, o le a fa’ailoa uma lava ia fuafuaga pe a o’o i le taimi e tatala aloa’ia ai. 

© Samoa Observer 2016

Developed by Samoa Observer in Apia